14
1 Numei sung pen
a tul mihing hempoh,
a nun haw comin,
cimkhamnak thuak haw hi.
2 Paak bangin khang haw naven,
ziamleh haw;
Lim bangin thamthong hawta hi;
ngei phaat haw ma hi.
3 Pathian, na mit hem hei in
zo nuam tuk cim?
Ka humah thukhen tukin
na mai ah tulpih ngai tuk cim?
4 A thiang ngawlmi mihing sung pen,
a thiangmi tul thei ni maw?
Tul thei awng tukma.
5 A nuntuk kumzah cu ciangtan sa hi.
A ha zah cu ngaihsutsa in um hi.
Na leitek sa khawng hi
thekleh theih hi haw ma toh.
6 Mun dang heksan inna,
amah bek zamin hi;
A nunnak haksat ni cu
a noppih theihbelin noppih tahen.
7 Phuh sami thingkung ca hei in
muansannak umlaih hi;
tawtlehin nungleh tuk hi.
A zung dawnnote khang pepelleh tuk hi.
8 A zungte tek haw in, a bul cu
leihumah a ko hei in,
9 Tui a ngah ten tawtlehin,
thing dawnno bangin poleh tuk hi.
10 Mahnaven mihing a thih ten
bolal ta hi.
A thih nungten ilai ah kaw a um?
11 A kokangmi lui bangin le
a kangmi tuipi bangin,
12 Mihing a thih ten tholeh ma toh hi,
van hempoh a bolal laklawh
khangloleh haw tukma toh hi.
A hihbuhnak haw pen
tholeh haw tukma toh hi.
13 Mithi khua Sheol ah kei na sel ahin
deih na veng;
a thinuk a paih laklawh
kei hu sel zalin hi.
Nangmah in, a hun ciangtan inna,
kei na theih kikleh hun tuk
na koihin hi.
14 Mihing a thih nungten nungleh
thei ni maw?
Mahnaven hunpha ngak tung,
tu a haksatnak hun
mual a leh tian ngak tung.
15 Mah hun ten kei cu sam tuk ci a,
donleh tung hi,
Na khut tuah na semsuahmi
keimah in ka hum a,
na lungdamnak cu mu tung hi.
16 Ka ke kal cu zo cangcian tuk ci,
mahnaven ka sualnak cu
velthel li tukma ci.
17 Ka mawhnak cu ngaidamin,
vawksak khawng tuk ci;
phat ngawlnak ka bawlmi hempoh
18 Mualte a cim khawng hun heng tuk hi,
suang ngengpite
pholhlet khawng
hi haw tuk hi.
19 Tui in suangte ei khawngin,
hawktui in lei taivawk khawng;
Mah bangin mihing tei nunsung
a muansannak hempoh
pai vawk khawng hi.
20 Mihing cu kumkhua phatin neh ci,
mahten pailal khawng haw hi.
A thih ten a melte thekin
hawlvawk tuk ci.
21 A capa ten minphatnak
ngah haw naven
theileh ma toh;
A min a siat haw hei ten
thei cuang ma hi.
22 A taksa pumpi a nat bek thei in,
a lungmu haksatnak bek
thuak hi.