31
Laban Lak Pen Jakob Tai
1 Laban i capa ten, Jakob in, “Ka pa uh i neihmi hempoh a lak khawng hang ven hi bangin a hauh,” tin, a tih haw cu Jakob in zaleh hi.
2 Laban cu nidang bangin a mitmai pha lehma toh tih Jakob in mu hi.
3 Topa in Jakob lakah, “Na pu le na pa, na unau laicin tei umnak ngamah kikleh inna, na lakah umpih tung,” ti hi.
4 Mah hangin a ngan cinnak munah amah tawk tukin Rachel le Leah cu cah hi.
5 A lak hawah, “Ka hum a, na pa uh i mitmai cu nidang bang hi lehma toh, tih cu thei ing; mahnaven ka pa i Pathian cu ka nelah um leleng hi.
6 Ka zaangtha neihmi hempoh tuah na pa uh i na ka deh cu na pa nih uhin theileng poh uh ci.
7 Na pa uhin zolin, ka thaman hi vei sawm tian khel pepel zo naven, ka hum a, siatnak a hentik tuk cu Pathian in phal ma hi.”
8 Na pa uh Laban in, ‘A canzingmi keel pawpoh cu na thaman hi tuk hi,’ a tih ten keel hempohin, a canzingmi ca nei haw hi. A cankangmi kel pawpoh cu na thaman hi tuk hi a tih ten keel hempohin a cankangmi na nei haw hi.
9 Pathian in, na pa uh lak pen a ngan la in keimah pia hi.
10 “Ngan tei ca neih hunin, ka mangah, keelpi nawhtu keelcang cu a canmi, canzing le can kangmi ngeh haw tih cu mu ing.
11 Pathian i vancungmi ten ka mangin, ‘Jakob’ tin sam haw a, ‘Hi laiah um ing,’ tin donleh ing.
12 Vancungmi in, ‘Zo hemin, keelpi a nawhtu keelcang pawpoh cu a canmi, canzing le cankang ngeh haw hi. Na humah Laban i nundan ka muh khawng hangin, hitih bangin ka bawlnak hi.
13 Keimah phawhngilh ngawlnak suang na phutmiah olif sathau leihin, na thutepnak Bethel pen na lakah a langmi Pathian ing. Na suahnak khua le ngamah kikleh tukin na tuangtimin hi,’ ” tin hilh hi.Ref 31:13 Pian 28:18-22;
14 Rachel le Leah in, “Ka pa uh lak pen ka co tuk uh lo le lam imah umma hi.
15 Kohte cu ngamdangmi bangin ngaisung thongpoh ma maw? Kohte cu zuak in ka man uh a ngahmi hempoh tale mang khawng zo.
16 Pathian in ka pa i lak pen a laksakmi hauhnak hempoh cu keimuh le ka ca teita hi. Pathian i hilh bangin bawlpohin hi,” tin ti haw hi.
17 Mah hangin Jakob cu Kanaan ngam a pa i lakah hawh tukin tuangtim khawng hi.
18 A zi le ca cu kalauk humah khungtikin; a ngan hempoh cu mailamah hawhtik a, Mesopotamia ngam a um sungin, a ngahmi hempoh tuah tul hi.
19 Laban cu a tuu tei mulmet tukin hawhin, a um ngawl sungin Rachel in, a pa i innkua biakmi milim ngu hi.
20 Jakob in Aramean mi Laban cu zolin, a hawhtul tuk thu hilh ngawlin um hi.
21 A neihmi hempoh kengin tai hi. Cawl ngawlin Eufrates ngunpi cu tanin, Gilead mual lamah hawh hi.
Laban In Jakob Hil
22 Ni thum nungten Jakob tai hi tin, Laban cu hilh haw hi.
23 Laban in, a umlawh cu samin, Jakob cu ni salih sung hil haw a, Gilead ngam mualhum pen pha haw hi.
24 Mah zanin Laban i mangah Pathian langin a lakah, “Ngallingin hi, Jakob cu iti hei in nawmcan pahsun,” ti hi.
25 Laban in, a phat ten, Jakob cu mual humah ngiahbuk na sa zo hi; Laban vang Gilead ngam mualhumah ngiahbuk sa bok hi.
26 Laban in Jakob lakah, “Ita keimah zolin, ka canute ngalmatmi numei bangin taipih cim?
27 Ita kei zolin, keimah hilh ngawlin taikuh cim?” Na hilhta ahin, na hawh ten lungdamnak le lasaknak tuah khuang le daak le tingtang tumthahin hen tuk naveng.
28 Ka ihmi ka canute tale a cate haw hei nam hihtik ma ci. Na bawlmi hi thilpha ngawlzet hi.
29 Nangmah siatsuahnak tuk cu ka thu hi. Mahnaven zantakin, na pa i Pathian in, “Jakob khi a nawmcan zawngin bawl pahsun,” tin ti hi.
30 Na tainak hi na innah manlangin, na hen nuam hang hi tih cu thei leng ing. Mahnaven ita ka milim ngu nge cim? tin ti hi.
