14
Jordan Nitumnak Lam Ngam Sem
1 Israel tei lakmi Kanaan ngam cu thiampi Eleazar, Nun i capa Joshua le Israel miphun hotu ten Israel tei lakah sem haw hi.
2 Moses lak a Topa i thupiaknak bangin Israel hinnam nam kuah le a lang tei co tukmi Jordan nitumnak lam ngam cu aisannak bawlin sem haw hi.Ref 14:2 Mipum 26:52-56; 34:13;
3 Jordan nisuahnak lam ngam cu Moses in Israel hinnam nam nih le a lang tei lakah pia zo hi; mahnaven Levi mitei lakah ngam pia ma hi.Ref 14:3-4 Mipum 32:33; 34:14-15; Daan 3:12-17;
4 Josef i casuante cu khen nihin khendun haw hi. Manasseh le Efraim hi. Levi mite cu co mi ngam nei haw ma. Leingam ai-in umnak khuapi co mi nei haw hi, a khui haw a nganhing tei ca in co mi ngam nei haw hi.
5 Moses lakah Topa i thupiakmi bangin Kanaan ngam cu Israel miten sem haw hi.
Hebron Cu Kaleb Lakah Pia
6 Ni khat cu Judah mite Gilgal a, Joshua umnakah hung haw hi. Keniz mi Jefunneh i capa Kaleb in Joshua lakah, “Pathian mihing Moses lakah nangmah le keima thu Topa in Kadesh Barnea munah a hilhmi cu thei khawng zo ci.Ref 14:6 Mipum 14:30;
7 Kadesh Barnea pen hi ngam vilveng tukin Topa i nadektu Moses in, a hah ten kum sawm li mi ing. Ka hawh nungten cel zetin Moses lakah theitik ing.Ref 14:7 Mipum 13:1-30;
8 Keimah tuah a hawhtu ten mi honpi thinsutik haw hi. Mahnaven kei in cangkim zetin Topa ka Pathian i thu cu zui ing.
9 Mahnaven Moses in, Topa ka Pathian i thu cu cangkim zetin, na zui tak atu na hawhnak ngam hi nangmah le na casuan ten co tuk uh ci,” ti hi.Ref 14:9 Mipum 14:24;
10 Mahnaven, ngaisung bokin! Hiti bangin Topa in Moses lakah a hilhmi cu kum sawm li le kum nga kim zo hi. Mah hun laihin Israel mite cu phillawn lak a hawh laihtak haw hun sung hi a, Topa in damno in cing leleng hi. Tun zo hemin! Kum sawm liat le kum nga kim zo naveng
11 Moses i hah laih bangin ngilzet laih ing. Ngaldo tukin hihen, a dang nadeh tuk ka neihmi ah hei hihen, ngilzet laih ing.
12 Atu-in, a Topa uh i tepsa bangin, hih mualhum ngam cu pia zalin hi. Anak mi, mi muanhuaite cu kulhtian khuapi sungah um haw tin mah hun laihin hilh zo ing. Na lakah um pih tung hi tin, a tepsa bangin ka lakah Topa a um ngangai ten mah Anak mite cu hawlvawk khawng tung,” ti hi.
13 Joshua in Jefunneh i capa Kaleb cu muicu pia in, a co tukin Herbron khua pia hi.
14 Keniz mi Jefunneh i capa Kaleb in Israel Pathian Topa i thu komzetno a zui hangin Hebron cu atu khan tian Kaleb casuan tei ngam hi.
15 Mah laih ngawlin Hebron cu Kiriath Arba khua tin sam haw hi. Arba cu Anak miphun lak pen mi thupibel haw hi.
Atu-in mah ngamah lemdaihnak um hi.