11
Jeremiah le Thutiamnak
1 Topa in ka lakah,
2 “Hi thutiamnak thu hi ngaisung hemin hi. Judah le Jerusalem mitei lakah hilh inna,
3 hi thutiamnak thu bangin a zui ngawltu humah Topa, Israel i Pathian keimah in, tamsiatnak hengtik tung.
4 Hi thutiamnak cu a pu le pate tuah bawl ing. Amu ca thikseknak pummei bangmi, Izipt ngam pen ka puitul laih a, ka bawlmi thutiam hi. Ka thu ngai tukin le ka thupiakmi hempoh zui tukin thuhilh ing. Ka thu a ngai haw tale ka mi hi haw tuk a, a Pathian haw hi tung tin hilh ing.
5 a pu le pa tei lak a, thutiamnak ka bawlmi cu kimtik tung a, atu na umnak, khuinawi le khuaihum a luannak ngam hi, pia tung tin ti ing.”
Keimah in, “Mahzuh hi, Topa” tin ti ing.
6 Topa in ka lakah, “Judah ngam a, khuapi le Jerusalem khua sung lampi ah hawhin hi. Mahlai ah ka thuthan inna, ka thutepmi zain, a zui theih hawnak tuk mipi tei lakah hilhin hi.
7 A pu le pate Izipt ngam pen ka puitul laihin, ka thu ngai tukin ngallinnak pia ham khawng zo ing, tuni tian pia li laih ing.
8 Mahnaven ngai kha haw ma, a zui hei zui nuam haw ma. Ni dang bang lengin, lungkhoh leleng haw a, sualnak bawl cu tawp cuang haw ma hi. Ka thutiamnak zui suak tukin thupia ing, mahnaven zui nuam haw ma. Mah hangin ka thutepsa bangin a hum hawah dantatnak hengtik tung hi.”
9 Topa in, “Judah mi le Jerusalem miten do in, suam haw hi.
10 Ka thu a eltu a pu le pa tei sualnakah kiklehin, pathian dangte bia haw hi. A pu le pate tuah ka bawlmi ka thutiamnak cu Israel le Judah ten nawklet khawng zo haw hi.
11 Mah hangin atu-in, Keimah, Topa in, a hum hawah siatsuahnak hengtik tung a, kuamah suakca haw tukma hi, tin ngallinnak pia ing. Ka lakah bopnak ngenin, a au li haw hei in ngai tuk mang.
12 biakpiaknak a piak haw mi khawhuai tei lakah Judah mi le Jerusalem mite cu hawh haw tuk a, bopnak ngenin, au haw tuk hi. Siatsuahnak a heng ngangai tale, hi khawhuai ten pan thei haw tukma.
13 Judah miten a khuapi haw zah bokin, khawhuai nei haw; Jerusalem miten a ningdelhhuai mi Baal khawhuai lakah biakpiaknak tukin lampi a neih haw zahin, biaklandawh tiang bok haw hi.
14 Jeremiah hi mihing tei ca in ka lakah thungen toh pahsun. A kut hei kut sak kha toh pahsun. Haksaknak tawkin le bopnak deihin, a sam li haw hei in theihsak kha tuk mang,” ti hi.
15 Topa in, “Ka lainatmi ka mihing ten thil sual bawl haw hi. Ka Biakinn sung tum theihnak ikaw a neih haw toh? Thutiam tampi a bawlnak haw le biakpiaknak ngan a piaknak haw in, siatsuahnak a kham thei tuk hengin maw a ngaihsut haw? Mahmi ten a lung haw damtik a ni maw?
16 Ni dangin, olif kung hing, ngah mawizet ngahtu tin, sam mek ing. Mahnaven atu-in vanthum bangin mei ah a ceh cu haal tung a, a kangte ektuah khawng tung hi.
17 “Israel le Judah cu keimah Cungnungbel Topa i phut kho mite hi. Mahnaven atu-in, a hum hawah siatlalnak hentik tum ing. Hi siatlalnak hi amuhno in, a hum hawah a hentik haw mi hi. Itahim titale Baal khawhuai lakah biakpiaknak pia in, thil sual a bawlnak haw i hangin ka thinuktik haw,” ti hi.
Jeremiah Thah Tum Haw
18 Ka ngal ten keimah suamin, thah a tumnak haw thu cu Topa in keimah hilh hi.
19 Thah tukin a hawhpih haw mi, mi a muansanzettu tuuno bang ing. Thil sual a ngaihsut lih haw mi hi, keimah siatsuahnak tukin a hihlam thei mang hi. Amuh ten, “Thingkung hi, a khanphat laihtakin phuk nung; hi pa hi that nung inna, kuamah in phawkleh haw ma toh hen tin ti haw ti.”
20 Hi bangin thungen ing hi, “Cungnungbel Topa, nang cu thumanin, a soncattu ci, mi i ngaihsutnak le lungmu khingkhai mek ci. Na khut sungah ka thu cu pia ing. Himi tei hum a phu na lakmi mutik zazalin,” tin ti ing.
21 Keimah that nuamtute cu Anathoth khua mite hi haw in, Topa i thu na tangau pih leleng tale that tuk ung hi, tin hilh hi.
22 Mah hangin Cungnungbel Topa in, “Amuhte cu dantat tung, A tangvalte cu ngaldonakah thi haw tuk a, a naupangte cu an ngawlin thi haw tuk hi.
23 Anathoth khua tei humah a heng tukmi, siatsuahnak a hennak tuk hun cu thiah zo toh ing. Mah hun a hen ten kuamah luat haw tukma,” ti hi.