8
Ai Khua Laknak le Siatsuahnak
1 Topa in Joshua lakah “Na thinsu pahsun, na tha hei nautik pahsun. Na ngalkap hempoh tuah Ai khua ah hawh un. A kumpipa le a mihingte, a khua le a ngam venghawngin, nata hi tuk hi.
2 Jerikho khua le a kumpipa i humah na bawl bangin, Ai khua le a kumpipa i humah bawl tuk ci, mahnaven tutum cu a na le a nganhing cu nangmuhin co un hi. Ai khua cu do tukin tuangtim ham unna, nunglam pen nam un,” ti hi.
3 Mah hangin Joshua le a ngalkap cu Ai khua do tukin ngalling haw hi. Ngalpha tha ngilmi ngalkap thawng sawm thum tengin, zanlam khuathim ten hawhtik hi.
4 A lak hawah Joshua in “Ai khua ngalkhat lamah hawh unna, ngelh un. A khawla leita ah um pahsuh un; thakhatin nam tukin ngalling un.
5 Kei le ka lakah a ummi ngalkap hempoh ten hi lam pen zuan tuk ung hi. Ai khua ngalkap ten a do haw tale, a masa bang lengin, khuasung pen tul haw tuk hi. Kohte cu nunglamah khintuk ung.
6 Mahti bangin nunglam ka kih uhten keimuh hil tukin a khua zamsan haw tuk hi. Amasa a tai haw bangin tai leleu haw hei, tin ti haw tuk hi.
7 Na ngelhnak mun uh pen tul unna, a khuapi haw cu la un hi. Topa na Pathian uhin, a khuapi haw cu pia tuk hi.
8 A khua haw na lak ceng uhten Topa i thupiak bangin a khuapi cu mei tuah haal un. Hih ka thupiakmi hi zui un,” ti hi.
9 Mah hangin Joshua in, a ngalkap cu zanah hahin, Ai khua pen nitumnak lam Ai le Bethel khua laklawhah ngelh haw hi. Joshua cu a ngiahbuk hawah ngiak bok hi.
10 Joshua cu a zingten zingtungno tho in, ngalkap sam khawm a, Israel hotu tuah Ai khua lamah hawh haw hi.
11 Khuapi kongkhah lamah hawhin, Ai khua saklamah ngiak haw. A ngiahbuk le Ai khua laklawhah luampi pa khat um hi.
12 A ngalkap thawng nga cu Ai le Bethel khua laklawh, Ai khua pen nitumnak lamah ngelhtik hi.
13 Mahti bangin a ngelh haw laihtakin, ngalkap honpi saw cu Ai khua sak lamah um haw hi. Ngaldo tuk a mansa in um haw hi. Joshua cu luam sungah ngiak hi.
14 Ai khua kumpipa in Joshua le a ngalkapte cu a el hawah um tih a theih ten, a ngalkap tuah thakhat tho in, a masa a dodunnak munah Israel mite do tukin Arabah munlawn lamah hawh haw hi. Nunglam pen nam haw tuk tih thei haw ma hi.
15 Joshua le a ngalkap cu nungkik hem haw a, phillawn lamah tai pepel haw hi.
16 Ai khua sung a, um pano hempoh cu Israel ngalkap hil tukin samdun khawng haw in, Joshua le a ngalkapte cu a khua haw pen khawlapi tiang hil pepel haw hi.
17 Israel mite hil tukin pano hempoh thok khawng haw hi, a khuapi cingtu tuk kuamah um haw ma.
18 Topa in Joshua lakah, “Na ceipi cu Ai khua lamah sawhin; hi khuapi cu na khut sungah pia tung,” ti hi. Topa i hilhnak bangin Joshua in, a ceipi cu sawh leng hi.
19 A khut a dan toh bek ten Ai khua nam tukin a ngelh kuh ngalkap cu tul paih haw in, Ai khua cu la haw hi. Thakhatin, mah khua cu mei tuah haal haw hi.
20 Ai khua ngalkap cu nunglam a hek kik haw ten a khua haw pen meikhu van tian kai in mu haw hi. Hampalak ah a taimi Israel ngalkap cu nunglam hekkikin, nase zetin do haw hi. Ai khua ngalkap tei ca in suahcaknak umma hi.
21 Ai khua la in, mei tuah haal zo haw hi tih Joshua le a ngalkap ten amuh haw ten nunglam hek kiklehin Ai khua ngalkap cu that khawng haw hi.
22 Khuapi sung a, umsa Israel ngalkap cu tul haw in, a ngal cu nunglam le mailam pen do haw hi. Israel ngalkap ten kim khawng haw in, a kumpipa sialngawl, mihing pa khat hei suakca ngawlin that khawng haw hi.
23 Ai khua kumpipa cu manin Joshua lakah hawhpih haw hi.
24 Hampalak tian ngal a hiltu Ai khua ngalkapte cu pa khat hei suakca ngawlin Israel ngalkap ten that khawng haw hi. Ai khua sungah kiklehin mah khuasung a, ummi a venghawngin that khawng haw hi.
25 Khua mi hempoh that khawngin, a thahmi pano le numei a venghawngin thawng sawm le thawng nih haw hi.
26 Khua sungmi venghawng ten a thah khawng haw laklawh Joshua in, a ceipi cu Ai khua lam hekin, sawh leleng hi.
27 Joshua lakah Topa i hilh bangin Ai khua sung pen a lon haw mi nganhing le nate cu Israel miten amuta tukin la haw hi.
28 Joshua in Ai khua cu ituk mah ten umnak phaleh tuk ngawlin a haltik hangin, tuni tian khualopin suakta hi.
29 Ai khua kumpipa cu thinghumah khai haw a, taklam tian koih haw hi. Nitum ten Joshua in thupia in, a luang cu thinghum pen a lak nung haw ten khuapi tumnak kongka lampi ah vawk haw hi. A luang humah suangseh haw a, mah suangseh mi cu atu khan tiangin umlaih hi.
Ebal Mual Humah Daan Sial Haw
30 Israel Pathian Topa i ca tukin Joshua in Ebal mualhumah biaklandawh hi.Ref 8:30-32 Daan 27:2-8;
31 Mah biaklandawh cu Topa i nadektu Moses in Israel tei lakah a piakmi Moses Daan laibu sungah a ngat bangin thik hiamnam tuah at ngawlmi suang tuah bawlmi hi. Mah humah meihal biakpiaknak Topa i lakah pia in, pawlkom biakpiaknak vang pia bok haw hi.Ref 8:31 Suah 20:25;
32 Mahlai munah Israel tei mitmuhin Moses ngatmi Thukham cu Joshua in suang humah ngan hi.
33 Israel mi venghawng a hotu, a bawi, thukhentu le amu lak a, um ngamdang mite tuah Thutiam Kuang zawngtu Levi mi thiampi mai hekin Topa i Thukam Kuang pang lang veve ah ding haw hi. Israel mi khenkhat cu Gerizim mual nunghekin ding haw a, khenkhatte cu Ebal mual nunghekin ding haw hi. Israel mite muicu piak a hih nungten mahti bangin ding tukin Topa i nadektu Moses i thupiakmi hi.
34 Thukham laibu sung a, ngatmi bangin muicu le tamsiatnak thu tuah Thukham cu Joshua in nging zetin sial hi.
35 Numei, naupang le miphun dangte telin Israel mi honpi maiah Moses i thupiakmi cu pa khat hei pel ha po ngawlin Joshua in sial khawng hi.Ref 8:35 Daan 11:29; 27:11-14;