9
1 Ka lu hi, tuinak bang ahi ahin,
ka mit hi hitui ciktui tulnak
bang ahi ahin deih sing!
Sun le zanin kap tung,
a thah sa haw
ka mitei ca in kap tung.
2 Phillawnah ngiahbuk
nei ahin awi sing?
Ka mihingte zamsanin
um tuk naveng!
A venghawng haw in muantak
um haw ma,
Mi suam mangmi ngeh haw hi.
3 A lei haw tale zolthu son tukin
mansa leleng,
Thudik hi ngawl, zolthu saw in,
Topa in, “Ka mihing ten,
thil sual
pa khat nung pa khat bawl haw hi.
A Pathian haw in ngaisung
4 Akua hei in, a ngualcam cu
ngalling zetin, a phial kul,
A unaute hei muan theih haw ma.
Itakaw titale unau hempoh ten
Jakob bangin mizol mang haw hi.
Akua na bangin
a ngualcam sonsia khawng haw hi.
5 A venghawng haw in,
a ngualcam pui sual tek haw a,
kuamah in thuman sonleh
haw ma toh.
A lei haw cu zolthuson hilhin,
thil sual a bawl haw hei
tawp haw ma.
6 Siatnak pa khat nung pa khat
bawl haw hi.
Mi a zolnak haw cu
tawp haw ma.
Topa in, “Ka miten
nunghek zo haw,” tin ti.
7 Mah hangin Cungnungbel Topa in,
“Ka mihingte hi thik tui bangin
huan tui in, khingkhai tung.
Ka mihing ten thilpha ngawl
bawl zo haw hi.
Itin kaw ka tih cuang tuk hi.
8 A lei haw cu thihnak thalcang bang.
Zolthu bebek son hi.
A innnel tei lakah awn pha
awn haw naven,
a ngangai titale thangsiah haw hi.
9 Hitih bang a bawl haw hangin,
bawlsia tuk mang maw?
Hitih bang miphun tei humah
phula tuk mang maw?
Keimah, Topa in awn zo ing,”
tin ti hi.
10 Keimah in, “Mual le luam ca in,
mithi ngai in kap tung;
Lenkolh ca in tau tung,
Itahim titale ko khawng
zo haw;
Mahlai ah kuamah hawhleh
haw ma toh.
Khui ngung thawmnging hei
thang lehma toh.
Vano le ngamsate hei
tai khawng haw in,
taivawk khawng zo haw toh,”
tin ti ing.
11 Topa in, “Jerusalem cu
khualopin bawl tung,
Cingne tei umnak munin;
Judah khuapi cu
phillawnin suak haw tuk hi.
Kuamah i um nuam ngawlnak
munah,” tin ti hi.
12 Donleh ing a, “ Topa, itakaw hi ngam hi kua mah zin nuam ngawlmi ah suakin, siatsuah khawngmi le phillawn ngamko bangin a can? Micip akua bekin hi bang thu a theitum um haw maw? Akua in kaw hi bang thu a theitum tuk? Midang a hilh theihnak tuk akua i lak bekah hilhciang awng a cim maw? tin dong ing.”
13 Topa in, “Ka mihing ten ka piaksa ka thuhilh mite a zamsan haw hangin hitih bang a cannak haw hi. Ka thu ngai ngawlin ka hilhmi hei zui haw ma.
14 A lungmu haw khoh mah takin a pupa tei zilh bang bokin Baal milim saw bia haw pohpah.
15 Mah hangin Cungnungbel Topa Israel i Pathian keimah in ka bawl tukmi hi ngai hemin hi. Ka mihing tei eih tukin a kha mi thingkung pia in, a in haw tukin thihsi pia tung.
16 Amuh le a pupa haw ten hei hihen a theih awng haw ngawlmi, miphun tei lakah lengkektik khawng tung a, siatsuah khawng a hih laklawh amuh dotu tukin ngalkaptik tung,” ti hi.
Jerusalem Ten Bopnak Ngen
17 Cungnungbel Topa in,
“Thil a piangmi hi
ngaisung hem un!
Mithi ngaitute sam hem un!
Mithi vuinak la a satu
numeite sam hem un!” tin ti.
18 Mipi ten, “Hilh unna,
manlangin hung haw henna,
keimu ca in mithi vuinak la
saksak haw hen.
Ka hitui uh bung luluihin,
ka kahnak uh ka mit uh
bum khawng tianin,” ti haw hi.
19 Zion kahnak thawm hi
ngai hem un!
“Lalthong khawng zo hung hi.
Zakca zetin um zo hung,
a ngam uh taisan nung.
A inn uhte phiat khawng
hi zo toh,” tin ti haw hi.
20 Keimah in, noh numeite,
Topa i awnkam
ngai hem un!
A hilhmi hi phano in
ngai hem un!
Na canu uhte mithi ngaihdan
hilh un hi.
Na ngualcam uhte
mithi vuinak la sakdan hilh un hi.
21 Thihnak hi a tukvelh uh pen
tumin, a kumpi inn uh tian
heng zo hi.
Khuasung lampi ah naupangte
a that tukin le tawhdun khawmnak
dawlah tangvalte
pailaltik tukin
heng zo hi.
22 “Lo sung a, thehmi
ekdawm bangin;
Miluangte cu mun hempoh ah
thehkeh haw hi.
Ankung cawmtu ten cangatin,
a zam tahaw mi,
kuamah i cop nuam ngawl
a zalh phengphungmi
cang bangin zam haw hi.
Hi bangin hilh tukin,
Topa in
23 Topa in,
“Micip ten a cihnak haw
ultung pih pahsuh hen,
Mi ngil ten a ngilnak haw
tuangkhawng pih pahsuh hen;
Mihau ten a hauhnak haw
tuangkhawng pahsuh hen;
24 Kua hei hihen tuangkhawn
a nuam tale,
keimah a theihnak le
keimah a theihciannakah
tuangkhawng saw hen.
Itahim titale ka itnak cu
tawp tih nei ngawlin,
A dikmi le a manmi
bawl leleng ing.
Hitih bangte hi
ka lungdamtiktu haw hi.
Keimah, Topa in
hilh zo toh ing,” ti hi.Ref 9.24 1Kor 1:31; 2Kor 10:17;
25-26 Topa in, “Ka dantatnak tuk hun a hen ten; Izipt mi, Judah mi, Edom mi, Ammon mi, Moab mi le sam comno in, a mettunote 9:25-26 Sam comno in, a mettu tihmi cu mah hun laihin miphun khenkhat ten a pathian haw upatnakin an sam haw met mek haw hi. Mahmi cu Israel miten kham haw hi. phillawn ngam a umte siatsuahnak hun heng tuk hi. Hite hi vunceptan haw naven vunceptan nungcang bangin ka thukham cu zui haw ma. Himi ten hihen, Israel miten hihen, kuamah in ka thukham zui haw ma hi,” tin ti hi.