8
Judah Ten Do Bok Tukin Hilh Haw
1 Mah sunin, kumpi Xerxes in, Judah mi a huatu Haman i na hempoh cu kumpinu Esther lakah pia hi. Esther in, Mordekai tuah unau naino a hih haw lam cu kumpipa i lakah hilh hi. Mahnung siah Mordekai cu kumpi umnakah tum theita hi.
2 Kumpipa in, a min khetnak (Haman lak pen a lakmi) a khutbut cu dukin, Mordekai pia hi. Esther in Mordekai cu Haman i nate cingtu tukin koih hi.
3 Esther in, kumpipa i kebulah kapthahin vawkdun a, kumpipa cu otpihleh hi. Agag casuan Hamanin, Judah mi a zohsuamnak thilpha ngawl cu kham tukin kumpipa cu ngen hi.
4 Kumpi bawipa in, a sui thiangkhut cu zakin, Esther cu ding hi, a lakah,
5 “Maw, kumpipa, na lungkimin, keima ca ngaihsut sakin le thudik hi tin, na ngaisung bok ahi tale na hehpihnakin, Agag casuan le Hammedatha i capa Hamanin, na ukmi ngamsung hempoh ah Judah mi a venghawng haw thah khawng tukin thu a piakmi cu a thupia mi bangin bawlsuak tuk ngawlin thuthanleh zal aw maw.
6 Ka phunpihte lalthong khawngin, ka unaute thah khawng ahi haw tale thuak zo hihim tuk mang?” ti hi.
7 Kumpi Xerxes in, kumpinu Esther le Judah mi Mordekai lakah, “Judah mite a zohsuam hangin Haman cu thatin, a nate vang Esther pia khawng zo ing.
8 Kumpi min le kumpi minkhetnak a, khetsami thuthatnak cu khelhleh theih ma toh hi. Na nuam uh tale Judah mitei lakah na deih uh hempoh ngan un, ka minin ngan unna, ka minkhetnak tuah khen un,” ti hi.
9 Mah ni cu ha thum ha, Sivan ha, ni sawm nih le ni thum ni hi. Mordekai in kumpi laingantu hempoh samin, India pen Ethiopia tian a zalmi ngam, ngam khen za le sawm nih le salih uktu bawite, ngamuktu bawite le Judah mitei lakah a kuat tukmi lai cu semin, mahlai cu ngamkhen tihkimah aman haw mi a awn haw tek le Judah mitei lakah Judah awn tuah ngan hi.
10 Mordekai in, mahlai cu kumpi Xerxes min tuah nganin, kumpi minkhetnak tuah khen hi. Mi a hah haw miten kumpipa i cipuh inn a, ummi cipuhte khungin, mahlai cu khua tihkimah taipih pepel haw hi.
11 Mahlai sungah, kumpi in, khua tihkim a, ummi Judah miten khawmdunin, panpihdun theihnak thupia hi. I lai ngamkhen le kua miphun ahi haw hei in, hiamnam tuah Judah mite a do haw tale Judah miten do kikleh bok tukin thupia hi. Do kikleh bek hei hi ngawlin a cano le a zite tuah thah khawng tuk, mi pa khat hei khawih ngawlin thah khawng tuk le a na hempoh vang la khawng tukin thupia hi.
12 Mah thupiakmi cu Persia ngamsung hempoh ah Judah mite thah tukin, ha sawm le ha nih ha, Adar ha, ni sawm le ni thum ni-in, bawl khawng hi tuk hi.
13 Hi thu cu zui kulmi daan hi tuk a, mahmi a kim ten Judah mite a sihsankhual theihnak tukin ngam khen tihkimah than hi tuk hi.
14 Kumpi thupiak bangin cipuh khungtu ten kumpi cipuh khungin, manlang zetin tai haw hi. Mah thu cu kumpi umnak Susa khuapi hei ah than haw hi.
15 Mordekai cu kumpi inn pen kumpi van a ngoleh mepian, nimzang ma neuno tuah takmi puansan silhin le a mawi zetmi sui lukhuh khu in, tul hi. Susa khuapi lampi ah mi tampi cu lungdam thatui in au haw hi.
16 Itahim titale Judah mitei ca in, suahcaknak, lungdamnak, thinnopnak le nehnak lungmu neitik hi.
17 Kumpi thupiakmi a thatnak haw ngam khen tihkim le khua tihkimah Judah miten lungdamnak puai bawl tek haw hi. Judah mite a laudeuh haw hangin mi tampi cu Judah mi in suak haw hi.