22
Moab Kumpi In Balaam Sam
1 Israel mite cu thawnleh haw a, Jerikho khua ngalkhat, Jordan ngun pen nisuahnak lam, Moab munlawnah ngiahbuk sam haw hi.
2 Moab ngam kumpi Zippor i capa kumpi Balak in, Israel miten Amor mitei humah a bawl haw cu zain,
3 Israel mite cu tamzet a hih haw hangin amah le a mihing ten lauzet haw hi.
4 Moab miten Midian hotu tei lakah, “Khuicangin hampa a peh bangin hi mi honpi ten a elkim uh cu cil pek khawng haw tuk hi,” tin ti haw hi. Mah hangin kumpi Balak in,
5 Amaw ngam, Eufrates Ngunpi el Pethor khua a um Beor i capa Balaam lakah palai hah hi. Mah palai tei lak pen Balak in thucah a, “Minam khat cu Izipt ngam pen tul haw a, atu-in mah mihingte cu mun hempoh ah vakkekin, a ngam uh luah khawng tum haw hi.Ref 22:5 Mipum 31:8; 2Pet 2:15-16; Jud 11;
6 A mihing pum haw tuat ten tam saw val haw hi. Mah hangin hehpih zal inna, hi mite hi tamsiat sakin hi. Amuh cu nehin, ka ngam uh pen hawlvawk thei tuk ung hi. Nangma muicu piakmi thupha co haw in, na tamsiat mite cu siatnak tawk haw hi, tih thei ing.”
7 Mah bangin Moab hotu le Midian hotu cu tamsiat man piak tuk kengin tul haw a, Balaam lakah Balak i thucahmi cu hilh haw hi.
8 Balaam in, a lak hawah, “Tuni tak cu hi laiah camhih unna, zingten Topa i hilhmi hempoh cu theilehtik nang,” ti hi. Mah hangin Moab hotu cu Balaam lakah cam haw hi.
9 Pathian in Balaam lakah, “Na lakah a cam mite hi a kuate kaw?” tin dong hi.
10 Balaam in, “Moab kumpi Balak i palai haw hi,
11 Izipt ngam pen a tul sung pen hinnam khat cu a ngam hawah dim khawng a hih haw hangin, mah mite do in, a hawlvawk theihnak tukin le tamsiatik haw hi,” ti hi.
12 Pathian in Balaam lakah, “A lak hawah tel tuk hi kha ma ci; Israel mi tamsia pahsun hi, itahim titale ka muicu cotu haw hi,” ti hi.
13 A zingten Balak palai tei lakah Balaam cu hawhin, “Kiklehta un, na lak uhah hawh tuk cu Topa in kham hi,” ti hi.
14 Mah hangin Balak lakah kikleh haw a, Balaam a hawh nuam ngawlnak thu hilh haw hi.
15 Balak in hotu upa dedeuh le tam deuhin hah lehleu hi.
16 Balaam lakah, “Hehpihnakin ka lak uhah na hawh tuk hi a khamtu um zal pahsuh hen.
17 Laksawng tampi pia tung a, na hilhmi hempoh vang bawl khawng tung hi. Hung zazal inna, hi mite hi keima ai-in tamsiat sakin hi,” tin Balak i thucahmi cu hilh haw hi.
18 Mahnaven Balaam in, “Balak in, a kumpi innsung a, ummi sui le ngun hempoh a pia hei in, Topa i thu cu el thei tuk mang, na neuno thu ahi hei in, Topa ka Pathian i thupiakmi cu el thei hihim mang hi.
19 Mahnaven midang bangin tuni tak cu hi laiah camhih poh unna, Topa in thudang poh hilh tuk a nei tale, tu zanin za tung,” ti hi.
20 Mah ni takah Pathian cu Balaam lakah hungin, “Hi miten a lak hawah hawh tukin a zawm haw tale hawh tukin tuangtimin hi. Mahnaven ka hilhmi bek bawlin,” ti hi.
