54
Topa i Israel A Ihnak
1 Jerusalem aw, ca nei ngawl,
micingnu bang ci.
Mahnaven atu-in, na lungdamin
lasa in hi.
Atu-in, a pasal i zamthong
awng ngawlmi numei sangin
cano tam saw nei tuk ci.Ref 54:1 Gal 4:27;
2 Na puanbuk ngeng deuhtikin hi!
Puan kennak a khau
sautik deuh inna,
na ngolh khet khim zetin
bawlin hi.
3 Na ngamngi cu na ngam elkimah
kauh deuh in hi.
Miphun dang tei luahtummi
na ngam cu na hinnam ten
coleh haw tuk hi.
Atu-in khing diudeu mi
khua cu mihing dimleh khawng
haw tuk hi.
4 Imah lau pahsun.
Zahcak tawkleh tukma toh ci.
Mualpho in umleh tukma toh ci.
Zi dawnno na hih laih a,
na tangzangnak le
meivong na hih laih a,
khawngai lunglengin,
na umnakte cu phawkleh
kha tukma toh ci.
5 Nangmah a piangtiktu,
Cungnungbel Topa cu
na pasal bang hi tuk a,
A thiangtho Pathian,
Israel i Pathian in
pan tuk hi.
Amah cu leihum buppi uktu hi.
6 Israel aw, Zi dawnno bang hi ci.
A pasal i maakmi le
lungleng khawngai in,
a ummi numei bang ci.
Mahnaven Topa in,
ama lakah samlehin:
7 “Hun dawmno sung khen hih ing.
Nangmah ka ihnak
a thuk leita hangin sam kikleh tung.
8 Hun comno sung ka thinukin,
langlam hek san ing hi;
mahnaven a kumkhua in,
a kho mi ka ihnak cu
lak tung,” ti hi.
Nangmah a pantu
9 “Leihumah tuihau tungtik tuk
ngawltohin,
Noah lakah thutiam zo ing.
Atu-in, na humah thinukleh
tukma toh ing, tin thutiam ing.
Bawlsialeh hihim tukma toh ing.
A liat hei liatleh hihim tukma toh ing.Ref 54:9 Pian 9:8-17;
10 Mual sangpi le mualniamte
a cim khawng hei in,
nang ka ihnak cu ituk mahten
bo thong tukma hi.
Pia tung hi tin, ka tepmi lemdaihnak
kimtik leleng tung hi,”
tin nang a ittu, Topa in ti hi.
Jerusalem Thak
11 Topa in,
“Maw Jerusalem, bawmtu nei ngawl,
siat theih thuaktu khuapi,
nemtu kuamah nei ma ci.
Na inn mun cu
suang manpha tuah dinsakleh tung.Ref 54:11-12 Mang 21:18-21;
12 Na ngalvilnak innkuate cu
rubi suang manpha le
na kongkate cu mei bang a lingmi
suang manpha tuah
na elkim pangte cu suangvalin
sahsakleh tung hi.
13 “Na mite cu keimah loli in
zilh tung a,
lemdaihnak le khantohnak pia tung hi.Ref 54:13 Jn 6:45;
14 Diknak le phatnakin ngiltik tung.
Bawlsiatnak le launak pen
luat tuk ci.
15 Midang ten a do haw tale
keima thu ngawlin
do na hi haw tuk hi.
A dotu pawpoh cu
16 “Mei zapin, hiamnam a bawltu
pumsupa cu keima bawl hi.
Mi thahnak tukin mah hiamnam
a mangtu ngalkap
a bawltu hei cu keimah ing.
17 Mahnaven iti bang zahin,
bawlmi hiamnam hei in hihen,
tong kha baan tukma hi.
Sual a nawntu
awnkam hempoh cu
donleh cikcek
thei khawng tuk ci.
Keima nadektute cu
pan tung a,
nehnak pia tung tin,
Topa in ti zo toh hi.”