16
Korah, Dathan le Abiram Ten Langpang Haw
1-2 Levi hinnam sung pen Kohath i unau pih Izhar i capa Korah cu cipduntik zetin Moses langpang hi. Amah cu Reuben hinnam Eliab i capa pa nih Dathan le Abiram, Peleth i capa On ten zui haw in, mipi tei tenmi mi minthang Israel mi za nih le sawm nga vangin zui haw hi.Ref 16:1-2 Jud 11;
3 Moses le Aaron maiah hung haw a, “Luan leita uh ci! A venghawng uhin Topa ta hung hi. Topa cu a venghawng uh lakah um hi. Ita Topa i mihing tei humah na cuangcung theihnak uh?” tin zuam haw hi.
4 Moses in mah thu a zak ten leihumah bokin, thungen hi.
5 Korah le a nungzuitu tei lakah, “Zingten Topa in ama mihingte cu ciangtik tuk hi. Ama mihingte le ama ca in, a tensa mite cu biaklandawhah hungtik tuk hi.
6-7 Zingten zingtungno in nangmah le na nungzuitu ten mei laknak kuang hunpih unna, meiling la in, a humah namtui na koih nung uhten biaklandawhah hunpih un hi. Topa in, akua teng him tih cu mu tuk hung hi. A val leita cu nangmuh Levi mite hi saw uh ci” tin ti hi.
8 Mah hum pen Moses in Korah lakah, “Levi capate ngai un!
9 A ma elah na hun theihnak tukin le Topa Puanbuk sungah nadektu na hihnak tukin, mipi ca in, na nadehnak tukin, Pathian in Israel mipi sung pen a dangno in, a tennak hi thu neu in maw na ngaihsut uh?
10 Topa in ama elah nektu tukin nangmah le Levi mite teng zo toh hi. Atu-in thiampi nadeh la tum lehleu uh ci!
11 Aaron hum a, na phuk uh hi a ngangai in, nangmah le na nungzuitu ten Topa langpang hi uh ci,” ti hi.
12 Moses in Dathan le Abiram cu sam naven, “Hung tukma ung.
13 Hilai ngamkhing le ngamko lakah thi tukin Izipt ngam, khuinawi le khuaihum tuah a dimmi ngam pen na tulpih hi tawk toh ma maw? Nangmahno bawi upa in keimu humah na bawldun nuam lai?
14 Khuinawi le khuaihum tuah dim ngam cu henpih ngawlin sa le sabit huan vang ka co tukin pia ma ci, a zol tuk bek tum li thong kha ma cim? Hung lalam tukma ung,” tin ti haw hi.
15 Moses cu a thin pulhangin, Topa i lakah, “Himi tei bawlmi biakpiaknak cu sang pahsun. A laak haw pa khatno hei laksak awng mang, ka bawlsiatmi pa khat hei umma laih,” ti hi.
16 Moses in Korah lakah, “Zingten nangmah le a zuitu mihing za nih le sawm nga cu Topa i puanbukah hung un hi. Mahlaiah Aaron vang hung bok tuk hi.
17 Mei laknak kuang hunpih tek unna, a humah namtui na koih nungten Topa i mitmuhin pia un hi” ti hi.
18 Mah hangin mei laknak kuang cu hunpih tek haw in, meiling a koih nung haw ten a humah namtui cu koihin, Puanbuk kongkaah Moses le Aaron tuah ding haw hi.
19 Korah in mipi cu samkhawmin, puanbuk kongka ah Moses le Aaron lamhekin, ding haw hi. Thakhat thu in, Topa i huham cu vaknak tuah mipi tei lakah langin,
20 Moses le Aaron lakah Topa in,
21 “Nohte nunglamah kik unna, hite hi lumcop loli in siatsuah khawng tung,” ti hi.
22 Mahnaven Moses le Aaron cu leihumah bok khupin, “Maw Pathian aw, nang cu nunnak hempoh i bulpatnak ci. Mi pa khat a sual ten mipi tei humah na thinuk tuk cim?” tin ti haw hi.
23 Topa in Moses lakah,
24 “Mipi cu Korah, Dathan le Abiram tei deubuk pen thawn tukin na hilhin,” ti hi.
25 Moses cu Israel hotu ten zui haw in, Dathan le Abiram lakah hawh haw hi.
26 Mipi lakah, “Hi mi suaksual tei deubuk pen tai un, a na haw hei zen kha pahsuh un, mahma tale, a sual haw hangin amuhte tuah nohte vang siatsuah khawng hi tuk uh ci,” ti hi.
27 Mah hangin Korah, Dathan le Abiram tei deubuk pen kongka ah ding haw hi.
Dathan le Abiram cu a zi le ca tuah tul haw a, deubuk kongka ha ding haw hi.
