9
Judah Ten A Ngalte Siatsuah
1 Adar ha, ni sawm le ni thum ni cu heng hi. Mah ni cu kumpi thuthatmi a bawlsuak ni haw, Judah mi huatu ten Judah tei humah thincimin thilpha ngawl bawl tukin a ngaihsut ni haw hi. Judah mite saw in, neh lehlam haw hi.
2 Mah ngamsung khua a, Judah mi umnak veng tihkim pen Judah mi a siatsuah nuamtute siatsuah tukin Judah mite cu munkhatin, tangkhawm haw hi. Mi hempoh ten Judah mite cu lau haw in, a langpang theitu tuk kuamah um haw ma hi.
3 Ngamkhen uktu bawi, ngamuktu bawi, bawi dadang le kumpipa i palai hahmi ten Judah mi cu bawm haw, itahim titale Mordekai a lau haw hang hi.
4 Kumpi innah Mordekai cu thuneitu hi in, a thuneihnak khang dedeuh tih cu Persia ngam sungah zak tenmi hi.
5 Judah miten a ngal haw cu amu nuam bang bawl haw hi. Ngalnam tuah satin, thatin, siatsuah khawng haw hi.
6 Susa khuapi hei ah Judah miten mihing za nga that haw hi.
7-10 Judah mi a ngaltu Hammedatha i capa Haman i capa sawmte cu: Parshandatha, Dalfon, Asfatha, Poratha, Adalia, Aridatha, Parmashta, Arisai, Aridai le Vaizatha vang that haw naven kuamah i thil hei lonsak haw ma hi.
11 Mah ni lengin, Susa khuapi ah mi izong that haw tih cu kumpipa hilh haw hi.
12 Kumpipa in, kumpinu Esther lakah, “Susa khuapi bebekah Judah miten mihing za nga le Haman i capa sawm that zo haw hi. Ngamkhen dangah iti zahin that haw nen tim! I deih laih kam? Pia tuk laih ing. Na deihmi hilh hih poh inna, pia tung,” ti hi.
13 Esther in, “Kumpipa, na lung a kim tale Judah miten tuni in, Susa khuapi ah a bawl haw mi hi zing hei ten bawl hih haw hen. Haman i capa sawm tei luang cu khai hupnak humah khai hihen,” ti hi.
14 Esther tihmi bangin kumpipa in thupia paihin, Susa ah thuthan vawk pilpel haw hi. Haman i capa sawm tei luang cu mipi muhin khai haw hi.
15 Adar ha, ni sawm le ni li ni-in, Judah mite cu munkhatah khawmdun haw in, Susa khuapi ah a dang mihing za thum that haw naven kuamah i thil hei lonsak haw ma hi.
16 Ngamkhen tihkimah Judah mite cu tawkdunin, tangkhawm haw hi. Amuh huatu a ngal haw cu mihing thawng sawm salih le thawng nga that haw zo. Mahnaven a thil haw lonsak haw ma.
17 Mah ni cu Adar ha, ni sawm le ni thum ni hi. A zing ni sawm le ni li ni cu thahdunnak um ngawlin lungdam puai bawl ni-in, mang haw hi.
18 Susa khuapi a Judah miten ni sawm le ni thum ni le ni sawm le ni li ni-in, mi that haw a, ni sawm le ni nga ni-in, a colh haw hangin ni sawm le ni nga ni cu puai ni-in mang haw hi.
19 Khuano lam khawla deuh a, um Judah miten Adar ha, ni sawm le ni li ni cu lungdam puai bawlin, an eih puai a bawl haw ni le pa khat le pa khat laksawng piakdun ni-in mang haw hi.
Purim Puai
20 Mordekai in, hi thu a piangmi hempoh cu lai sungah khum khawng hi. Persia ukmi ngamsung a, um Judah mi hempoh lakah lai nganin,
21 kumsialin, Adar ha, ni sawm le ni li ni le ni sawm le ni nga ni cu puai ni-in mang leleng tukin thuthan hi.
22 Hi ni cu Judah miten a ngalte a botik ni haw hi. Hi thasiat ha le lungbingnak ni cu lungdamnak le thinnopnak tuah a suahtik hawnak ha hi. Hi ni nih sung cu lungdamnak puai, an eih khawmnak puai le pa khat le pa khat laksawng a piakdun haw ni le mi ca-ngahte thil a piak ni haw hi tukin thuthan hi.
23 Mordekai i thuthatmi cu Judah miten zui in, a puai haw cu kumsial bawlmi puai in suakta hi.
24 Agag casuan Judah mi ngaltu Hammedatha i capa Hamanin, Judah mite siatsuah nuamin le a ci haw mittik nuamin, “Purim” tihmi aisannak ngolh dok hi.Ref 9.24 Est 3:7;
25 Esther cu kumpipa i lakah a hawh hangin, kumpipa in thupia a, Judah mite bawlsiatnak tuk a tihmi cu amah Hamanin thuakleh lamsang; amah le a capa sawmte cu khai hupnak humah khai haw hi.
26 Judah mitei bawlmi puai cu, “Purim” ti haw hi; Purim tih cu “Aisannak ngolh” tihnak hi. Mordekai i laikuatmi hangin le a hum haw a, thu a piangmite hangin,
27 Judah miten amu ca, a casuan tei ca le Judah mi hi tukin a nuammi tei ca in, hi ni nih cu kumsialin, a hun kim ten Mordekai i thuthanmi bangin, cang leleng tukin daan bawl haw hi.
28 Judah mi innkua ten khang khat nung khang khat, khua tihkim le ngam tihkimah tawp ngawltohin, hi Purim puai cu a can leleng haw tukmi hi.
29 Abihail i canu kumpinu Esther in Mordekai i a ngatmi Purim thu laikuatmi humah mualnei zetmi adang laikuat cu Mordekai tuah ngan haw hi.
30 Esther laikuat cu Judah mi hempoh le Persia ukmi ngam, ngam khen za le sawm nih le salihah kuat khawng haw hi. Mah laikuat sungah Judah mitei lemdaihnak le himnak tuk thungetnak telhin,
31 an cannak le lungsiatnak hun ca daan a neih haw bangin Purim puaite cu komno in, a casuan tei khan tian a hun hen ten mang tukin thupiaknakte vang telh hi. Hi cu Mordekai le Esther a pa nih haw i thupiakmi hi.
32 Esther i thupiakmi in, Purim puai mandante cu khotikin, a thupiakmi cu laisungah tiamteh khawng haw hi.