9
Gibeon Ten Joshua Zol
1 Joshua i nehnak thu cu Jordan pen nitumnak lam ummi kumpi le mualhum a, ummi hihen, munlawn a, ummi hihen, Mediterranean tuipi mawk a, ummi, sak lam pen Lebanon ngam a, um tianin thei khawng haw hi. Hit mi, Amor mi, Kanaan mi, Periz mi, Hiv mi le Jebus mitei kumpi ten a theih haw ten,
2 Joshua le Israel mite do tukin khawmdun haw hi.
3 Mahnaven Joshua in Jerikho le Ai khua tei humah a bawl mite cu Hiv miphun Gideon khua miten a zak haw ten
4 Joshua cu zol tum haw hi. Khaudip balmi tuah an thunin, dah copmi savun thawl tuah sabit than mi cu laak puatik haw hi.
5 Dah copmi kedam bunin le puansia silhin a sunsiah ket haw mi cu a ko sa mi le a baalbu mi cangho nguak cang hi.
6 Gilgal a ngiahbukah, hawhin Joshua le Israel tei lakah, “Ngam khawla pi pen na lak uhah thutiamnak bawl tukin hung ung hi,” tin ti haw hi.
7 Mahnaven Hiv mitei lakah Israel miten, “Lamnaino ummi ngen na hi uh tale itin kaw thutiamnak a bawl theih tuk uh?” tin ti haw hi.Ref 9:7 Suah 23:32; 34:12; Daan 7:2;
8 Joshua lakah “Bawipa kohte cu na sal ung hi,” tin ti haw hi.
Joshua in “Akua nge uh cim? Ilai pen hung kam uh ci?” tin dong hi.
9 Amuh ten “Na Topa Pathian i bawl mite ka theih uh hangin, khawlapi pen hung ung hi. Izipt ngam a, a bawl mite hihen,
10 Jordan nisuahnak lam a, um Amor miphun tei kumpi pa nih, Heshbon kumpi Sihon le Ashtaroth a, um Bashan kumpipa humah a bawlmi nate hihen thei khawng ung hi.
11 Keimuh hotu le ka ngammi hempohin, lam-an keng unna, Israel mite tawkta un; kohte cu na sal ung hi, mah hangin lemdunnak thutiam bawl zazal un, tin hilhtikmi ung hi.Ref 9:11 Mipum 21:21-35;
12 Ka ken uhmi cangho zo un, nangmuh tawk tukin ka inn pen ka tul uhten lum laih hi. Mahnaven tu cu ko in baalbu khawng zo hi.
13 Sabittui thunnak savun thawl vang zo un. A thak hi naven atu-in bal khawng zo hi. Ka puansilh uh le ka kedam uhte hi zo un. Lam khawlazet pen ka hun uh tak sia khawng zo hi,” tin ti haw hi.
14 Israel miten Topa i deihnak zei masa ngawlin a lam-an ken haw mi cu sangin ei haw,
15 Joshua in lemdunnak bawlin thah a thuak ngawlnak haw tukin amuh tuah thutiamnak bawl haw hi. Israel hotu ten mah thutiam cu khotik haw hi.
16 Thutiam a bawl nung ni thum ten Gibeon mite cu lamnaino um haw tih Israel miten thei haw hi.
17 Mah hangin Gibeon mitei umnak Gibeon khua, Khefirah khua, Beeroth khua le Kiriath Jearim khua ah heng haw hi.
18 Mahnaven Israel miten Gideon mite cu that tukin hi thei ma toh hi, itahim titale a hotu haw ten amuhte tuah Israel Pathian Topa i minin thutiam bawl zo haw toh hi. Mah thu hangin Israel mipi cu hotu lakah phuciak haw hi.
19 Mahnaven, hotu ten “ Topa Israel Pathian min salin thutepnak bawl zo ung hi. Itih bang hei in amuhte tileh thei ma toh ung.
20 Thu a tep zo toh uh hangin, a khawih uh kul loli hi. A khawih uh ma tale, Pathian in eimuh bawlsia tuk hi.
21 Mah hangin umbok poh haw hen; mahnaven, eimuta tukin thingcomin tuicawi sak haw hen,” ti hi. A hotu tei hilh bangin mipi ten zui haw hi.
22 Joshua in Gibeon mite cu samin, “Ka elno uhah um naven uhcin itakaw ngam khawlapi pen hung ung tin na zol uh?
23 Hi bangin na zol uh hangin Pathian tamsiat mite hi uh ci. Tusun pepanin ka Pathian inn tukin thing talhtu le tui cawitu tukin nadektu sal hi tuk uh ci,” ti hi.
24 Gibeon miten “ Topa in, Moses lakah thupia in hi ngampi cu a venghawngin, na kut sungah pia tukin le hi ngamsung a, ummi hempoh cu thah khawng tukin hilh hi, tih ciangno in thei ung hi. That khawng kawn uh ci tih ka lau uh hangin, hi ti bangin ka tihnak uh hi.
25 Atu-in, na khutsungah um zo ung hi, mah hangin a pha na tih bangin bawl un,” tin ti haw hi.
26 Mah hangin Israel tei thah tuk ngawlin Gibeon mite cu Joshua in hup hi.
27 Mahnaven Topa i biaklandawh tukin le mipi tei ca in, tui cawitu le thingcomtu umlawhin bawl hi. Topa in amah biaknak tukin a tenmi mun hempoh ah nadektu cu tusun tiangin amuhte haw hi.