49
Ammon Humah Topa Thukhennak
1 Ammon ngam cungcang ah Topa in, hi bangin hilh hi: “Israel mite ilai ah kaw a um haw, A ngam haw huptu kuamah um haw ma maw? Itakaw Gad ngam cu Molek ngam huai a biatute latikin, a luahtumtik haw?Ref 49:1-6 Ezk 21:28-32; 25:1-7; Amos 1:13-15; Zef 28:8-11;
2 Mahnaven Rabbah khuapi a um miten ngaldo thawm a zak haw hun hengtik tung, a khuapi haw sialal tuk a, khuanote vang haltum belh hi tuk hi. A lonsa haw mi ngam cu Israel miten longkik haw tuk hi.
3 Heshbon mite, kapin, tau un! Ai khua cu bo zo hi! Maw Rabbah numeite, kapin, tau li un hi! Thangkhau puan silh unna, mithi ngai in, um un. Suk le to ah tai kawkawi un! Na Pathian uh Molek cu a thiampite le a bawite tuah ngalmatmi salin suak haw tuk hi.
4 Noh, muantak ngawlte, ita tuangkhawng li kam uh cim?
5 Na kimkot uh pen mullinghah hengtik tung. Na venghawng uhin tai khawng tuk uh ci. A suakca nuamin tai tuk nave uhcin na ngalkap uhte a sam khawmtu kuamah um tukma uh ci.
6 “Mahnaven dawllam ten Ammon ngam cu neinung zetin suak lehtik tung. Keimah, Topa in hilh zo ing,” ti hi.
Edom Humah Topa Thukhennak
7 Cungnungbel Topa in, Edom cungcangah hi bangin hilh hi. Edom mite hi thudik hei ngaisung thei haw ma toh maw? A thudotmi haw ten i bawl tuk tih hilh thei haw ma toh maw? A cihnak haw hempoh bo khawng zo maw?Ref 49:7-22 Isa 34:5-17; 63:1-6; Ezk 25:12-14; 35:1-15; Amos 1:11-12; Oba 1-14; Mal 1:2-5;
8 Maw Dedan mite, nunglam hekkikin, tai un! Ngelh un! Esau casuante siatsuah tung, itahim titale amuh ka bawlsiat tuk hun heng zo hi.
9 Miten sabit ngah a thawih haw ten, a ngui humah demno bek zam haw hi; nguca ten zanlaihin, mi a suam haw ten a deihmi na bek la haw hi.
10 Mahnaven Esau casuante cu thacangin koih ing, a ngelhnak mun hei pen pholh tul ing a, ngelhleh thei haw ma toh hi. Edom mi hempoh pailal khawng zo haw hi. Mi pa khatno hei tangleh haw ma toh.
11 Nu le pa nei ngawl ca-ngahte cu ka lakah zam un, cingkhawi tung hi. Meivongte hei in keimah muang thei haw tuk hi.
12 “Bawlsiat a tawk tuk ngawlte tianin bawlsiatnak khuathai a inhaw tale, nohte cu bawlsia ngawlin luat tukin ngaisungdun uh cim? Cang thei kha ma! Mah khuathai cu in loli un!
13 Keimah hihimin Bozrah khuapi cu mitei muh cilcelin mullinghah le phillawnin suak haw tuk ti ngam ing. Keimah, Topa in, hilh zo ing,” ti hi.
14 Keimah in, “Edom, Topa i lak pen thu ngah ing. Mi hempoh ten a ngalkapte tuangtimin, nangmah do tuk mansa in, laitai hah zo haw hi.
15 Topa in nohte cu nawmtamtik tuk a, kuamah in upat haw tukma.
16 Na uangthuannak hi nangmah zoltu hi. Kei lau haw hi, na tihnak bangin kuamah in nang lau haw tukma hi. Suangtep liang khaampi le mual sangpi lekah um ci, muvanlai bangin mun sangzetah na um hei in Topa in dokvawk tuk hi. Topa in hilh zo,” ti ing.
17 Topa in, “Edom humah a heng tukmi dantatnak cu nasezet tuk a, a el hawhtu hempoh lamdangsa in lau haw tuk hi.
18 Sodom, Gomorrah le a elkim khua tei hum a hengmi thil lauhuai cu Edom hum hei ah heng tuk hi. Mah munah mihing kuamah umleh haw tukma toh. Keimah, Topa in hilh zo toh ing.Ref 49:18 Pian 19:24-25;
19 Jordan ngun mawk a, tupi sung pen tulin ngan tei tatnak lenkolh a tulmi kiosa bangin keimah cu heng tung a, thakhat thu in, Edom mite cu a ngam haw pen taivawktik tung a, hotu ka tenmi in uk tuk hi. Keimah tuah tehkip tuk akua kaw a um? Keimah a zuam ngamtu akua kaw a um? Kei a langpang ngamtu akua kaw a um?
