7
Ahaz Lakah Thucahmi
1 Uzziah capa Jotham, Jotham i capa kumpi Ahaz in, Judah ngam a uk laih takin ngaldonak umin, Siria kumpi Rezin le Israel kumpi Pekah, Remaliah capa ten Jerusalem do haw naven la thei haw ma hi.Ref 7:1 2Kum 16:5; 2Khang 28:5-6;
2 Siria ngalkapte Israel ngamah heng zo haw tih cu Judah kumpipa in, a zak ten amah le a mihingte cu thinsu zetin huihin, thingkung amuh bangin hingin, cantawtok haw hi.
3 Topa in Isaiah lakah, na capa Shear Jashubnote 7:3 Jashub tih cu mi demno kikleh haw tuk tihnak hi. pui inna, kumpi Ahaz tawk tukin hawh un. Kumpipa cu tuinak humta saw pen, tui a luannak tui kong tawpnak puantaktu tei nadehnak lampi ah tawk tuk uh ci.
4 Na tawh uhten amah cu ngalling thah zetin, lungmuangzet le thinsu lau thawng ngawlno um tukin hilh un. Kumpi Rezin le a ngalkapte, kumpi Pekah i thinuknak cu lau tuk umleh ma toh hi; a mit li tohmi thingthu pa nih i khu bang hei hi ma toh.
5 Siria, Israel mi le a kumpi haw ten suam haw hi.
6 Judah do tumin, Judah mite cu a lak hawah tang tukin thum haw tuk a, Tabel capa cu kumpi in bawl tum haw hi.
7 Mahnaven Keimah Topa in, mahti bang hi tuk ngawlin than zo ing.
8 Itahim titale Siria cu Damaskas khua sangin ngil saw cuang ma hi. Damaskas cu kumpi Rezin sang hei in, ngil saw cuang bokma hi. Israel ngam thu a son uh ahi tale atu pepan mailam kum sawm luk le kum nga sungin Israel cu khenkeh khawngin, ngam khat tih hei tak tukma toh.
9 Israel cu Samaria sangin ngil saw cuang ma. Samaria hei cu kumpi Pekah sangin ngil saw cuang bokma hi.
“Na upnak uh a khoh ma tale ngeiphat tukma uh ci.”
Immanuel Lak Hamnak
10 Topa in, Ahaz lakah hilh lehin,
11 “ Topa na Pathian lak pen lak hamnak ngenin hi. A thukbel mithi khua pen hei hihen, a sangbel vancung hei pen hihen ngenin,” ti hi.
12 Ahaz in, “Sialsiahnak ngen tung hi. Topa cu a thiatha zo tuk mang,” ti hi.
13 Isaiah in, kumpi David casuante, ngai hem un. Mihing ngaihsutnak botik zo na hih uh tak poizet hi; atu-in Pathian lungbingtik leleu nuam uh cim?
14 Mah hangin Topa amah loli in, lak hamnak pia tuk hi. Khanglaino pa khatin, naupai in, capa hing tuk hi; a min cu Immanuelnote 7:14 Immanuel tih cu Hebru awn hi a, Pathian ohtei lakah um tihnak hi. tin sam haw tuk hi.Ref 7:14 Mt 1:23;
15 Upa pepelin, a sia le pha deidat a thiam ten, a an eihmi cu khuinawi le khuaihum hi tuk hi.
16 Mah hun a hen laih ngawlin na lauzet uhmi kumpi pa nih tei ngam cu veng diudeu tuk hi.
17 “Israel le Judah na khendun nung uhten na tawh awng uh ngawlmi haksatnak cu Topa in, nangmah le na innkua pih le na miphun tei humah Assiria kumpi hengtik tuk hi.
18 “Mah hun a hen ten, Topa in, Izipt mite cu Nail ngunpi naak, khawlabel mun hei pen tho bangin leng tukin le Assiria mite cu a ngam haw pen khuai bangin leng tukin viusa in sam tung hi.
19 Hung haw tuk a, luam tihkim, suanghol tihkim, ling le so lak le ngan tatnak ngam tihkimah dim haw tuk hi.
20 Mah hun a hen ten Topa in, Assiria kumpi cu na sam uh mettu tukin Eufrates ngun ngalkhat lamta samtuk a, na kha mul uh, na lu hum uh a sam le na taksa hum uh a, mul hempoh met khawng tuk hi.
21 Mah hun a hen ten lobungpa pa khatin, khuila pa khat le keel pa nih a nei hei in,
22 a nawitui haw tam zetin, kincak hempoh tham khawng tuk hi. Mah bangin ngamsung a tangmi hempoh tei eih tukin khuinawi le khuaihum nei haw tuk hi.
23 “Mah hun a hen ten, sabit huan phazet, sabit kung thawng khat ummi, huan pa khatah sumpai thawng khat man cu ling le so tuah dim tuk hi.
24 Thalcang tuah mihing tei savainak munin cang tuk a, mah bangin ngam buppi cu ling le so tuah dim tuk hi.
25 An a cinnak haw mualhumte cu ling kung dim khawngin, kuamah hawh haw tukma hi. Khui le tuu tatnakin suak tuk hi.