36
1 Elihu in, a thuson pehlehin,
2 Pathian ai-awhin ka otmi hi
thinsau in ngei saw deuh
hu ngai hih in hi.
3 Keimah Semsuahtu Pathian hi
dikcang hi,
tih langtiknakin,
ka thutheihnak cangkim zetmi hi,
ka theih zahin mang tung.
4 Na lak a, ka otmi hi
a dik ngawl umma hi;
Na mai ah micip tatak
umin mu ci.
5 Pathian cu a thawmngeng zetin,
mi zotsak nei ma hi;
Theih ngawlmi vang nei ma hi.
6 Misualte cu khawih ngawlin
Mi ca-ngah tei thu vang
camcawi zetin sonsak hi.
7 Mi dikcangte cu hup hi;
Kumpi bangin mi uktu in
bawlin kumkhua in sunloih
upatnak cotik hi.
8 Milai in ama thil bawlnak hangin,
Cimkhamnak thuakin
thik taicin tuah kencipnak
a tawh haw ten,
9 Pathian in, a sualnak le
a pualthaunak haw cu
amu humah langtik hi.
10 Phat ngawlnak pen kikleh tukin
a beng haw hongtikin
ngallin thu hilh hi;
11 Pathian thu zui in, a na,
a deh haw ten,
a nunsung hawah lungmuannak le
hauhsaknak co ngah haw hi.
12 Pathian thu a zui haw ma tale
ngalnam tuah siatsuah tuk a,
imah thei ngawlin thi haw tuk hi.
13 Pathian thei ngawlte cu
a thin haw so leleng;
Haksatnak a tawk haw hei in
bopnak deihin thungen
haw ma.
14 A khanphat haw laihin thi haw in,
a nunnak haw cu
zahcaknak tuah botik haw hi.
15 Pathian in mihing cu haksat
a thuaknak haw pepanin,
Haksatnak cu a mit haw
vaaktiktu in bawl hi.
16 Pathian in haksatnak sung pen
suahin, himnak sungah
nop zetin koih hi.
Na cabuai cu eih tuk
an tuah dim hi.
17 Mahnaven atu-in mipha ngawl tei
thuakmi bawlsiatnak thuak ci,
na sualnak tuah khawthu mi thuak ci.
18 Nawhthuh eihnakin,
zol theih tuk ngawlin
ngallingin hi.
19 Bopnak deihin, na au li vangin
nemcuam tukma,
na tha neihmi hempoh hei in
bawm thei tukma hi.
20 Zan a heng tukmi
ngakhel nuam pahsun;
miphun tampi a paihlalnak tuk
hun hi.
21 A pha ngawlmi lamah hawh pahsun;
mahlai lam hek tuk ngawlin
a khamtu tukin
haksatnak thuaktikmi hi ci.
22 Pathian i huham a ngeng dan cu
cing lelengin;
Pathian cu zilhtu hempoh tei
zilhtu ngengbel hi.
23 Kuamah in Pathian cu
nadektik thei haw tukma,
Thil sual bawl vang nawn thei
haw tukma hi.
24 Pathian cu a thil bawlmi hangin
thangphat leleng haw;
nohte vangin amah cu
thangphat bok un hi.
25 A thil bawlmi hempoh cu
akua a bangin mu zo haw toh,
mahnaven lam khawlapi pen
cuan thei ung.
26 Pathian i a thawmngeng dan cu
cangkimin, theihzawh ma hi;
Pathian i kum vang sialzawh tuk kha ma.
27 Leihum a tuipi pen tui lato in,
van pen nguahzutiktu cu
Pathian hi.
28 Anci cingtu mi hempoh ca in
Pathian in meingo pen nguahzutik hi.
29 Pathian i umnak vanah iti bangin
meingote hawh haw hum
tih le iti bangin vanthum
dudum hum tih
kuamah in thei zo haw ma.
30 Amah in vanhaang mawk tianin
khuapheleptik hi;
mahnaven tuipi tawdeng cu
thim leleng hi.
31 Amah in nguahzutikin,
mihingte cawm hi;
a eih haw tuk an tampi pia hi.
32 Khuaphelep a khutah suumin,
a muibatmi kha tukin
kekta cu thupia hi.
33 Huihsia heng tuk cu
vanthumin theitik a,
khuihon hei in, a hun cu
thei haw hi.