12
Miriam Dantatnak
1 Moses in Kush numei a huai hangin, Hazeroth ah a um haw laihin Miriam le Aaron ten sonsia haw hi.
2 A muh ten, “ Topa cu Moses lak bek tawnin maw thu a hilh? Keimu lakah tawnin hilh bokma maw?” ti haw hi. Topa in mah ti bangin a tih haw cu za khawng hi.
3 Moses cu mi niamkhiat zetmi hi a, leihumah amah bangin mi niamkhiat um haw ma hi.
4 Thakhat thu in, Topa in, Moses le Aaron le Miriam lakah, “Na pa thum uhin ka umnak Puanbukah hung hem un,” ti hi. Hawh haw a,
5 Topa cu meingo zial sung pen hungsuk a, Puanbuk kongka tumnakah dingin, “Aaron! Miriam!” tin sam hi. A pa nih i maiah tulin,
6 Topa in, “Ka awn hi cing leng un! Nangmu lakah profet a um haw ten a lak hawah langin, a mang hawah thu hilh ing.
7 Mahnaven Moses cu ka hinnam Israel mite cingkhawitu in dehvo ka piak hangin,Ref 12:7 Heb 3:2;
8 ama lakah, maicang hekdun loli in awn ing hi; bawlcawmin awn mang, ciangzet le taituang zetin awn ing. Ka mel cawmin mu zo hi. Moses cu iti bangin sonsia thei tuk nge uh cim?” tin ti hi.
9 Topa cu amu humah thinuk thah zetin, hawhsanta hi.
10 Meingo cu thakhat thu in, Puanbuk pen a thawn ceng bek ten Miriam cu phaaknat tuah dimin, a vun cu vuk bangin ngo khawng hi. Aaron in Miriam a zoh ten phaaknat tuah dim hi tih cu mu hi.
11 Aaron in Moses lakah, “Hu hehpih zal inna, silhah na pha ngawl bawl zo nave ung a, ka sualman uh thuaktik zal pahsun.
12 A thi sa in, a nui pum sung pen tulin, a taksa khenkhat a muat khawng zo mi, nauno bangin Miriam cu suaktik zal pahsun,” tin kun li hi.
13 Mah hangin Moses in Topa lakah kapthah samin, “ Topa aw, hehpihnakin Miriam cu damtik zalin hi,” tin ngen hi.
14 Topa in, “Tehkipnakin, a pa in, a canu i mai cil a siak a hin, ni salih sung zakca in um tuk si mei? Mah bangin na ngiahnak uh pua leu lamah Miriam cu ni salih sung suah unna, mah nungten laleh un hi,” tin ti hi.Ref 12:14 Mipum 5:2-3;
15 A tih bangin Miriam cu a ngiahnak haw pualeu lamah ni salih sung suah haw in, a lak kikleh laklawh mipi cu thawn ngawlin um haw hi.
16 Mahnung ten Hazeroth mun pen tul haw in Paran ngamkhingah ngiahnak sam haw hi.