16
Manna Cangho le Vaniim Ciik
1 Elim pen Israel mi honpi cu tulin, Izipt pen a tul haw sawng ha nihnaknote 16:1 Ha nihnak tih hi cu Hebru awnin ‘Lyyar’ ti haw in, April ha lang pepan May ha lang sung tian hi ni sawm le ni nga ni-in, Elim le Sinai laklawh a, ummi Sin phillawn heng haw hi.
2 Mah phillawn pen Moses le Aaron lakah a venghawng haw in phu haw hi.
3 “Izipt ngamah Topa in, a that khawngsawta ahin, deih nave ung! Izipt ngamah cik kuangkilin, cik le an ka duhzah uh ei ung. Mahnaven nangmuh ten tulpih uh ci a, hilai phillawnah ngilkialin thitik khawng tuk uh ci,” tin ti haw hi.
4 Topa in Moses nelah, “Atu-in van pen na venghawng uh ca in, nguah bangin an kulhsuktik tung hi. Israel mi cu nisialin, a ngiahbuk pen tulin, mah ni sung eih thamin cangho khul haw hen hi. Ka thupiakmi a zui haw le zui haw ngawl thiatha zo tung.Ref 16:4 Jn 6:31;
5 Ni luk ni-in, ni dang a khulmek haw i letnihin khul haw hen a, eih tukin tuangtim haw hen,” ti hi.
6 Mah hangin Moses le Aaron in Israel mi venghawng lakah, “Tuni taklamin Izipt ngam pen ohte a suahtu cu Topa hi tih thei tuk uh ci.
7 Zinglam ten Topa i sunloihnak mu tuk uh ci. A hum a, na phuknak uh thei zo hi. Hi zuh hi! Topa i humah phu uh ci. Itahim titale kohte cu a thuhilhmi hilh sawlawntu poh ung,” tin ti haw hi.
8 Moses in, “Taklam eih tukin cik a piatu tuk le zinglam eih tuk na deih zah uhin cangho a piatu tuk cu Topa hi. Itahim titale vei tamzet a hum a, na phuk uhmi cu za zo hi. Kohte thawthong cu imah son tak ma ung hi! Na phuknak uh cu keimu humah kha ma hi; Topa i hum saw ah,” ti hi.
9 Moses in Aaron lakah, “Israel mi venghawng lakah, ‘Hung unna, Topa i maiah ding un hi; itahim titale na phuknak uh thei zo hi,’ tin hilhin,” ti hi.
10 A venghawng haw humah Aaron a ot bek ten phillawn lam hek haw a, phawhkhak ngawlin Topa i sunloihnak cu meingo humah lang hi.
11 Topa in Moses lakah,
12 “Israel tei phuknak cu za zo ing; amuh tei lakah, ‘taklam khuathim lulup ten eih tuk cik ngah tuk uh ci a, zinglamah na deihzah uhin an ngah tuk uh ci. Topa keimah cu a Pathian haw ka hihlam thei haw tuk hi,’ tin hilhin hi,” ti hi.
13 Taklamin vaniim tampi heng haw a, Israel tei ngiahbuk elkim cu dim khawng haw hi. Zinglamin, a ngiahbuk haw elkimah daita thuah khat caksuk hi.
14 Mah daita cu a ko ten phillawn humah na phun khat, padildel, a pekzetmi, lei hum a, tuikhal padildel bang na um hi.
15 Mahmi cu Israel mi in amuh haw ten i him tih thei ngawlin pa khat le pa khat, “I kaw?” tin dongdun pepel haw hi.
Moses in amuh tei lakah, “Hihi Topa in, na eih tukin cangho a piakmi hi.Ref 16:15 1Kor 10:3;
16 Topa i thupiak bangin nangmuhno na kulzah uh tek khul un, mi pa khat ca in khuat nih ten na khul unna, ngiahbuk sung a, ummi venghawng ca in, a kulmi zah tek na la un hi,” tin ti hi.