31 Jakob in, “Na canute hi longleh kha kawn cin tih ka lau hangin hi.
32 Mahnaven ka innkuapih pa kha khat lakah na milim na mu tale, amah cu thah hihen. Ka mihing uhte hi thu theihpihtu hi haw tuk a, zei inna, nata ahi mi pawpoh cu la in,” ti hi. Rachel in, a pa i milim ngu hi tih cu Jakob in thei kha ma hi.
33 Laban cu Jakob i ngiahbuk sungah tumin zei hi; mahten Leah i ngiahbuk sungah le a silanu pa nih tei ngiahbuk sungah tum leleu naven a milim cu mu ma hi. A nungdawlbelin Rachel i ngiahbuk sungah tum hi.
34 Rachel in, a innkua milim cu na la in kalauk puakmi dip sungah khumin khunpek hi. Laban in ngiahbuk sung hempoh ah zei naven mu ma hi.
35 Rachel in, a pa i lakah, “Na tum ten ka din ngawl hi ka pa na thinuk zal pahsun, ka bawipa, numei daan ka neih laihtak hang,” ti hi. Laban in zei li naven a innkua milim cu mu ma hi.
36 Jakob cu a thinuk zetin, “I mawhnak nei in, daan ka palcatmi a um hangin maw kei hillehin, na zei lih cu?
37 Atu-in ka thil a venghawngin zei khawng zo ci; na thil i beek muhmi nei cim? Na mu tale na innkua le ka innkua tei maiah suah hemin; akua man saw kam hung tih soncat haw hen.
38 Na lakah kum sawm nih sung pikpek um ing, mah ka um sungin, na tuu le na keel vei khatno hei a ca haw sia awng ma si. Na tuuhon sung pen tuucang cik vei khatno hei ei awng ma laih ing.
39 Sahang ten na tuu a mat haw ten, keima sual kha ma hi tih theihtupnak tukin a cik na lakah hunpih awng mang, keimahno in thuak ing. Sunah hei hihen, zanah hei hihen, nguca ten a ngu haw tale kuanin ti ci.
40 Vei tamzet sun nisa thuak ing, zan khawsik vang thuak ing. Hihbu thei awng mang.
41 Kum sawm nih kim cikcek tian na lak a, ka um sung hempoh mahti bangin thuak lo ing. Na canu pa nih tei ca in kum sawm le kum li sung na nadek ing; na tuuhon kum luk sung cing ing. Mahti bang hi napi in, ka thaman vei sawm, vei zain khin pepel ci.
42 Ka pa i Pathian, Abraham i Pathian le Isaak i biakmi Pathian ka nelah a umma ahin, ka khut thacangin hawlvawk zo tuk ci. Pathian in ka cimkhamnak le ka nadehmi amuh hangin dantatin nangmah liat,” ti hi.
Jakob le Laban Thukimnak
43 Laban in, “Hi numeite hi keima canute haw hi; na cate vang hi keima cate hi haw in, ngan honte le na muhmi hempoh vang hi keimata ngeh haw hi. Mahnaven ka canute le a ca tei ca in imah bawlleh thei ma toh ing.
44 Mah hangin hung inna, thutepnak bawl saw nung, mah thutep sialsiahnak tukin suangtian bawl nung,” tin Jakob cu ti hi.
45 Mah hangin Jakob in suangpeek pa khat la in, phawhngilh ngawlnak suang phut hi.
46 A umlawhte cu suang tiang tukin hilh hi. Suang cu tiang haw in, mah suangtian el pen an ei haw hi.
47 Laban in Jegar Shaduthnote 31:47 Jegar Shahadutha tih cu Aramik awn hi a, Theihtiknak suangseh tihnak hi. tin le Jakob in Galeednote 31:47 Galeed Hebru awn hi a, Theihtiknak suangseh tihnak hi. tin minsa hi.
48 Laban in, “Hi suangtian cu nangmah le keima laklawhah thutheitu hi tuk,” ti in, mah mun cu Galeed tin samta haw hi.
49 Laban in, “A khehdun uhten Topa in hu cingkhawi zal hen,” ti in, mah mun cu Mizpahnote 31:49 Mizpah tih cu Hebru awn hi a, Hilai pen ohte cingkhawi tuk hi tihnak hi. tin minsa haw hi.
50 Laban in Jakob lakah, “Ka canute siatsuahin, zi dang na huai tale keimah in ka thei ngawl hei in, Pathian in mu leleng hi tih thei in hi.
51 Hilaiah eimu pa nih laklawhah phawhngilh ngawlnak suangphut vang um leng hi.
52 Hi suangseh le phawhngilh ngawlnak suangphut cu a pa nih haw in, a thu uh a theitu hi haw tuk hi. Nangmah do tukin hi suangtian hi kal tuk mang, nang vangin keimah do tukin hi suangtian hi kal pahsun.
53 Abraham i Pathian le Nahor i Pathian cu a laklawh uh a, thusattu hi tuk,” ti hi. Jakob in, a pa Isaak i biakmi Pathian min tuah thutiam hi.
54 Ngan pa khat ngo in, mualhumah biakpiaknak bawlin le an ei tukin innkua pihte sam hi. An a eih nung haw ten mualhumah cam haw hi.
55 A zingten Laban cu zingtungno tho in, a tute le a canute cu thutta in thupha a piak ceng ten a khua lamah kiklehta hi.