50
Babilon La Haw
1 Topa in, Babilon khuapi le a mihing tei cungcangah hi bangin hilh hi:Ref 50:1-51:64 Isa 13:1-14:23, 47:1-15
2 “Mi namkim tei lakah
hi thuthang cu hilh inna,
than pepelin hi.
Melciknak pia inna,
tangau pihin hi,
khunpih thong pahsun.
Babilon caksuk zo hi,
A Marduk pathian cu
keh khawng zo hi!
Babilon milimte cu
zakca in um zo haw hi,
Ningdelhhuai a milimte cu
ngawizan bilhbelh khawng
hi zo hi.
3 “Saklam pen hinnam pa khat Babilon do tukin hung zo a, Babilon cu phillawnin suaktik tuk hi. Mihing le ngante tai khawng haw tuk a, mihing kuamah um haw tukma toh,” ti hi.
Israel Kihlehnak
4 Topa in, mah hun a hen ten Israel le Judah mite hung haw tuk a, kei a Pathian haw cu kapthahin zeileh tutun haw tuk hi
5 Zion hawhnak lampi dong haw tuk a, mah lampi pen hung haw tuk hi. Kumkhua ca in thutepnak cu keimah tuah bawl haw tuk a, ituk mah ten khelleh haw tukma toh hi.
6 “Ka mihingte hi tuucingtu ten mualsang hampa lakah a paihtik haw mi tuu bang haw hi. A paimi tuu bang haw hi. A paimi tuu bangin mual pa khat nung pa khatah vakin, a inn haw zuancawmin theileh haw ma toh hi.
7 Amutu hempoh ten do in, that haw hi. A ngal haw ten, ‘ Topa lakah a sual haw hangin hiti bang thil a bawl uhmi hi sual ma hung hi. A pupa haw ten Topa muang haw; amuhte vang hi Topa i muantakin um tukmi hi haw naven!’ ti haw hi.
8 “Israel mite, Babilon pen tai un. Hi ngam hi taisan unna, a tai masabeltu hi un!Ref 50:8 Mang 18:4
9 Saklam a um miphunte tokpil tung a, Babilon dotik tung hi. Sakap thiamte haw hi, thacang tuah mui a bat haw ten khelh awng ngawlte haw hi.
10 Babilon cu suamin, a suamtu ten a deihmi haw hempoh la khawng haw tuk hi. Keimah, Topa in hilh zo ing,” ti hi.
Babilon Caksuknak
11 Topa in, “Babilon mite, ka miphunte suamin na lungdam thatui uh hi. Cangngawitu khuicang bangin le a hawh thahin, a hammi cipuh cang bangin hawh uh ci.
12 Mahnaven nangmu khuapi nasezet cu, zakca le mualpho in um tuk hi. Babilon hi miphun hempoh lak pen a nawmtambel miphunin suak tuk hi. Ngamko le tui um ngawlnak phillawnin suak tuk hi.
13 Ka thinuknak hangin Babilon ah mihing kuamah um haw tukma. Calubuakah suakin, a elah a hawhtu hempoh cu lamdangsa in amthong haw tuk hi.
14 “Thalkap thiamte, Babilon do tukin mansa in um unna, kil khawng un. Na thalcang uh tuah Babilon cu kap un. Itahim titale Topa keima humah sual haw hi.
15 Babilon khuapi kil tukin ngaldo au in au un. Babilon sung zo! Khua kulhtian cu pheletin cim khawng zo hi. Babilon mitei humah phula ing. A hum hawah na phu la unna, midang a bawl haw bangin amu humah bawl bokleh un.
16 Hi ngam sungah anci cin phal pahsuh un, ancop tihvang umma hen. Ngamdangmi a umtu ten Babilon a dotu ngalkapte lau in, a khua le ngam hawah kikleh haw tuk,” ti hi.
Israel Kihlehnak
17 Topa in, “Israel mite cu kiosa hilmi le a khenkhekmi tuu bang haw hi. Amasa in, Assiria kumpi in simin, a nungten Babilon kumpi Nebuchadnezzar in, a nguh haw cep hi.
18 Mah hangin Keimah, Cungnungbel Topa, Israel i Pathian in, Assiria kumpi ka bawlsiat zo bangin kumpi Nebuchadnezzar le a ngam cu dantat tung.
19 Israel mite cu a ngam hawah pintik tung. Karmel Mual le Bahan ngam a po mi ante ei haw tuk a, Efraim ngam le Gilead ngam pen a suakmi ante a duhzahin ei haw tuk hi.
20 Mah hun a hen ten Israel ngamah sualnak um tukma, Judah ngamah thilpha ngawl um tukma hi. Itahim titale a nunnak haw ka khawih mite cu a sualnak haw ngaidam khawng tung hi. Keimah, Topa in hilh zo ing,” ti hi.
Babilon Humah Pathian Thukhennak
21 Topa in, “Merathaim mi le Pekod mite do un. That unna, siatsuah khawng un. Ka thupiakmi bangin bawl khawng un. Keimah, Topa in, hilh zo ing.
22 Hi ngamah ngaldonak thawm thangin, siatsuahnak nasezet um hi.
23 Babilon in leihum hi sobul tuah sukeh zan khawngin, mah sobul cu ek khawng zo! Hi ngam a hengmi nate amuh haw ten mi hempoh amthong haw hi.
