32
Esau Tawk Tukin Jakob Timtuah
1 Jakob cu tullehin lampiah, Pathian vancungmi ten tawk haw hi.
2 Jakob in amuh ten, “Pathian i ngalkap haw hi,” ti in, mah mun cu Mahanaimnote 32:2 Mahanaim tih cu Hebru awn hi a, Ngiahbuk pa nih tihnak hi tin minsa hi.
3 Jakob in Edom ngam Seir a tih haw mun a, ummi, a upa Esau tawk tukin mi hah hi.
4 A hahmi tei lakah, “Keimah Jakob, na umlawhpa in, ka bawipa Esau lakah kihcaknak tuah thucah ing. Laban lakah kum ngeipi umin, atu-in kikleh zo ing.
5 Khui le laak, tuu le keel, salnu le salpa nei ing. Ka u nangma mitmai pha co thei tukin hi bangin thu na cah ing hi,” tin hilh tukin hah hi.
6 A hahmi a kikleh haw ten Jakob lakah, “Na u Esau lakah hawh ung a, amah cu nangmah tawk tukin tul zo hi. Mihing za li tuah hung haw,” tin hilh haw hi.
7 Jakob cu lau in, a thinsuzet hi. A lak a um mihingte, tuu, keel, khui le kalauk cu khen nihin khen hi.
8 Jakob in, “Esau hengin, khenkhat a that vangin a dang khenkhat saw cu luat tuk hi,” tin a ngaihsut hang hi.
9 Jakob cu thungenin, “Pathian, ka pu Abraham le ka pa Isaak i Pathian, hu ngai zalin hi.” Topa, nangmahin, “Na ngam le na unau tei lakah kikleh inna, na lam tuangtik tung,” ti ci.
10 Na salpa ka lak a, na piakmi na hempoh le muantak na hihnak hi a cotu hi tukin dawmno hei tak mang. Imah nei ngawlin thiangkhut pa khat bek tuah Jordan ngun tan ing; atu-in mihing le ngan hon nih tuahin kikleh ing.
11 Ka u Esau i khutsung pen hu pan zalin, tin ngen ing, ka u Esau hung tuk a, numei le naupang hei khawih ngawlin that kawng kawn tih lauzet ing.
12 Na thutep bangin, “Na lam tuangtik tung a, casuan tampi pia tung; na casuante cu tuipi mawk a philnel zahin tam haw tuk a, sialcelh ngawl hi haw tuk hi, tin na tihmi cingleng zalin,” tin ti hi.Ref 32:12 Pian 22:17;
13 Mahlaiah zan khat a cam nungten, a u Esau laksawng pia tukin a neihmi lak pen a nuailam a bangin teng hi.
14 Keelpi za nih le keelcang sawm nih, tuu a pi za nih le tuu cang sawm nih,
15 nawitui sukmi kalauk sawm thum le a cano haw tek, khuipi sawm li le khui cang sawm khat, laakpi sawm nih le laakcang sawm khat hi.
16 Jakob in, ngan nam khat cu umlawhpa khat tek cingtikin, a lak hawah, “Ka maiah hawh unna, hon khat le hon khat khawladun thimin hawh un,” ti hi.
17 Masabel a hawhtu umlawhpa i lakah, “Ka u Esau in tawkin, ‘Na bawipa uh cu akua him?’ Ilai lamah hawh tuk nge cim? Na mai a, ngan a neitu akua kaw? tin, a dot ten,
18 ‘Hi ngan cu na sila Jakob ta hi, a bawipa nangmah Esau ca tukin laksawng a piakmi hi. Amah Jakob cu ka nungno uhah hung li laih hi.’ ”
19 Amasabel pa i lakah a tih bangin, a pa nihnak, a pa thumnak le a venghawng haw lakah “Esau na tawh uhten, bangten son un,” ti hi.
20 Noh ten, “Hi zuh hi, na salpa Jakob cu ka nungno uhah hung li laih hi,” tin ti un, ti hi. Jakob in ka mai a, ka hawhtikmi laksawng ten a lungmu nemtik deuh tung a, ka tawh ngangai ten ngaithiam thei kha tuk hi, tin ngaisung hi.
21 A laksawng cu mailamah hawhtikin, mah zan cu a ngiahbukah ngiak hi.
Jakob le Vancungmi Buandun
22 Mah ni tak, zan khuathim ten Jakob cu tho in, a zi pa nih, a zineu pa nih le a cano sawm le pa khat tuah Jabbok ngun tan haw hi.
23 A innkua cu tuipi ngalah a pui khawng ceng ten a neihmi thildang hempoh vang tuipi ngal lamah thiak khawng naven,
24 amah bek tang hi.
Jakob cu zing khuavak kuan tian mi pa khatin buan hi.Ref 32:24-26 Hos 12:3-4;
25 Jakob cu neh thei mang tih a theih ten, Jakob i khel nguhkhawm sung a sawhsak ten, a buandun lih haw laih takin Jakob i khel nguh cu pelh hi.
26 Mah a buantu pa in, “Hu hahin khuavak awn toh,” ti hi.
Jakob in, “Muicu na pia ma tale hah hihim tuk mang,” ti hi.
27 Mahpa in, “Na min akua kaw?” tin dong hi.
Jakob in, “Jakob ing hi,” ti hi.
28 Mahpa in, “Atu pepan na min cu Jakob hi tukma toh hi. Pathian le mihing tuah tawngdunin, na neh hangin na min cu Israelnote 32:28 Israel tih cu Hebru awn hi a, Pathian tuah buandun haw tihnak hi tih hi tuk,” ti hi.Ref 32:28 Pian 35:10;
29 Jakob in, “Na min hilh hemin,” tin ngen hi.
Mahnaven aman, “Ita ka min dong cim?” a tih ten, Jakob cu muicu pia hi.Ref 32:29 Daan 13:17-18;
30 Jakob in, “Pathian maicang mu zo naveng nungca laih ing hi,” ti in, mah mun cu Penielnote 32:30 Peniel tih cu Pathian i mai tihnak hi. tin minsa hi.
31 Jakob cu a khel nguh a pelh hangin a kebai in, Peniel a kaltan haw laih takin nisuak sesel hi.
32 Atu khan tianin, Israel i casuan ten Jakob i khel sawhpelhnak a tawh hangin nganhing khel nguh hum a, cik ei ngawlin sitta haw hi.