24
Topa In Lei Buppi Dantat Tuk
1 Topa in, leihum siatsuah khawngin khing diudeu tuk hi. Leipi cu linglettikin mihingte khenkhektik khawng tuk hi.
2 A kuakua hei hihen a tawh haw mi cu bangten khawng tuk hi. Thiampite le mipite, sila le a tote, a leitu le a zuaktute, sumcoihtu le a cawitute, mihaute le mi ca-ngahte, a tawh haw mi bangten khawng tuk hi.
3 Lei buppi cu khi in, sia khawng tuk hi. Topa in hilh zo tohin, a hilh bangin piang tuk hi.
4 Leihum cu ko in, thim khawng hi, leihum buppi cu a thakiam hi; lei le van cu sia khawng hi.
5 Mihingin Pathian dan pahbalin, kumkhua ca bawlmi a thukham cu siatsuahin leipi cu nawngkaitik haw hi.
6 Mah hangin leipi cu siatsuah tukin Pathian in tam hi. Leihum miten sualman thuak haw hi. A nungmi dawm dedeuh haw hi.
7 Sabit kungte thimin, sabit kam dedeuh hi. Lungdam thatuino in, a um awngte cu lungsiatnak tuah dim haw hi.
8 Nop zetin la a sak awngnak haw tingtang le khuangte cu cawl zo haw hi.
9 Silnak zu a in haw hei in, nop zetin lasaleh thei haw ma toh; zu i a uknak hei theileh haw ma toh.
10 Khuapi sung cu buai khawng hi; mihingte cu suakca nuam tekin inn sungah khahkhumdun khawng haw hi.
11 Mihingte lampi ah dingin, zu duhin au leilui haw hi. Nopnak imah umleh ma zo; nopnak cu ngamsung pen kumkhua phatin hawlvawk hi zo toh.
12 Khuapi cu siatsuah khawngin, a kongbiangte sia khawng hi.
13 Leihum ngam hempoh ah mahti bangin hi khawng haw tuk hi. An lak hun bo in olif ngah vatvawk khawng haw a, pa khatno hei tang ngawl a lak khawng haw hun bang tuk hi.
14 A tang calamte cu lungdam zetin lasa haw tuk hi. Nitumnak lamah a ummi ten Pathian i thawmngeng dan phuang haw tuk a,
15 nisuahnak lamah a ummi ten thangphat haw tuk hi. Tuipi thuanthum mawk tuan a um ten Israel i Pathian Topa pahcawi haw tuk hi.
16 Leihum ngam khawlabel ngamte tian Israel miphun, miphun dik, a thangphatnak la haw cu za tuk hung hi.
Mahnaven keima ca in muansan tuk umma. Bo dedeuh ing a, ka taksa luangpi in nangleh zo ma toh. Mi sonsiatu ten sonsia leleng haw in, a sonsiatnak haw cu a ni a ni-in, nase dedeuh hi.
17 Maw leihum mihingte, mulling hah, khuk thukpi umin, noh tei ca in thangsiah sa in um hi.
18 Mullinghah pen tai a tumtu cu khuk sungah cak haw tuk; khuk pen a taitultu cu thangin, awk tuk hi. Van pen nguahzu tawtokin, leipi dinnak hempoh hing khawng tuk hi.
19 Lei buppi cu khi-keh tuk hi.
20 Leipi cu zukham bangin lum tuk a, huihsia lak a deubukno bangin ua-uan tuk hi. Lei buppi cu a sualnakin delhpek nase leita zo hangin, tholeh thei tukma hi.
21 Topa in, humlam a um huham neitute le leihum a, mi uktute a bawlsiatnak hun heng tuk hi.
22 Topa in, lei kua sung a, thawngta bangin kumpite cu khawm khawng tuk hi. Amuhte bawlsiatnak hun a hen laih ngawl sung cu thawnginn sungah khum tuk hi.
23 Hade thim tuk; nisuak tukma; itakaw titale Cungnungbel Topa cu kumpi hi tuk hi. Jerusalem khua Zion Mual pen uk tuk a, mipi hotu ten a sunloihnak huham mu haw tuk hi.