2
1 Mah hangin na unau Israel mite cu “Pathian mihing” tih le “ Topa i Deihmi,” tin sam un.
Muantak Ngawl Gomer le Israel
2 Ka cate aw, na nu uh thusonpih un, amah cu ka zi kha ngawltohin, kei vang a pasal ka hih ngawl toh hangin pano dang tuah a sualnak le numei pha ngawl a hihnak pen tawp tukin hilh un.
3 A tawp ma tale, a nu i pum sung pen a hin laih a, thacang a hih bangin a van silhte duk tung. Lei ko le ngam ko bangin bawl tung a, dangdumin thi tuk hi.
4-5 A ca tei lak hei ah hehpihnak nei tuk mang, amuhte cu zakca thei ngawl numei pha ngawl i cate haw poh. A nu haw in, “Ka lawmpa i lakah hawh tung, tui le an, tuumul le puan ngo, olif thau le sabittui pia tuk poh,” tin tita laih hi.
6 Mah hangin a lampi khahnakin kulhtian bawl tung, ling le so in, amah cu um tung hi.
7 A ngaihmi a lawm tei nung pen hil li tuk naven pha awng tukma hi. A zei li hei in, tawk tukma. Amah in, amasa ka pasal lakah pinleh tung, atu sangin amasa ka nundan hi nop saw, tin tituk hi.
8 Ama lakah an, sabit, olif thau le Baal biaknakin, a manmi sui le ngunte a piatu cu keimah ing hi tih hi thei awng ma hi.
9 Mah hangin ka piaksa mi an le sabitte cu ankung cop hun ten la kikleh tung a, vansilh tukin ka piakmi tuumul le pat puante vang la kikleh tung.
10 A van silhte duk khawngin, a ngaihmi a lawmpa i mai ah thacang kawngkolhin, umtik tung. Ka khut sung pen kuamah in pan thei haw tukma hi.
11 A nun nopnak puaite, kum sial puai le ha sial puaite, sabbath puai le biaknak lam puaite cu botik khawng tung.
12 Ka lawmpa tei piakmi tin, a tihmi sabit huan le theipi kungte vang siatsuah khawng tung. A sabit huan le a thingngah huante cu ngamkhingah cangtik tung ama, ngamsa ten siatsuah khawng haw tuk hi.
13 Keimah phawkngilin, Baal lakah namtui halin le a khi ngual le bengkhaihte tuah a lawmpa i nungzui kawkawi hangin siatsuah tung hi. Topa in hilh zo hi.
Topa In A Miphunte It
14 Mah hangin amah cu phillawnah pui kiklehin, itnak awnkam tuah lemleh tung hi.
15 A sabit huante cu pia kikleh tung a, Haksatnak Munlawn cu muansannak kongka in bawlsak tung hi. A neu laihin, Izipt pen a suahtul laih bangin ka lamah hekleh tuk hi.Ref 2:15 Josh 7:24-26;
16 ka pasal tin samleh tuk a, ka Baal tin sam tukma toh hi.
17 Baal i min cu samtik tukma toh ing.
18 Mah hunin, ka miphunte a liamsuah ngawlnak tukin lei a vakmi ngamsate le van a lengmi vanote tuah thutiam bawl tung hi. Ngaldonak hiamnamte, ngalnam, thal le thalcang hempoh lawl sak khawng tung a, ka miphunte cu lemdai zetin le ngimta zetin um haw tuk hi.
19 Maw Israel, nangmah cu
ka zi in bawl tung;
thumanzet le muantak zetin
um tung;
a kho lelengmi itnak le hehpihnak
lak tung a,
kumkhua in keima tatuk ci.
20 Ka thutiam khotik tung a,
keima ta hi tuk ci.
Keimah cu na Topa ka hihlam
thei tuk ci.
21-22 Mah hunin, ka mihing
Israel i thungetnak cu sangin;
leihumah nguahzutik tung hi.
Lei pen an, sabit le olif
suaklehtik tung hi.
23 Ngam sungah ka miphunte cu
kho zetin umtik tung a,
khangto in, mihauzet ah
cang tuk hi.
“It mang,” tin, ka tihmite cu
“It leh tung,”
“Ka miphun kha ma uh ci,” tin,
ka tihmite vang
“Ka miphun hi uh ci,” tin ti tung.
Amuh ten,
“Nang cu ka Pathian uh
hi ci,” tin tileh bok
haw tuk hi.Ref 2:23 Rom 9:25; 1Pet 2:10;