12
Jeremiah In Topa Thudong
1 “ Topa, nang cu a dikmi le
a manmi ci.
Ka thu la na lakah ka hengtik hei in,
dik leleng tuk ci.
Ka dot nuammi thu umin,
mah thu cu
itakaw mipha ngawlte
a khantoh dedeuh haw?
Itakaw mi awklawlte le
mi depdete a lawhtin lih haw?
2 Nangmah in phut ci a,
zungsa haw,
khangto in, ngah pha
ngah haw hi.
A awnkam haw tuah
pakdiak hem
haw tuk naven,
a lungmu haw tuah
khawla dunzet tuk hi.
3 Mahnaven, Topa
nangin thei ci;
ka thil bawlmi mu ci a,
nangmah ka itnak vang thei ci.
Hi mipha ngawlte hi thah tukmi
tuu bangin kai in hi.
A thih ni haw a kim laklawh
tai thongleh tuk ngawlin
cingin hi.
4 Ituk tian kaw ka ngam uh hi
a ko tuk?
Ituk tian kaw ka ngam buppi uhin
hampate a thim tuk?
Ngamsa le vanote vang
a thih li haw tuk?
‘Pathian in, a bawl uhmi
mu li sapma!
A titu mihing tei sualnak hangin,’ ”
5 Topa in,
“Maw Jeremiah, mihing hei
tai na zuam thei ma tale,
itin kaw cipuh cu
tai na zuam theih tuk?
Lenkolh hei ah na ding thei ma tale,
Itin kaw Jordan tuimawk
hampa cam lakah na din theih tuk?
6 Na unaupih le na unau hei
innkua pihte nangawn hei in
suamin, a dotu ah tel haw si.
Amuhte cu sang pahsun,
a awnkam haw a pha hei in,”
tin ti hi.
A Miphunte Hangin Topa A Thasia
7 Topa in, “Israel nunghek
zo ing,
ka tensa ka miphunte cu
zam zo ing.
Ka deih zetmi ka mihingte cu,
A ngal tei khut sungah
san zo ing.
8 Ka tensa mihing ten
keimah langpang zo haw hi.
Tupi sung a, kiosa bangin
ka humah hawk khu khumin,
a um haw hangin hua ing.
9 Ka tensa ka mite cu, mun tihkimah
mupi i hilmi vano
bang haw hi.
A cik eihnak puai ah,
ngamsate vang sawm un.
10 Ngamdang uktu ten
ka sabit huan
siatsuah khawng haw hi.
Ka lo ngam cilpek khawngin,
a deih awh zetmi ka ngam cu,
phillawnin suaktik haw hi.
11 Taisan mi ngamah cangtikin,
ka mitmuhah
ngamkhingin suak hi.
A ngam buppi in
phillawn suakin,
kuamah in kinmawh kha
haw ma hi.
12 Phillawn ngam a,
mualsang hum
khua hempoh ah,
mi suam tuk le lonsak tukin
hung haw hi.
Ngan buppi khatlam deng pen
khatlam deng tian siatsuahtu cu
Topa i ngalnam hi.
Lemdaihnak tuah kua mah
um thei haw ma.
13 Ka mihing ten sangvut cing haw,
mahnaven a cop haw mi cu
ling le so bek hi.
Haksa zetin nadek haw,
mahnaven imah ngah haw ma.
Ka thinuk leita hangin,
a an kung ten ngah hei
nei haw ma,” ti hi.
Topa i Thutiamnak
14 Topa in, “Ka mihing Israel tei ngam a siatsuahtu Israel ngam el a ummi ngam tei lakah hilh tuk, nei ing. Mah mipha ngawlte cu bawhmi thingkung bangin a ngam haw pen bot vawk tung a, amu lak pen Judah mite cu pan tung hi.
15 Mahnaven mahtih bangin ka bawhsuak nungten, a hum hawah hehpihnak neileh tung a, a khua le ngam tenah pui kikleh haw tuk hi.
16 Baal khawhuai minin, ka mihingte siatcamnak hilh haw naven atu-in, ka minin siatcamnak cung haw a, ‘ Topa a nun bangin,’ ti haw in, a lungmu ngai haw in ka mihing tei biaknak a pom haw tale ka miphunin cang bok haw tuk a, khangto bok haw tuk hi.
17 Mahnaven miphun pa kha khatin, a zui nuam ma tale mah miphun cu botvawk tung a, siatsuah tung. Keimah, Topa in hilh zo toh ing tin,” ti hi.