8
Simphuk
1 Topa in Moses lakah, “Kumpi lakah hawh inna, Topa i thu cu hitih hin hi, ka mihing ten keimah a biak theihnak haw tukin hahin hi.
2 Na hah nuam ma ahi tale, na ngam cu simphuk tuah dantat tung hi.
3 Nail ngunpi cu simphuk tuah dim tuk hi. Ngunpi sung pen tul haw tuk a, na kumpi inn le na zaunak khan, na zaunak hum, na khutnuai bawite le na mihing tei inn tianin tum haw tuk hi. Na thukaam le na beel sung tianin heng khawng haw tuk hi.
4 Na mihing, na khutnuai bawite le na hum tianin dawk susuih haw tuk,” ti hi.
5 Topa in Moses lakah, “Aaron lakah, ‘Tuipi humah hihen, luitui humah le tuiting humah hei hihen na thiangkhut zak inna, Izipt ngam sungah simphuk tultikin hi,’ tin hilhin,” ti hi.
6 A tih bangin Aaron in, a thiangkhut cu tui humah a zakto ten simphuk tul ngangai haw a, Izipt ngam cu dim cucung haw hi.
7 Mahnaven mitzial thiamte vangin a mizial haw tuah simphuk cu a ngam hawah suaktik bok haw hi.
8 Kumpipa in Moses le Aaron cu samin, “Keimah le ka mihing tei lak pen simphuk a laksak theihnak tukin Topa i lakah thunget sak unna, Topa i lakah biakpiaknak bawl thei tukin na mihing uhte cu hah tung,” ti hi.
9 Moses in, “Simphuk cu na inn uh hempoh sung pen tai khawngin, Nail ngun sung bekah um tukin ituk ten kaw nangmah le na khutnuai bawite le na mihing tei ca in thu ka nget tuk; a hun hilhin,” ti hi.
10 Kumpipa in, “Zingten ngenin,” ti hi.
Moses in “ Topa ka Pathian uh bang pathian dang umma hi tih na theihnak tukin na tihnak bangin hi ngangai tuk hi.
11 Nangmah le na inn hihen, na khutnuai bawite le na mihingte hihen, zamsanin Nail ngun sung bebekah um haw tuk,” ti hi.
12 Moses le Aaron cu kumpipa i lak pen tul haw in, Moses in Topa i lakah kumpipa lak pen simphuk tul tukin thungen hi.
13 Moses i ngetnak bangin Topa in kimtikin innsung, huan sung le lo sung a, ummi simphuk thi khawng haw hi.
14 Izipt miten simphuk cu a honpi, sehkhawmin, a ngam haw cu simphuk ngim uih tuah dim hi.
15 Kumpipa in simphuk thi khawng zo haw tih amuh ten a lungmu cu khoh leleu hi. Topa i hilh hamsa bangin Moses le Aaron i thu cu ngai nuam ma leng hi.
Thosi
16 Topa in Moses lakah, “Aaron lakah, ‘Na thiangkhut tuah lei vat inna, Izipt ngamsung hempoh a leivul cu thosi in suak tuk hi,’ tin hilhin,” ti hi.
17 Mah hangin hi. Aaron in, a thiangkhut tuah lei cu vat hi. Izipt ngam sungah leivul hempoh cu thosi in suak khawng haw in, mipi le nganhing tian khuh khawng haw hi.
18 Izipt ngam a, mitzial thiam ten thosi cu bawl tum bok haw naven bawl thei haw ma hi. Mun tihkimah thosi a dim khawng hangin,
19 a mitzial thiam ten kumpi lakah, “Hihi cu Pathian i bawlmi!” tin ti haw hi. Mahnaven kumpi i lungmu cu abang lengin khohin, Topa i hilh hamsa bangin Moses le Aaron i thu cu ngai nuam ma laih hi.Ref 8:19 Lk 11:20;
Tho
20 Topa in Moses lakah, “Zingtungno in ngunpi lamah kumpi a hawh ten tawk tukin hawh inna, a lakah, Topa in, keimah na biak theihnak tukin ka mihingte hahin hi.
21 Na hah ma ahi tale nangmah le na khutnuai bawi, na mihing tei humah le na inn sungah tho dimtik tung, tin atu-in tiamsa ing. Izipt mitei inn le a dinnak lei tianin, tho dim khawng tuk hi.
22 Mahnaven ka mihing tei umnak Goshen ngam cu tho pa khatno hei hengtik tuk mang. Keimah, Topa ka hihlam na theihnak tukin hi.
23 Ka mihing le na mihing tei laklawhah deidatnak bawl tung hi. Mah nalamdang cu zingten heng tuk hi, ti hi,” tin hilh hi.
24 Topa in tho cu sialcelh ngawlin hah ngangai in, kumpi inn, a khutnuai bawi tei innah le Izipt ngamsung hempoh ah dim menmun haw hi. Izipt leingam hempoh tho in siatsuah khawng hi.
25 Kumpipa in Moses le Aaron samin, “Hawh unna, na Pathian uh lakah biakpiaknak cu hih ngam sungah bawl un,” ti hi.
26 Moses in, “Mahti bang cu pha tuk ma hi,” itahim titale Topa ka Pathian lakah biakpiaknak tuk nganhing cu Izipt mitei ca in deihawh viang tukma hi. Biakpiaknak bawlin ka nganhing thah uhmi cu Izipt miten amu haw tale, suang tuah keimuh sep hum haw tuk hi.
27 Ka Pathian uh i thupiaknak bangin Topa i lakah biakpiaknak bawl tukin phillawnah ni thum sung ka hawh uh kul, tin ti hi.
28 Kumpi in, “ Topa na Pathian uh lakah biakpiaknak bawl tukin khawlazet tian hawh tuk ngawl na hi uh tale ngamkhingah hah tung hi. Keima ca in thungen un,” ti hi.
29 Moses in, “Ka hawh bek ten Topa i lakah thungen tung a, zingten tho cu nangmah le na khutnuai bawi tei lak pen le na mihing tei lak pen pai khawng tuk hi. Mahnaven ka mihing ten Topa i lakah biakpiaknak a bawl theihnak haw tuk thuah zolleh hihim toh pahsun,” ti hi.
30 Moses cu Kumpipa lak pen hawhin Topa i lakah thungen hi.
31 Moses i ngetnak bangin Topa in kimtik hi. Kumpi, a khutnuai bawi le a mihing tei lak pen tho cu pa khat hei tang ngawlin tham pilpial haw hi.
32 Mahnaven Kumpi i lungmu cu khohleh lelengin Israel mite cu tultik nuam hihim ma hi.