24 Babilon, keimah do ci. Mahnaven na theih ngawlin thangsiah ing a, mah thangin nangmah awk.
25 Ka hiamnam koihnak inn hong ing a, ka thinukin, suah ing. Itahim titale Ihempoh tithei, Cungnungbel, Topa Keimah in, Babilon ah bawl tuk nei ing.
26 Ning tihkim pen do unna, a an koihnak innte phe let khawng un. Na lon uh mite cu an bangin vun menmunin cum un. A ngam haw cu siatik khawng un. Imah khawih pahsuh un.
27 Ngalkap hempoh that khawng un. Babilon mite lalthong hawta hei. Dantatnak a thuak haw tuk hun heng zo,” ti hi.
(\v 28 Babilon pen ngaltai a suakca mite Jerusalem ah heng haw a, Babilon ten Topa i Biakinn hum a, a bawl haw mi hangin, Topa a Pathian uhin hi bangin phu laleh hi, tin hilh haw hi.)
29 “Babilon do tukin thalkap thiamte hilh un. Thal le thalcang a mang thiamtu hempoh hah khawng un. Babilon khuapi cu kil khawng unna, kuamah suak ca haw pahsuh hen. A bawlmi bangbokin lulleh un. Midang humah a bawlmi bangbokin, a humah lulleh bok un hi; Itahim titale Israel tei mi thiangtho keimah i humah uangthuang zetin nadek hi. Ref 50:29 Mang 18:6
30 Mah hangin a tangvalte khuapi lampi ah thah hi haw tuk a, ngalkap hempoh cu mah ni ten siatsuah khawng hi haw tuk hi. Keimah, Topa in hilh zo ing.
31 “Babilon, ultung zetin um ci; mah hangin Cungnungbel Topa Keimah in, nangmah cu ngal ing! Ka dantat tuk hun zo.
32 A pualthaumi na ngam hi tu ua-uan tuk a, lum buabual tuk hi, kuamah in phong haw tukma. Na khuate cu mei tuah haal tung a, na elkim a na hempoh vang sialal khawng tuk,” ti hi.
33 Cungnungbel Topa in, “Israel mi le Judah mite cu bawlsiatnak thuak haw hi. Amuh mantu ten pa khat hei hah ngawlin cing tiptep haw hi.
34 Mahnaven amuh a pantu tuk cu a ngilzetmi, a min cu Cungnungbel Topa hi. Amah hihimin, a thu haw cu dinpih tuk a, leihumah lemdaihnak hengtik tuk hi. Mahnaven Babilon mitei lakah buainak um tuk,” ti hi.
35 Topa in,
“Babilon ah thihnak heng hi;
Thihnak cu a mihingte,
a mi ukte le a micip tei
humah hi!
36 Thihnak cu zolthu sontu,
a profet tei humah heng hi.
Iti zahin misil hi haw kaw.
Thihnak cu
a ngalkap tei humah heng hi,
Iti zahin mulling hah him.
37 A cipuh le a cipuhlengte
siatsuah un.
A zawncop haw mi
a ngalkap tei humah
thihnak heng hi;
A nawmtam dan haw!
A sumpai le a lo le lamte cu
lonsak unna siatsuah khawng un;
38 A ngamsung haw cu ko khawngin,
a luitui haw kang khawng tahen.
Babilon cu a lauhuaimi milim tei
umnak mun hi;
A mihingte a lungmu haw
caw mol khawng tahen.
39 “Mah hangin Babilon cu khawhuai le a thiang ngawl vano tei umnak munin suak tuk hi. Mihing umleh haw tukma toh. Ituk mah hei ten um awng haw tukma hi. Ref 50:39 Mang 18:2
40 Sodom le Gomorrah siatsuahin, a elkim khuate ka siatsuah bangin Babilon hum hei ah heng tuk hi. Mahlai munah mihing kuamah umleh haw tukma toh. Keimah, Topa in hilh zo ing. Ref 50:40 Pian 19:24-25
41 “Saklam a ummi ngam pen
mihing hung haw,
a khawlazet le ngam ngilzet pen.
Ngaldo tukin kumpi tampi
tuangtim haw hi.
42 A thal haw le thalcang,
a ngalnamte pua haw hi.
Mi hehpih nei ngawl le
mi ngilo haw hi.
Tuihualpi thawm bang haw hi.
A cipuh a khun haw ten!
Babilon do tukin mansa haw hi.
43 Babilon kumpipa cu
a khut zawng khawng hi.
Mah thu a zak ten!
Thasiatnak le thinkhamnak
tuah dim hi.
Nau nei kuan numei bangin hi.
44 “Jordan ngun mawk tupi sung pen tulin, ngan tei tatnak lenkolh lakah a tulmi kiosa bangin, Topa Keimah hung tung a, thakhat thu in, Babilon mite cu a khuapi haw pen taitultik tung hi. Hotu ka tenmi ten, a ngam haw cu uk tuk hi. Keimah tuah tehkip tuk akua kaw a um? Keimah zuam ngamtu akua um haw kaw? Kei a langpang ngamuktu akua um kaw?
45 Mah hangin Babilon khuapi siatsuah tuk ka tupmi le a mihingte izahta in siatsuah tum hing ngim tih ngai hem un! A cano haw tianin, mat hi haw tuk a, mi hempoh mulling haw tuk hi.
46 Babilon a tuk ua-uan ten a thawm nase leita tuk a, leihum buppi hing khawng tuk hi. A thinsuknak haw au aw cu miphun hempoh ten za khawng haw tuk,” ti hi.