28 Moses in mipi tei lakah, “Hi ti bangin bawl tukin Topa in hah hi. Keima deihnak hangin ka bawlmi kha ma hi, tih cu thei tuk uh ci.
29 Hi mihingte hi Pathian lak pen bawlsiatnak tawk ngawlin amuhno a thi haw tale Topa i hahmi hi tuk mang hi.
30 Mahnaven leihum mihing tei theih awng ngawlmi nate Topa in bawlin, leipi cu kehin, a neihmi venghawng tuah thon khawngin, a nungcungin mithi khua Sheol note 16:30 Sheol tihmi cu Israel miten leinuai khuathimnakah mithi um haw hi tin upnak nei haw in Mithi khua tihnak hi. ah a hawh haw tale hi mihing ten Topa a lawl haw hangin hi tuk hi, tih thei tuk uh ci,” ti hi.
31 Hih thute a son cengbek ten Dathan le Abiram a dinnak haw lei cu khi kehin,
32 Amuh le a innkua le Korah nungzuitu cu a van neih haw hempoh tuah thon khawng hi.
33 nungcungin, a thil haw tuah mithi khua ah tum hawta hi. A hum haw a, lei cu cih lehin pai hawta hi.
34 A kah haw le taunak haw mahlai elkim a, um Israel miten a zak haw ten, “Tai un, lei in thon khawng bok tuk hi,” tin au tawtok haw hi.
35 Topa in mei alh khiasukin, namtui biakpiaknak a bawltu za nih le sawm nga cu kangtum khawng haw hi.
Mei Laknak Kuang
36 Topa in Moses lakah,
37 “Thiampi Aaron i capa Eleazar cu hilh inna, mei laknak daal kuang cu a thiangthomi a hih hangin, mei a, kangtum tei luang vam umnak pen kuangte cu la in, mei ling cu mun dangah khenkhek khawng hihen.
38 Topa i biaklandawhah piaknak a bawl haw ten hi kuangte cu na thiangtho in suak haw hi. Mah hangin a sual haw hangin thihnak a thuaktu tei mei a laknak kuang cu la inna, pakan bangin a pek tian suniknek inna, biaklandawh khuhin bawlin hi. Israel miten ngallinnakin mang haw tuk hi,” ti hi.
39 A tih bangin thiampi Eleazar in mei laknak kuangte cu pakan tuah supeek a, biaklandawh khuhin mang hi.
40 Hihi cu Aaron sial ngawl kuamah Topa i biaklandawhah hungin namtui haal thei haw tukma hi, tih ngallin piaknak hi. A bawltu a um haw tale Korah le a mihingte bangin siatsuahnak tawk haw tuk hi. Moses lakah, Topa i thupiakmi bangin a humlam a bawl tuk mite cu Eleazar in bawl khawng hi.
Aaron In Mipite Pan
41 A zingten Israel mipi cu Moses le Aaron i humah phu haw in, a lak hawah, “Noh ten Topa i mihing khenkhatte that uh ci,” ti haw hi.
42 Tawkdun khawm haw in, Moses le Aaron humah a phuk nung haw ten Puanbuk lam cu zo haw a, Meingo in Puanbuk cu tuamin, Topa i huham vaknak cu mu haw hi.
43 Moses le Aaron cu hawh haw a, Puanbuk maiah dingin,
44 Topa in, a lak hawah,
45 “Hi mihing tei lak pen nunglamah kik un, manlang zetin siatsuah tung hi,” ti hi.
A pa nih haw in, a mai lei tawngkha tianin lu kun haw hi.
46 Moses in Aaron lakah, “Na mei laknak kuang cawi inna, a sungah biaklandawh meiling koihin, mah meiling humah namtui hak sukin hi. Mipi tei lakah man lang zetin hawh inna, amu ca in thianthoh biakpiaknak bawlin hi. Nawhkhahin hi! Topa i thinuknak pan zo a, zavaat heng zo,” ti hi.
47 A tih bangin Aaron in bawlin, a mei laknak kuang hunpihin mipi lakah tai hi. Zavaatin, na zo haw tih amuh ten manlang zetin meiling sa humah namtui cu hakin, mipi ca thianthoh biakpiaknak bawl hi.
48 Mahmi in zavaat nat cu cawltik a, mithi le a nungmi tei laklawhah Aaron cu ding hi.
49 Korah ngal hangin a thi mi sial ngawlin, hi zavaat nat hangin mihing thawng sawm le thawng li le za salih thi haw hi.
50 Zavaat nat a colh nungten Aaron cu Puanbuk kongka el Moses lakah kikleh hi.