53
1 Mipi ten, a thu hilh haw hi,
a sangtu um sap haw a
ni maw?
Hithu ah, Topa i khut
a mutu um sap haw a
ni maw?Ref 53:1 Jn 12:38; Rom 10:16;
2 Topa i deihnak bangin
a dektu cu thingkung bangin
po hi;
lei ko lak a,
po thingzung bang hi.
Zoh nop tukin a diangnak le
mawinak nei ma.
A lungmu le a mit uh
a latu tukin mawinak
imah nei ma.
3 Amah cu a zotsak uhmi le
a vawkthong uhmi hi.
Natnak le haksatnakte thuak hi.
Kuamah in, a zo hei
zo nuam haw ma.
Phukthong poh tin,
4 Mahnaven amah cu eimuh tei
siat theihnak a thuaktu hi.
A natnak uh puatu hei hi sih.
A siat theihnak le
a thuaknakte cu Pathian i bawlsiatnak
hi tin ngaisung hung.Ref 53:4 Mt 8:17;
5 Mahnaven eimuh tei sualnak hangin
maliam hi.
Thilpha ngawl a bawl uh hangin
vahnak tawk hi.
Bawlsiatnak a thuakmi cu
eimuh tei nunpatnak tuk hi.Ref 53:5 1Pet 2:24;
6 A paimi tuu bangin vakvai
khawng hung.
Eimuh tei nuamnak lam tekah
hawh thong hung.
Mahnaven Topa i dantatnak cu
a hum uhah hengtik hi.
A thuak tuk uhmi sualman
dantatnak tawk hung.Ref 53:6 1Pet 2:25;
7 “Bawlsiazet haw naven,
niamkhiatnak tuah
thuak kawko in,
kam khatno hei awn ma hi.Ref 53:7-8 Nung 8:32-33;
Ngawh tukin a hawhpih haw mi
tuuno bangin le
a mulmeh tukmi tuu bangin
kam khatno hei awn ma hi.Ref 53:7 Mang 5:6;
8 Amah cu man haw, thah tukin
a thukhen haw hi.
A thih tuk hei cu kuamah in
poi sa kha haw ma.
Eimuh, mihing tei sualnak hangin
thihnak tawk hi.
9 Thil sual bawl awng ngawl le
zolthu son awng ngawlmi
hi naven mipha ngawl tei khanah
koih langkhat haw hi.
Mihau tei lakah vui haw,”
tin ti haw hi.Ref 53:9 1Pet 2:22;
10 Topa in,
“A thuak tuk cu keima deihnak hi.
A thihnak cu ngaihdamnak
a hengtiktu biakpiaknak hi.
Kum ngeipi nungdamin,
a casuante mu tuk hi.
Ama sung pen ka tuptahmi
kim tuk hi.
11 Haksatnak a thuak nungten
lungdamnak tawk tuk;
A thuaknak cu a thawnthong ma hi
tih cu thei tuk hi.
Amah cu a dik, a manmi
keima nadektu a hih hangin
ka lungdam ing.
Mi tampi tei ca in
dantatnak thuak tuk a,
amuhte cu a sualnak haw
ngaidam tung.
12 Mah hangin amah cu
upatnak mun pia tung a,
mihau le mi ngil tei lakah
koih tung hi.
Lungkim zetin, a nunnak
a piak hangin mipha ngawl tei
lakah sialcih hi zo.
Misual tei sualman thuakin,
a sual haw ngaihdam ngetsak hi,”
tin ti hi.Ref 53:12 Mk 15:28; Lk 22:37;