15
Eliphaz in:
1-2 Job, na otmi hi phukthong ngeh hi.
Nisuahnak lam pen
a hengmi huih bang thong.
3 Na ot bangin micip kuamah in
awn tukma hi;
A sullam nei ngawl awnkam tuah
kuamah in
amuh le muh patdunnakin
mang haw tukma.
4 Pathian kihca tuk ngawlin mi
thapiatu hi ci,
a lakah thungen nuam tuk
ngawlin bawl ci.
5 Na phatngawlnak cu
na kam pen tulin,
na tenmi cu mizolnak lei hi.
6 Keima lawl hei kulma,
na awnkamin
sual nawnin, lawl zo hi.
7 A suak masabelin, ngaisungdun cop cim?
Pathian in mualte
a semsuah laihin
um zo toh bang kek si?
8 Pathian i tuptahnak thei ham zo cim?
Mihing cihnak hi
nangmah bek i neihmi in maw
na ngaihsut?
9 Na theihmi hi ka theih uh ngawlmi
imah umma.
Na theihmi ka theih uh ngawlin
um kaw?
10 Ka cihnak uhte puakpaksa upa,
na pa sangin upa saw lak pen
ka cun uhmi hi.
11 Pathian i hehnemnak
awnkam nemno hi
na ca in imah nemcuam ma maw?
Ita pom nuam leleng
ma nge cim?
12 Na mitmai pha ngawlin,
na thinukin kei zo ci.
13 Pathian humah thinukin,
ita thusia pawi ngam li cim?
14 A thiangthomi um thei ngai ni maw?
Pathian mai ah midik
um ngai haw ni maw?Ref 15:14-16 Job 25:4-6;
15 Pathian in, a vancungmi hei
muang ma hi,
A mai ah amuhte hei
thiang haw ma.
16 A nawngkai mi, dikcangnak
imah nei ngawl,
Tui in bangin siatnak bebek
a intu mihing cu,
iti zahin thiangtho ngawl sesem
tuk kaw?
17 Mah hangin Job ka theih bokmi
hi ngai hemin!
ka muhmi na lakah phuang tung.
18 Micip ten a pa tei lak pen,
a cun haw mi cihnak thutak cu
ohte zilh haw hi.
A ip haw mi imah umma hi.
19 A ngamsung hawah ngamdangmi
kuamah um haw ma,
Pathian lak pen a puitultu tuk
kua mah um haw ma hi.
20 Mipha ngawl le misual ten
a nunsung hempoh ah
haksatnak tawk hi.
Hehpihnak a nei ngawltu tei ca in
bawlsiatnak cu
koihsak sa in um hi.
21 Lauthawngnak aw cu a beng sungah
catngawlin nging hi.
Him ing ngei, a tih laih takin
nguca ten suam haw hi.
22 Thimnak sung pen luat thei tukin
muansannak nei ma hi,
Ngalnamin amuh that tukin
munkhat pen ngak hi.
23 A luang ei tukin langta mupi ten
zo leng haw hi.
Ka mailam cu thimzet hi tih cu
thei haw hi.
24 A ngil zetmi kumpi bangin
siatsuahnakin
25 Ihempoh tithei a dodaltu le,
Pathian nelah a khuttum a zak litu cu
mahti bang cu na hihi.
26-27 Mi pualthau le mi ngawngtawhin,
lungmu khoh zetin,
a lumphaw cu dangto in,
Pathian do tukin mai ah not hi.
28 Khua tampi a nehtu le,
inn lopte a luahtu cu amah hi.
Mahnaven ngaldonak a um ten
mah khua le innte cu
sia khawng tuk hi.
29 Kum ngeipi hau tukma hi,
a neihmite ngei phat
tukma hi,
a lim tianin tham tuk hi.
30 Thimnak sung pen luat tukma hi;
kang mei in,
a kang khawngmi,
a pak huihsia i nuai pekmi
thingkung bang hi tuk hi.
31 A silnak hangin siatnak bek
a muansan tale,
a co tuk cu siatnak bek tuk hi.
32 A hun kim laih ngawlin thim tuk a,
thingkang bangin ko in,
hingleh tukma toh.
33 A min laihngawlin,
a ngah a kulh khawngmi,
sabit kung bang hi tuk a,
a pak kulhmi cu olif kung
bang tuk hi.
34 Pathian thei ngawl ten
casuan nei haw tukma hi,
Nawhthuh sumpai tuah
a sak haw mi inn cu
mei in kang khawng tuk hi.
35 Amuh cu mi siatsuah a tumtu le
phatngawlnak a bawltute hi;
A lungmu haw cu
mizolnak bek tuah dim hi.