10
1 Bolal tatak uh cei. Ka mihingte bawlsia nuamin, a dik ngawlmi dan bawl uh ci!
2 Mi ca-ngah le mi cimkham ten a co haw tukmi co haw ma naven a thu haw theihsak ma uh ci. Meivong le nu le pa nei ngawl ca-ngah tei nate sut uh ci.
3 Pathian in nohte a bawlsiat ten itin kaw na tih tuk uh? Na hum uhah ngam khawlapi pen haksatnak a hen ten itin kaw na um tuk uh? Bopnak zei in, a koi lakah kaw na tai tuk uh? Na thil neih uhleh na hauhnak uhte cu ilai ah kaw na sel tuk uh?
4 Ngaldonakah thi tuk uh ci, manin hawhpih vawk haw tuk hi. Mahnung hei ten Topa i thinuknak cu pha tukma laih; bawlsia tukin a khut cu dangsa in um leng laih hi.
Pathian In Assiria Kumpi Mang
5 Topa in, “Ka thinuktiktu le vahnakin ka manmi tembek cu Assiria hi.Ref 10:5-34 Isa 14:24-27; Nah 1:1-3:19; Zef 2:13-15;
6 Ka thin pulhangtiktu, Pathian kihca ngawlte do tukin Assiria hah ing. A thilte sut tukin le a mihingte lampi ah buak bangin sihpek tukin hah ing.”
7 Mahnaven, Assiria kumpipa in, mi thisan luang tukin tuptahnak na nei bok. Ngam tampi siatsuah tum hi.
8 Tuangkhawngin, “Ka ngalkap hotu ngalbawite cu kumpi ngeh haw hi!
9 Kalno, Karhhemish, Hamath le Arpad khua vang neh khawng bok ing. Samaria le Damaskas khuapi vang la zo toh ing.
10 Milim a biatu ngamte dantattu tukin ka khut li zo ing; a milimte cu Jerusalem le Samaria a, milim sangin tam saw haw hi.
11 Samaria le a milimte ka siatsuah khawng zo bangin Jerusalem khua le mahlai mun a biak haw mi milimte cu siatsuah khawng tung hi.”
12 Mahnaven Topa in, “Zion Mual le Jerusalem humah ka bawlmite a celh ten Assiria kumpi vang cu tuangkhawngin, a pualthau hangin dantat tung hi.”
13 Assiria kumpi in, “Keima bawl khawngmi hi! Ngil ing, cipleng ing a, theihtupnak vang nei ing. Ngam khat le ngam khat ngamngite cu siatsuah khawngin, a an cum mite vang la khawng ing a, khuicang bangin a mihingte cu sikpek khawng ing.
14 Leihum a ngamte cu vano bu bang haw hi, a hauhnak haw sum le paite cu vano tui lak bangin, baihno in la poh ing. Keimah hil tukin ha zap ngamtu kuamah um haw ma. Kamka ngamtu hei um haw ma hi,” tin tuangkhawng dimdem hi.
15 Mahnaven Topa in, “Heipi in, a mangtu sangin ngeng saw ing, ti thei ni maw? Hluah tuah thingattu sangin thupi saw ing, ti thei bok ni maw? Tembekin mihing cawi ngawlin, mihing saw in tembek cawi,” ti hi.
16 Cungnungbel Topa in, atu-in ankham mite bawlsia tukin natnak hengtik tuk hi. A taksa pumpi sung hawah natnak cu meikang bangin kang tuk hi.
17 Pathian amah, Israel tei vaknak cu mei alhin suak tuk hi. Israel Pathian thiangtho cu mei alhin suak tuk a, ni khat sungin ling le so tian kang khawng belh tuk hi.
18 Tupi camzet le lo ngam phazette cu natsia in, mihing a siatsuah bangin siatsuah khawng tuk hi.
19 Thingkung demno bek tang tuk, naupang tualleng hei in sial thei haw tuk hi.
Mi Demno Kikleh Haw Tuk
20 Israel tei sung pen a tang, mi demno ten amuh siatsuahtu ngam muang ngawltohin Israel Pathian thiangtho Topa saw a muan haw hun heng tuk hi.
21 Israel mi sung pen mi demno cu a cakmi a Pathian haw lakah kikleh haw tuk hi.
22 Atu-in, Israel mite cu Tuipi mawk a, philnel zah tam haw naven a kiklehmi cu demno bek hi haw tuk hi. Mi tam saw ca in, paihlalnak cu koihsak sa a hih hangin tawk hihim haw tuk hi.Ref 10:22-23 Rom 9:27;
23 Hi ngam buppi sungah Cungnungbel Topa in, a hilhsa bangin siatsuahnak hengtik tuk hi.
Topa In Assiria Bawlsia Tuk
24 Cungnungbel Topa in, Zion a um a mihing tei lakah, “Izipt miten na hum uhah a bawl zo haw toh bangin Assiria mite vangin bawl sia in, thuakhakzet nave uhcin lau pahsuh un.
25 A ngei ngawlin na hum uh a, bawlsiatnak ka hentikmi cu cawltikin, amuh saw siatsuah tuk toh ing.
26 Oreb suangpi ah Midian mite ka vah bangin Cungnungbel Topa keimah in, ka ngolhkang tuah vat tung. Izipt mi ka dantat bangin Assiria mi vang dantat bok tung.
27 Mah hun a hen ten a ngil zetmi Assiria tei khut sung pen nohte cu suahin, a kolhak haw cu na ngawng uhah vanngit hileh tukma toh hi,” tin ti hi.
Ngal Ten Sim Haw
28 Ngal ten Ai khua la in, Migron kalin, a an haw cu Mikmash ah koih haw hi.
29 Mah mualkawn cu kal haw in, Geba ah cam haw hi. Ramah khua mite cu tai khawng haw hi.
30 Gallim mite au hem un! Laishah mite ngai hem un! Anathoth miten don hem un!
31 Madmenah le Gebim khua mite cu thi tuk lau in, tai khawng haw hi.
32 Tuni in, ngal cu Nob khua ah um haw a, Zion mual le Jerusalem khuapi lamah khuttum suahin li haw hi.
33 Cungnungbel Topa in, thingkang khiak kulh bangin khiasuk tuk hi. Amu lak a, pualthaubel le a sangbel vang cu sahtanmi le nepsuk khawng hi haw tuk hi.
34 Tupi laizang a, thingte heipi tuah a phuh haw bang le Lebanon thing phabelte a phuh haw bangin Topa in, amuhte cu phuk tuk hi.