5
1 “Job, sam hemin!
A donlehtu
akua bek um haw ni maw?
Na zotnak tuk vancungmi
pa khat bek um haw ni maw?
2 Thinuk leleng a nun cu
misilte thattu hi.
Iksiknak cu mi tawinate thattu hi.
3 Misilte lungmuang zetin,
a um haw mu zo toh ing;
Mahnaven phawhkhak ngawlin,
a innkua haw cu tamsiatnak
tawk haw hi.
4 A canote cu himnak
tawk thei awng haw ma;
Thukhennak munah kuamah in
amuh panin, ding haw ma.
5 Misil tei ankung cu ngilkial ten
ei haw tuk hi.
Ling lak a, pomi ankung tianin;
a hauhnak haw cu dangdum ten
iksik haw hi.
6 Phatngawlnak cu leisung pen
po ma hi;
Haksatnak vang leisung pen
a tulmi kha ma hi.
7 Meithem cu mei alh sung pen
a len kek bangin, mihing hum
a hengmi haksatnak cu
mihing lala i hentikmi hi.
8 Kei hi nangmah ka hi ahin,
Pathian lamah hekkik tung,
Ka thu cu a lakah hengtik tung.
9 Thil thupi tampi a bawlmite cu
thei zo awng tuk mang;
Na thasiahhuai lamdang
a bawlmite cu a bo ni
um awng tukma.
10 Leingam humah nguah zutikin,
lo ngamte nawngtik hi.
11 Mahzuh hi, mi lungnem
a cawisangtu le thasia mi
hempoh lakah lungdamnak
a piatu cu Pathian hi.
12-13 Mi depde tei tuptahmi cu
siatsuah sakin, micipte cu
a thu vaihawmnak haw in
awktik hi.
A bawl haw mi hei hi tahen
lawhting haw ma hi;Ref 5:13 1Kor 3:19;
14 Sun khuavak hei in,
zan khuathim
sung bangin vak kawkawi haw hi.
15 Mahnaven Pathian in
mi ca-ngahte cu thihnak pen hup hi,
Mi tingsamte cu nepsuknak pepan hi.
16 Mi cimkham tei lakah
muansannak pia hi,
Mahnaven mipha ngawlte cu
vatmit khawng hi.
17 Pathian i hilhhawlmite cu
mi lungdam haw hi.Ref 5:17 Thup 3:11-12; Heb 12:5-6;
Nun a hilh tale na khawngai
nuam pahsun.
18 Pathian i liamsuah mite cu,
amah in tuamleh hi;Ref 5:18 Hos 6:1;
A khutin meima piangtik a,
a khut lala tuah damtikleh hi.
19 Amah in haksatnak
nam luk sung pen hup tuk hi,
Salih sung hei pen phatngawlnakin
nang tawngkha thei tukma.
20 Paampi a heng vangin
thitik tukma hi;
Ngaldonak a um vangin
thihnak ngalnam sung pen
pan tuk hi.
21 Mitei sonsiatnak sung pen
Pathian in hupin,
Siatsuahnak a hen hei ten
him tuk poh ci.
22 Thisan luannak le ngilkialnak
mu khawng tuk navecin,
Nuihsan thong tuk ci,
sahang hei lau tukma ci.
23 Na bun mi lo sungah suang hei
um tukma hi.
Sahangte tuah hei in ailemno in
um tuk ci.
24 Na puanbuk sungah
lemdaihnak tuah um tuk ci.
Na tuute na zoh hei ten
himdam tenno in mu tuk ci.
25 Na casuante cu tamzet haw tuk a,
Leihum a hampa po zah
hi haw tuk hi.
26 An cop hun tian himdamno in,
a nungmi sangvut bangin,
Kum ngeipi khan pha zetin nung tuk ci.
27 Job, hih thute hi kum ngeipi cungin
ka theih uhmi hi.
Thudik hi, mah hangin
sang tohin hi,” ti hi.