50
1 Topa in,
“Mi pa khatin, a zi a maak bangin
ka mite hi maak bok
tukin maw na ngaih sut uh?
Mahti bang ahi tale ka maaknak lai
ilai ah kaw?
Mi pa khatin, a canote salah
a zuak bangin,
ngal matnakah zuakin maw
na ngaihsut uh?
Mah kha ma hi.
Nangmu sualnak hangin
ngalmatmi hi uh ci!
Thil sual na bawl uh hangin
hawlvawkmi hi uh ci.
2 “Itakaw ka mihingte pan tukin
ka hawh ten kua mah i otpih
tawk mang?
Itakaw ka sam ten
kuamah in,
na don uh ngawl?
Amuh hup tukin
nemcuam viang ma
ing maw ikaw?
Ka thu piaknak hangin
tuipi thuanthum kang khawng.
Luite cu phillawnin
cang khawng haw hi.
Tui a um ngawl hangin
tui sung ngasate thi khawng haw hi.
3 Vante hei thimtik thei ing.
Mithi ngai bangin a mitmai
ti liamluam khawng,” ti hi.
Topa Nadektu Thu Ngaihnak
4 Cungnungbel Topa in
son thiamnak lei pia.
Thabote ngil lehtik tukin;
zingsial ka beng vaktik,
a zilhmi thu thei theitu tukin hi.
5 Topa in theihtupnak
lungmu pia.
Amah cu langpang mang,
nung hei hek mang hi.
6 A vattu tei ca in ka ngumzaang
dawh ing; a zawnsaktute
kham mang hi.
Ka khamul botin,
ka mai ah cil a siak haw hei
liat mang hi.Ref 50:6 Mt 26:67; Mk 14:65;
7 A zotsaknak haw cu kei ca in
natik mang.
Itakaw titale Topa Pathian in
bawm hi.
A bawlsiatnak thuak haw thei tukin
pasal cuh ing,
mualpho in um tuk mang
tih thei ing.
8 Itahim titale Pathian cu
ka elah umin, thiancotik tuk hi.
Sual a nawn ngamtu akua
um haw kaw?
Thukhennak munah hawh pah nung.
Sual nawn himpo haw hen!Ref 50:8-9 Rom 8:33-34;
9 Topa amah cu mi pantu hi;
Akua in kaw khial ci,
a ti ngam tuk?
Sual a nawntu hempoh cu
pha thong khawng haw tuk hi.
Baalbu in, a muatmi van bangin
bo haw tuk hi.
10 Topa kihca in,
a sila awnkam a ngaitute,
na hawhnak uh lampi cu
khua a thim vangin
Topa cu muang un.
Na Pathian uh cu
ngaingam un hi.
11 Midang siatsuah tukin a suamtute,
na mi suamnak uhin,
nangmuh siatsuah tuk hi!
Topa in mah tin cangtik tuk a,
lungapnak thuak tuk uh ci.