21 Mah hangin a zingten Balaam in, a laak kung cu bawlin, Moab hotu tei lakah hawh hi.
Balaam le A Laak
22 Balaam a hawh hangin Pathian a thinuk hi. Balaam cu a umlawhpa nih ten zui haw a, a laak khungthahin, a hawh laihtakin, a hawhnak kham tukin Topa i vancungmi pa khat a maiah ding hi.
23 Balaam i laak in, ngalnam cawi vancungmi pa khat lampi ah a din cu amuh ten lampi pen pialin, ham lakah hawh hi. Balaam in, a laak cu vatin, lampi ah kiktik hi.
24 vancungmi cu lampi cawngciknak, sabit huan pa nih laklawh, suangtep pang tian munah ding hi.
25 A laak in vancungmi amuh ten dawkin, Balaam i ke cu suangpeek humah ngialcih hi. Balaam in, a laak cu vat lehleu hi.
26 Vancungmi cu a maiah hawh leleu in, ketdun theih ngawlnak lampi cawngciknak munah ding hi.
27 Vancungmi amuh ten a laak cu bok hi. Balaam in, a thinsup thei ngawlin a laak cu a ngolh tuah vat nek hi.
28 Topa in, laak cu awntik a, Balaam lakah, “I ka bawl hangin kaw vei thum tian kei na vah?” ti hi.
29 Balaam in, a laak lakah, “Ummaihnak thongin, kei na man hangin hi. Ngalnam ka keng bang a hin, atu loli in sat hum tuk na veng,” ti hi.
30 Laak in, “Na nunsungah tuni tianin, na khun lelengmi laak leleng hi ma ing maw? Tu bangin ti awng ing maw?” ti hi.
“Ti awng ma ci,” tin Balaam in don hi.
31 Topa in, Balaam i mitvaktikin, vancungmi pa khat a ngalnam tuah dingleng cu a muh ten Balaam cu lei ah bok hi.
32 Vancungmi in, “Ita hi ti bangin na laak cu vei thum tian vat cim? Hi lamah hawh tukmi kha ma navecin, na hawh hangin na lampi kham ing.
33 Na laak in, mu in vei thum tian pial hi. Mahti bangin a pial ngawl a hin, na laak cu khawih tung a, nangmah saw that zo tung,” ti hi.
34 Balaam in, “Sual zo ing. Ka lampi khamin, ka lampi a, na dinlam ka theih ngawl hang hi. Hi lam ka hawh hi, na lungkim ma tale innah kik tung,” tin vancungmi lakah ti hi.
35 Mahnaven vancungmi in, “Hi tei lakah hawhin hi; mahnaven hilh tukin ka tihmi bek hilhin,” ti hi. Mah hangin Balaam cu amah samtu tei lakah hawhleh hi.
Balak In Balaam Muak
36 Balak in Balaam hung hi tih, a zak ten hawhin, Moab ngamngi Arnon Ngunpi mawk a, um Ar khua pen muak hi.
37 Balaam lakah, “Zawm li naveng itakaw na hun ngawl? Laksawng thangkai pia thei tukma tih na ngaihsut hang maw?” tin ti hi.
38 Balaam in, “Heng zo toh ma ing maw? Mahnaven atu-in hilh theihnak imah nei mang hi. Pathian i a hilhtikmi bebek hilh tung,” ti hi.
39 Mah hangin Balaam cu Balak tuah Huzoth khua ah hawh haw a,
40 Balak in khui le tuu ngo in biakpiaknak bawlin, a cik khenkhat cu Balaam le amuh tuah a ummi hotu pia hi.
Balaam Otmi Vei Khatnak
41 A zingten Balak in Balaam cu Bamoth Baal mualah hawhpih hi. Mah laih pen Balaam in Israel mi honpi umnak hempoh cu mu thei hi.