19
Khuila San Kangvam
1 Topa in Moses le Aaron lakah,
2 a nuailam a, daan cu Israel tei lakah piak tukin thupia hi: sonbang ngawlmi le na a dek laih ngawlmi khui la san hunpih haw henna,
3 thiampi Eleazar lakah pia haw hen. Ngiahbuk pualamah tulpihin, Eleazar maiah ngo haw tuk hi.
4 Eleazar in, a thi khenkhat cu la in Puanbuk lamah a khut mikawk tuah vei salih ten theh tuk hi.
5 A cik venghawngin, a vun le a taksa khal, a thi le a sungngil tuah thiampi mitmuh cilcelin haal khawng hi tuk hi.
6 thiampi in sidar thing, hyssop thing kak le puan san la tuk a, mei sungah hak tuk hi.
7 Mah nungten a puan sawpin, ti a bual nungten ngiahbukah kikleh tuk hi. Mahnaven mah taklam tian cu mi thiangtho ngawl hi tuk hi.
8 Khui a ngo tu pa vangin a puan sawp tuk a, tuibual tuk hi. Hi naven mah taklam tian mi thiangtho ngawl hi bok tuk hi.
9 a thiangthomi pa khat pa in khui san i kangvam cu la in, ngiahbuk pua lam mun thiangtho ah koih tuk hi. Mahmi cu Israel miten thianthohnak tukin tui a man haw ten mah tui thianthohnakin mang haw tuk hi. Mahmi cu sual thianthohnak tukin halmi hi.Ref 19:9 Heb 9:13;
10 Mah kangvam a latu in, a puansawp tuk hi. Mahnaven mah taklam tian mi thiangtho ngawl hi tuk hi. Hi daan cu Israel mi hihen, a lak haw a, um ngamdangmi hihen, kumkhua in, a zui haw tukmi hi.
Miluang A Zen Haw Ten
11 Mi luang a zentu cu ni salih sung mi thiangtho ngawl hi tuk hi.
12 Thianthohnak tuk tui tuah ni thumnak ni le ni salihnak ni-in, thianthohdun tuk a, mahten mi thiangtho suak tuk hi. Mahnaven ni thumnak ni le ni salihnak ni-in, a thianthohdun ma tale mi thiangtho ngawl hi tuk hi.
13 Mi luang a zentu cu thianthohnak tui a leihdun ma tale mi thiangtho ngawl hi leleng tuk hi. Topa i thutep koihnak Puanbuk cu nawngkaitik a hih hangin, amah cu Topa i mihing lakah sialcih hi tukma toh hi.
14 Mi pa kha khat a deubuk pen a thi tale, a thih laihin, a deubuk sung a, ummi hihen, a pua lam pen a tummi hihen ni salih sung mi thiangtho ngawl hi haw tuk hi.
15 Sin nei ngawlmi palang le beel vang thiangtho bok haw ma hi.
16 Mahti bangbokin ngiahbuk pua leu ah mi pa kha khat thih sia in hihen, amahno thi cawmmi hihen, mah luang a zentu cu ni salih sung mi thiangtho ngawl hi tuk hi. Mihing nguh hihen, mihing khan hihen, a zentu cu ni salih sung mi thiangtho ngawl hi tuk hi.
17 Hiti bangin thianthoh ngawlnak a um ten sualthian lehnak tukin halmi khui san i kangvam cu la in, beel sungah a koih nung haw ten tui thiang leih haw tuk hi.
18 A masa in, a thiangthomi, mi pa khatin hyssop thingkak kak khat la in, mah tui sungah nim tuk hi. Ngiahbuk le a sung a, um na hempoh le mihingte cu theh khawng tuk hi. A nungten a thiangthomi, midang pa khatin tui cu la in, mi nguh, mi luang le khan a zentu cu theh tuk hi.
19 a thiangthomi, mi pa kha khatin ni thumnak ni le ni salihnak ni-in, mah tui tuah mi thiangtho ngawl cu theh tuk hi. Ni salihnak ni-in, mahpa cu thiangthotik tuk a, puan a sawp nungten tuibual tuk a, taklam nitum ten mi thiangtho in suak tuk hi.
20 Mi pa kha khat cu mi thiangtho ngawl hi na pi in, thianthohnak tui tuah ti a bual ma tale thianthohtikmi a hih ngawl hangin mi thiangtho ngawl leleng hi tuk hi. Mah bang mihing cu Topa i Puanbuk a nawngkaitik hangin Pathian i mihing pen sialcih hi tukma toh hi.
21 Hi daan cu a kumkhua in, na zui tuk uhmi hi. Thianthohnak tui a thehtu vangin a puansawp khawng tuk hi. Hi tui a zentu cu taklam tian mi thiangtho ngawl hi tuk hi.
22 Mi thiangtho ngawl i zen mi pawpoh cu thiangtho ngawl hi tuk a, kua hei hihen mahmi a zentu pawpoh cu taklam tian mi thiangtho ngawl hi tuk hi.