7
1 Topa in Moses lakah, “Kumpipa i lakah nangmah cu Pathian bangin bawl tung a, na u Aaron cu na profet hi tuk hi.
2 Ka thupiakmi hempoh Aaron hilh tuk ci, amah in kumpi lakah a ngamsung pen Israel mi tultik tukin hilh tuk hi.
3 Mahnaven kumpi i lungmu cu khotik tung a, Izipt ngam sungah thasiahhuai a phunkim ka bawl hei in,Ref 7:3 Nung 7:36;
4 kumpi in, na thu uh ngai tukma hi. A ngam haw cu nase zetin bawlsia tung a, Izipt mite cu nase zetin dantat tung hi; mahten ka mihing Israel mite cu ahon ahonin Izipt ngam pen puitul tung hi.
5 Izipt mitei humah ka baantha ngil ka zak bek ten, Israel mi cu a ngam haw pen puitul tung a, keimah hi Topa ngangai ka hihlam thei haw tuk,” ti hi.
6 Topa i thupiak bangin Moses le Aaron ten bawl haw hi.
7 Kumpi lakah thu a hilh haw ten Moses cu kum sawm liat hi a, Aaron cu kum sawm liat le kum thum hi.
Aaron Thiangkhut
8 Topa in Moses le Aaron lakah,
9 “Kumpipa in, na thungai uh le uh ngawl thasiahhuai nalamdang bawl un, tin, a titale, Moses nangin Aaron lakah, na thiangkhut la tuk ci a, kumpipa i maiah vawk inna ngul suaktikin,” ti hi.
10 Mah hangin Moses le Aaron cu kumpipa lakah Topa i thupiaknak bangin bawl haw hi. Kumpipa le a khutnuai bawi tei maiah Aaron in, a thiangkhut cu a vawk ten ngulin suak ngangai hi.
11 kumpipa in, a micip le a mitzial thiam samin, a mitzial thiamnak haw tuah Aaron i bawl bangin bawlbok haw hi.
12 A thiangkhut haw cu vawkin ngul suaktik bok haw hi. Mahnaven a ngul cu Aaron i ngulin thon khawng hi.
13 Topa in, a hilh hamsa bangin kumpipa i lungmu cu khoh zetin Moses le Aaron i thu ngai nuam hihim ma hi.
Izipt Ngamah Siatnak Heng
Thisan
14 Topa in Moses lakah, “Kumpi i lungmu cu khohzet laih thong a hih ten, ka mite hah nuam hihim ma hi.
15 Kumpi cu zinglamin Nail ngun elah a hawh ten tawkin hi. Ngun mawk pen na ngak inna, ngul a cang awngmi thiangkhut cawi in hi.”
16 Kumpi lakah, “Hebru mitei Pathian Topa in, na lakah hahin, ka mihing ten phillawnah keimah a biak theihnak haw tukin ka mihingte cu hah hen, tin ti hi. Mahnaven tutiangin, a thu cu ngai nuam kha ma ci.
17 Atu-in Topa in: ka bawl tukmi cu na muh ten thei tuk ci. Zo hemin, hih thiangkhutin ngun tuivaat tung a, tui cu thisanin cang tuk hi.Ref 7:17 Mang 16:4;
18 Ngasa thi haw tuk a, tui cu a uihzet tuk hangin Izipt miten ngun a tui cu in thei haw tukma hi, tin hilhtik hi”.
19 Topa in Moses lakah, “Aaron, na thiangkhut la inna, Izipt ngamsung a, ummi lui, ngun, tuiting tuikhuk sung a, tui le tui hempoh tei humah na thiangkhut cu dangto in hi. Tui cu thisanin cang tuk a, Izipt ngamsung khua hempoh i tuikuang sung a, tui le suangbeel sungah a cum haw mi tui tianin thisan suak khawng tuk hi, tin hilhin hi,” ti hi.
20 Moses le Aaron in Topa i thupiak bangin bawl haw hi. Kumpi le a khutnuai bawi tei mai cilcel pen Aaron in, a thiangkhut cu dangto in tuipi cu vaat hi. Mahbek ten tui cu thisanin suak khawng hi.
21 Tui sung a, ngasa hempoh thi khawng haw hi; uihzet taktoh cu Izipt miten ngun a tui in thei haw ma hi. Izipt ngam cu thisan bebekin dim hi.
22 kumpipa i mitzial thiam ten a thiamnak haw tuah mahtibang cu bawlbok haw hi. Kumpi i lungmu cu abangleng khohin, Topa i a hilhhamsa bangin Moses le Aaron tei thu cu kinmawh kha viangma hi.
23 Hi bang nalamdang hei kinmawh kha ngawl kumpipa cu a kumpi innah kikleh hi.
24 Izipt mi hempoh ten ngun a tui cu a in theih ngawl toh haw hangin, tui mawkah tuikhuk kuat tawtok haw hi.
25 Topa i tuipi a vah sawng ni salih ngei hi.