20 Mah hangin Edom mite siatsuah tukin ka tupmi le Teman khua sung mite iti zahin dantat tung tih ngai hem un! A canote tianin kaihvawk hi haw tuk a, mi hempoh mulling haw tuk hi.
21 Edom a lup ten, a thawm nase leita tuk a, leihumpi hei hing khawng tuk hi. Lauthawgnak aw nging cu Aqaba Tuikawi tian zak theih tuk hi.
22 Mupi in ak a mat bangin Bozrah cu ngal ten nam tuk hi Mah ni ten Edom ngalkapte cu nau nei kuan numei bangin thinsu linglawngin um haw tuk,” ti hi.
Damaskas Humah Topa Thukhennak
23 Topa in, Damaskas cungcangah hi bangin hilh hi: “Thupha ngawl a zak haw hangin Hamath le Arpad khuasung mite cu lungkham le vansangin um haw hi. Lungkhamnakin tuipi bang khuhin, colhdamnak ngah thei haw ma hi.Ref 49:23-27 Isa 17:1-3; Amos 1:3-5; Zek 9:1;
24 Damaskas mite cu nawmtam haw a, thinsu in taikeh haw hi. Naunei kuan numei bangin, amthongin, vancaukap le haksa zetin um haw hi.
25 Khua nopzet le khua minthangzet cu taisan mi khua in suakta hi.
26 Mah ni-in, a tangvalte cu khuasung lampi ah thah hi haw tuk a, ngalkapte vang thi khawng haw tuk hi.
27 Damaskas khua kulhtiante cu mei tuah haal tung a, kumpi Benhadad innte cu tumbelhin haal khawng tung hi. Keimah Cungnungbel Topa in hilh zo ing,” ti hi.
Kedar Hinnam le Hazor Khuapi Humah Thukhennak
28 Babilon kumpi Nebuchadnezzar i nehmi Kedar hinnam le Hazor i ukmi ngam tei cungcangah Topa in, hi bangin hilh hi: “Kedar mite do unna, nisuahnak lam hinnamte cu siatsuah un!
29 A puanbuk haw le a tuuhonte, a puanbuk puanzakte le a puanbuk sung a ummi na hempoh sut khawng un hi. A kalaukte hunpih unna, mipi tei lakah, ‘Nu elkim khua hempoh uhah lauthawngnak um hi,’ ti un.
30 “Hazor mite, Keimah, Topa in ngallinnak pia ing hi: Tai unna, ngelh un, Babilon kumpi Nebuchadnezzar in, suamin hi bangin awn hi:
31 Hung un, himdam ung tin, a ngaisungtute do tuk hung. A khuapi haw cu kongkhah nei ma hi, tawhkalhnak vang nei ma, kuamah hei in cing haw ma,” ti hi.
32 “A kalauk le khuite laksak un! Sam comno in, a met tute cu mun tihkimah lengkektik khawng tung a, mun tihkim pen a lak hawah siatlalnak hengtik tung hi.
33 Hazor cu kumkhua in phillawnin bawl tung a, cingne tei umnak bek hi tuk hi. Mah munah mihing kuamah umleh haw tukma toh hi. Keimah, Topa in hilh zo ing,” ti hi.
Elam Humah Topa Thukhennak
34 Zedekiah cu Judah kumpi a deh ceng bek ten Elam ngam cungcangah Cungnungbel Topa in ka lakah hilh hi:
35 “Elam ngam a ngiltiktu thalkap thiamte cu that khawng tung hi.
36 Mun tihkim pen Elam humah huihpi theutik tung a, mun tihkimah a mihingte cu khenkhek khawng tung. A mihing tei ngaltai ngawlnak mun le ngam pa khat hei um tukma hi.
37 Amuhte thah a tumtu a ngalte lau haw tuk a, Elam mitei lungmu sungah launak umtik tung. Ka thinukin Elam mite cu siatsuah tung a, cimitin, a um haw laklawh amuhte dotu tuk ngalkap hah tung hi.
38 A kumpite le a puitute paitikin, a khunnak haw munah ka kumpi khunnak koih tung.
39 Mahnaven hun dawllam ten Elam mite cu mi neinung hi lehtik tung. Keimah, Topa in hilh zo ing,” ti hi.