17 Israel miten Moses i hilh bangin bawl haw hi; mi khenkhatin tampi khulin, a khenkhat ten demno khul haw hi.
18 A teh haw ten tam saw deuh a khulmi ten tam nei cuang haw ma, demdeuh a khulte vangin demno nei cuang sap haw ma hi. A khultu hempohin, a kul zah tenin khul na hi haw hi.Ref 16:18 2Kor 8:15;
19 Moses in, “Zingten eih tuk tin, akua hei in koih pahsuh un,” ti hi.
20 Mahnaven mi khenkhat cu Moses i thu ngai ngawlin cangho dawmlaihno cu zingten eih tuk tin koih haw hi. A zingten mah a koihte cu sia khawng a, than dimin, a uih leita hangin, Moses cu a hum hawah thinukzet hi.
21 Israel miten zingsialin, a kul zah haw ten khul mek haw hi, mahnaven sunlam ni a sat ten lei hum a, tangmi cu zung khawng leng hi.
22 Ni luk ni-in, an cu mihing pa khat ca in letnih tamin khuat liat ten a khul haw ten, Israel mi puitute hungin, mah thu cu Moses lakah hilh haw a,
23 Moses in, “ Topa i thupiakmi cu hi bangin hi, ‘zingten colhup ni thiang hi a, Topa i ca in mang tuk hi. Em na nuam uhmi atu-in em unna, huan na nuam uhmi atu-in huan un hi. Na khamval hempoh cu a dangno in cum unna, zingten eih tukin koih un,’ ti hi,” tin hilh hi.Ref 16:23 Suah 20:8-11;
24 Moses i hilh bangin a khamval haw cu a zing tianin koihin, khing viang ma hi; thanlung vang umma hi.
25 Moses in, “Hihi tuni in ei un; itahim titale tuni cu Topa i ca in Sabbath a hih hangin pualeu lamah imah mu tukma uh ci.
26 Na an tuk uhin ni luk sung khul unna, ni salihnak cu colhup ni a hih hangin, um tukma toh,” ti hi.
27 A ni salih ni-in, mi khenkhat ten an zei tukin pualamah hawhin zei leng haw naven mu haw ma hi.
28 Topa in Moses lakah, “Itihzah tian kaw ka thukham le ka daan zui nuam ngawlin na um tuk uh?
29 Colhup ni a bawlsaktu cu Topa keimah ing hi, tih thei un, ni nih ca thamin, ni luk ni khin an pia ing. Ni salih ni cu a kuakua hei hihen mai umnak tekah um hi tuk hi. Akua hei hihen mai inn pen tul hi tukma,” ti hi.
30 Mah hangin ni salih ni-in Israel mite cu cawl haw hi.
31 Israel miten mah an cu mannanote 16:31 Manna tih cu Hebru awnin “I kaw?” tihnak hi tin sam haw hi. Manna cu Nanaan cinote 16:31 Nanaan ci cu Koriander ci tih hei in sam haw hi. bang hi. Ngo in, a uk daan cu khuaitui helmi cangho pek bang hi.Ref 16:31 Mipum 11:7-8;
32 Moses in, “ Topa i thupiak cu hitih hin hi, Izipt ngam pen tultik ing a, phillawn sung na hawh uh laihin, na eih tuk uh ka piakmi an hi, tih cu na casuan tei muhleh tukin khuat nihin kem un,” ti hi, tin Israel mipi tei lakah hilh hi.
33 Moses in Aaron lakah “Beel pa khat la inna a sungah manna cangho khuat nih thunin; na casuan tei ca in Topa i maiah koihin,” ti hi.Ref 16:33 Heb 9:4;
34 Topa in Moses lakah thu a piak bangin Aaron in bawlin thutiam koihnak kuang maiah a himnak tukin koih hi.
35 Israel miten Kanaan ngam a hen haw laih ngawl, kum sawm li sung cu manna ei haw hi. Manna cu panmun a suumnak, Kanaan ngam a hen haw tianin ei haw hi.Ref 16:35 Josh 5:12;
36 (Omernote 16:36 Omer pa khat cu khuat nih hawng hi. pa khat cu efah pa khat i khen sawm khenkhat hi.)