13
Neh Tuk Laihmi Ngamte
1 Joshua cu tekzet toh hi, Topa Pathian in, “Tekzet toh ci; mahnaven ngam lak tuk tampi umlaih.
2 Lak tukmi ngam cu Filistin ngam hempoh le Geshur ngam hempoh,
3 Izipt ngamngi a ummi Shihor ngun pen saklam Ekron ngamngi tian a venghawngin Kanaan mitei ngamin sialcih hi. Filistin mi uktute cu Gaza, Ashdod, Ashkelon, Gath le Ekron khua ah um haw hi. Hanglamah Arvim peng hempoh,
4 Kanaan mitei ngam le Merarah ngun Merarah cu Sidon mitei ngam hi. Amor mitei ngamngi el a um Afek tian;
5 Gebal ngam, nisuahnak lamah Lebanon ngam hempoh, Hermon Mual nuai a um Baalgad pen Hamath mual kawn tian hi.
6 Lebanon mual le Misrefoth Maim laklawh a um Sidon mi hempoh tel hi. Israel miten a nawt bek haw ten hite cu hawlvawk khawng tung hi. Thu ka piak zo toh bangin hi ngam cu Israel tei co tukin khen inna, semin hi.Ref 13:6 Mipum 33:54;
7 Atu pepan a co tukin Israel mi hinnam kuah le Manasseh hinnam a lang tei lakah hi ngam cu khen inna, semin,” ti hi.
Jordan Nisuahnak Lam Ngam Sem
8 Reuben hinnam, Gad le Manasseh hinnam a lang tei co mi ngam cu Jordan ngun pen nisuahnak lamah Topa i nadektu Moses i piakmi ngam cu hi ngam hihi.Ref 13:8 Mipum 32:33; Daan 3:12;
9 A ngam haw cu Arnon Munlawn mawk a ummi Aroer pen luikuam laizang a ummi khuapi le Medeba lawnlai a venghawng Dibon tian hi.
10 Heshbon khua pen ngamuktu Amor kumpi Sihon i ukmi khuapi a venghawng le Ammon ngamngi tel hi.
11 Gilead ngam, Geshur mi le Maakah mitei umnak ngam, Hermon Mual venghawng, Bashan ngam venghawng le Salekah tian tel khawng hi.
12 Ashtaroth le Edrei pen ngamuktu Og kumpi ukmi ngam vang tel hi. Og cu Refaim hinnam lak pen a tang calam hi. Moses in nehin, a hawlvawkmi haw hi.
13 Mahnaven Geshur mi le Israel miten hawlvawk haw ma hi. Israel ngam sungah um haw laih.
14 Moses in Levi hinnam ngam pia ma hi. Itahim titale Topa in Moses lakah a tepsa bangin, Israel miten Topa i lakah meihal a piakmi co haw tuk hi.Ref 13:14 Daan 18:1;
Reuben Piakmi Ngam
15 Moses in Reuben hinnam cu a hinnam haw tekin ngam pia hi.
16 A ngam haw cu Arnon ngun luam laizang a ummi khuapi le Medeba el a ummi munlawn hempoh tel hi.
17 Heshbon le munlawn khuapi; Dibon, Bamoth Baal, Beth Baalmeon,
18 Jahaz, Kedemoth, Mefaath,
19 Kiriathaim Sibmah, munlawn mawk mualhum a um Zereth Shahar,
20 Bethpeor Pisgah mualtuan hempoh, Beth Jeshimoth,
21 munlawn a khuapi dangte le Heshbon a um ngamuktu Amor kumpi Sihon i ukmi khuapi hempoh tel khawng hi. Kumpi Sihon cu Moses in nehin, Midian ngamuktu Evi, Rekem, Zur, Hur, le Reba a um Sihon bawi upate vang nehin, kumpi Sihon khutnuai um ngamuktu haw hi.
22 Israel tei thahmi lak pen Beor i capa, mipol Balaam vang tel bok hi.
23 Reuben hinnam tei ngamngi cu Jordan ngun hi. Hi khuapi le khua neute cu Reuben hinnam innkua tam le dem zo in sepmi hi.
Gad Piakmi Ngam
24 Moses in Gad hinnam vang a innkua haw zo in, a co haw tuk ngam pia hi.
25 A ngamsung hawah Jazer le Gilead peng khuapi hempoh, Ammon ngam khen lang, Rabbah pen nisuahnak lam a um Aroer khua tian,
26 Heshbon pen Ramath Mizpeh le Betonim tian, Mahanaim pen Lodebar ngamngi tian tel hi.
27 Jordan munlawnah Beth Haram, Bethnimrah, Sukkoth, Zafon le Heshbon kumpi Sihon i ukmi ngam a tangmi hempoh tel khawng hi. Nitumnak lamah a ngamngi haw cu Jordan ngun i saklamah Galilee tuipi tian hi.
28 Hi khuapi le khua neute cu Gad hinnam innkua tei co mi ngam hi.
Manasseh Piakmi Ngam
29 Moses in Manasseh innkua khenkhat tei lakah a co haw tuk ngam pia hi.
30 A ngam haw cu Mahanaim pen Bashan peng a venghawng le Bashan kumpi Og i ukmi ngam hempoh le Bashan peng sung a um Jair i khuano sawm luk tel hi.
31 Gilead ngam a lang, Bashan ngamsung Og kumpi i ukmi khuapi Ashtaroth le Edrei tel hi. Hi ngam le khuapi cu Manasseh i capa Makhir i casuan khenkhat innkua tei lak a piakmi hi.
32 Jordan ngun le Jerikho khua pen nisuahnak lam ngam cu Moab munlawnah Moses in sem hi.
33 Mahnaven Levi mitei co tukin Moses in ngam pia ma hi. “Israel i Pathian Topa i lak a, piakmi cu nangmu covo,” ti hi.Ref 13:33 Mipum 18:20; Daan 18:2;