19
Pathian In Izipt Dantat Tuk
1 Izipt ca in, a hengmi thu cu hi bangin hi.Ref 19:1-25 Jer 46:2-26; Ezk 29:1-32:32;
Topa cu manlang zetin meingo humah khungin, Izipt ah hung hi. A mai ah Izipt tei milimte cu hingin, Izipt mitei ngalphatnak cu bo hi.
2 Topa in, “Izipt ngam sungah amuh le muh dodunnak ngalthotik tung hi. Unau le unau, innnel le innnel vang ngaldun haw tuk hi.
3 Izipt tei tuptah susia khawng tung a, a lungmu haw siatsuah tung. A milim tei lakah bopnak ngen haw tuk, pol tei lakah lengin, aisantik haw tuk a, mithi hawvangte thu vaisiam pih haw tuk hi.
4 Izipt mite cu mi sehuai le mi pualthau tei khutsungah pia tung a, hehpihnak nei ngawl kumpi in uk tuk hi. Cungnungbel Topa keimah in hilh zo ing.”
5 Nail ngunpi cu tui dawmno tuk a, dem hehetno in kang khawng tuk hi.
6 A tuikakte cu uihzet tuk a, kang khawng bok haw tuk hi. Phaipheng le phokte thim khawng haw tuk hi.
7 Nail ngun mawk a cinmi, ankung hempoh ko khawng haw tuk a, huihin mutvawk khawng tuk hi.
8 Nail ngunpi sungah ngasa manin, pumcawm hempoh phu in tau haw tuk; a sio le a suukte phukthong khawng tuk hi.
9 Puan than bawltute a thinnau haw tuk hi.
10 Thiamtaktu le khutzung thiamnak neite thinkham, amthongin um haw tuk hi.
11 Zoan khua hotute cu misil ngeh haw hi! Izipt micipbel ten sil thu zilh haw hi. Ni dang laih kumpi le micip tei ai-awhtute ung, tin itin kaw kumpipa a hilh ngam haw?
12 Izipt kumpi pa aw, ilai ah haw kaw, na micipte a um khawng haw? Cungnungbel Topa in, Izipt tei ca in tuptahnak a neihmi cu hilh thei haw tuk naven!
13 Zoan le Memfis hotute cu misil ngeh haw hi! A miphunte haw lamhuaitu hi haw tuk naven lamhuai sual zo haw hi.
14 Topa in, lungmu tamnak pia in, a thuson haw vang buai khawng hi. Mahtak Izipt in thil sual bebek bawlin, zukham misil pa in ama luak hum lelengah a lup bangin, Izipt cu lum kawkawi hi.
15 Izipt ngam sungah mihau le mi ca-ngah, mi ngeng le mi nauta hihen, a bawm theitu kuamah um haw ma.
Izipt In Topa Bia Tuk
16 Izipt mite cu numei bangin a ngal nawm hun heng tuk hi. Cungnungbel Topa in, amuh bawlsia tukin khut a dan toh amuh haw ten a lau in, can tawtok haw tuk hi.
17 Amu ca Topa in, a ngaihsutsa mi a theihkik sial haw ten Izipt miten Judah mite cu lau leleng haw tuk hi.
18 Mah hun a hen ten Izipt khuapi pa nga ten Hebru awn mang haw tuk hi. Mahlai munah a ummi ten siatcamnak tuah thu a tep haw ten, Cungnungbel Topa i minin, tiam haw tuk hi. Khua pa khat cu, “Ni khuapi” tin ti haw tuk hi.
19 Mah hun a hen ten, Izipt ngamah Topa i minin, biaklandawh pa khat tiang haw tuk a, Izipt ngamah a minin suangphut haw tuk hi.
20 Mah mite cu Izipt ngamah Cungnungbel Topa um tih melciknak hi tuk hi. Mahlai mun a ummi ten, bawlsiatnak thuakin, bopnak ngen haw tuk a, Topa a sam haw ten amuh pantu tukin Topa in, mi pa khat hah tuk hi.
21 Izipt mitei lakah Topa cu langleh tuk hi. Mah hun ten Topa cu upatnak tuah bia haw tuk a, a lakah biakpiaknak le laksawng cawi haw tuk hi. A lakah thu kho zetin tiam haw tuk a, a thutep haw bangin bawl haw tuk hi.
22 Izipt mite cu Topa in, bawlsia tuk naven damlehtik tuk hi. Ama lamah hekkik haw tuk a, a thungetnakte theihsakin damtik tuk hi.
23 Mah hun a hen ten Izipt le Assiria tei laklawhah lampi zalzet um tuk hi. Hi ngam nihte cu baihno in zindun thei haw tuk a, munkhatah Pathian bia ngel thei haw tuk hi.
24 Mah hun a hen ten Israel cu Izipt le Assiria tuah kopdunin, a ngam thum haw cu lei buppi tei ca in, thupha conak hi haw tuk hi.
25 Cungnungbel Topa in, thupha pia tuk a, “Izipt ka mihing, Assiria ka khut a bawlmi le Israel ka tenmi, na hum uhah thupha um tahen tituk hi.”