48
Pathian Cu Mailam Ca Topa Hi
1 Maw Israel mite aw,
hu ngai hem un!
Judah casuante aw,
phano in ngai un!
Topa i min salin thutiam ci,
Israel Pathian bia ing ti ci.
Mahnaven na otmi cu
na kam bek hei.
Na lungmu sungah
imah umma hi.
2 Mah i humah ultung zetin,
“Kei cu khua thiangtho sung
ummi ing;
Israel Pathian muang ing hi;
Ama min cu Cungnungbel
Topa hi,” ti ci.
3 Topa in Israel lakah,
tanglaih cawngin thil a piang tukmi
hilh ham zo ing hi,
mahten thakhatin kimtik ing.
4 Na lungmu cu thik le daal bangin
khohzet tuk tihvang
thei ham zo ing.
5 “Ka pathian tei piantikmi le
ka milim tei hilh hamsa mi hi”
na tih theihngawlnak tukin
a cang laih ngawlin
hilh hamsa zo ing.
Ni dang laih cawngin
hilhhamsa zo toh ing.
6 Ka hilhsa hempoh
kim khawng zo haw,
ka hilhmi cu thudik hi,
tin na pom kul.
Atu-in, a heng tukmi
thil thak hilh tung.
Ni dangin ka phuan
awng ngawlmi thu hi.
7 Atu bekin cangtik tung hi.
Hitih bang hi cu
ni dang laih cawngin
a cang awng ngawlmi thu hi.
A heng awng zo tohmi
ahi tale ka theihsa poh
tituk ci.
8 Na hinsuk pepan mi dodaltu hi ci,
Muantak viangma ci tih cu
ka theihsa hi.
Mah hangin hi, hi thu
na theih awng ngawlnak le
awn kam khatno hei
na beng sung a hen
awng ngawlnak hi.
9 “Miten ka min
a thangphatnak haw tukin,
ka thinuknak cu sup ing.
Ka thin nemtik lehin
siatsuah tuk mang hi.
10 Ngun cu pum mei ah
a thiantik haw bangin,
thuaknak mei sungah
khingkhai ing hi,
Mahnaven man nei ngawl
na hihnak cu
cangcian zetin thei ing.
11 Mah hangin thil ka bawlmi hi
ka min ca bekin bawl ing;
Ka min cu thangsia in
umtik thei mang hi.
Sunloihnak vang keimata bek hi in,
kuamah in co haw tukma,”
ti hi.
Topa i Tenmi Sairas
12 Topa in Israel lakah,
maw Israel ka sam ten
ngai hem un;
Keimah cu Pathian ing.
Masabel le dawltabel vang hi ing.
Keimah bek hi Pathian ing.Ref 48:12 Isa 44:6; Mang 1:17; 22:13;
13 Leipi pianpatnak cu
ka khut tuah ka bawlmi hi;
Van khi ka khut tuah
ka zalhmi haw hi.
Lei le van ka sam ten,
thakhatin ka mai ah
hung haw tuk hi.
14 “Na venghawng un
khawmdun unna,
ngai hem un.
Ka tenmi ten Babilon
do tuk hi, tin
itih bang pathian ten
phuang ham thei haw ma hi.
Ka dehtik nuammi cu
dek tuk hi.
15 A lakah a awntu le
a samtu cu keimah ing.
Pui tul ing a, lawhtinnak
pia ing.
16 Nek unna, ka hilhmi thu hi
ngai hem un!
A pattungin nangmuh tei nelah,
imah im ngawlin hilh ing.
Ka hilhmi thu cu
kim leleng,” ti hi.
(Atu-in Cungnungbel Topa in
huham pia in hah hi.)
Topa In A Mitei Ca Tuptahnak
17 Israel i Pathian thiangtho,
nangmuh a pantu Topa in,
“Keimah cu Topa
na Pathian uh ing.
Na phatnak tukin a zilhtu le
na hawhnak tuk uh
lampi ah a puitu ing.
18 Ka thupiakmi ngai le uh ci
pha taven!
na hum uhah muicu thupha cu
ituk mahten
kang awng ngawlmi
luitui bangin luang tuk
naven maw!
Nangmuh tei nelah
nehnak cu tuipi thuanthum
mawkah tuicawk cu
atu le tu a hen lelem bangin
heng tuk naven!
19 Na casuan uhte cu
tuipi mawk a philnel zah
haw tuk a, leihumah
a pai thongmi hi tukma
20 Babilon pen tul un hi!
Luat zo uh ci hawh un!
Mah thu cu lungdamin
aupih un!
Khua hempoh ah than unna,
“ Topa in, a sila Israel
pan zo toh hi!” tin
au het un hi.Ref 48:20 Mang 18:4;
21 Topa in, a mihingte cu
a ko le a sazet mi
philnel lak pen a pui ten,
dangdumnak imah
thuak haw tukma.
A mu ca suangpi sung pen
tui puttik hi.
Suangpi cu kehtikin,
22 Mah hangin “Misual tei ca in
himnak umma,”
Topa in ti hi.Ref 48:22 Isa 57:21;