6
Sairas Thupiakmi Mu Leh Haw
1 Mah hangin kumpi Darias in Babilon kumpi thu sialsiahnak laibupi sungah mah thu cu zei tukin thupia hi.
2 Media pen Ekbatana khua ah laizial pa khat mu haw in, a sungah a nuailam bangin nganin, na um hi.
3 “Kumpi a deh kum khatnakin, kumpi Sairas in biakpiaknak bawlnak tukin le halkang biakpiaknak bawlnak tukin Jerusalem a Biakinn cu saleh tukin thupia hi. Mah Biakinn cu pi sawm kuah sang tuk a, pi sawm kuah zal tuk hi.
4 A pangte cu suang le thing tuah bawl hi tuk a, suang thuah thum ten thing thuah khat tuk hi. Inn saknak a bomi hempoh cu kumpi tangka sungta piak hi tuk hi.
5 Kumpi Nebuchadnezzar in Babilon ah a koihmi sui, ngun le kuangte cu kikleh khawng hi tuk a, Jerusalem Biakinn a koihnak haw mun tekah koihleh hi tuk hi,” tih ngatmi mu haw hi.
Kumpi Darias In Nadeh Pehtik
6 Kumpi Darias in, hi bangin lai lulleh hi.
Eufrates Nitumnak lam peng uktu bawi Tattenai, Shethar Bozenai le Eufrates Nitumnak lam peng a, um bawi upate aw hu ngaihsak hih un.
“Biakinn elkimah hei na um pahsuh un,
7 a nadeh haw hei dondak kha toh pahsuh un. Judah pen uktu bawi le Judah mi hotu ten Pathian Biakinn cu a umnak lengah sa haw hen.
8 A kulnak hempoh ah bawm saw un. Ka thupiakmi cu hi bangin hi: Cawl ngawlin na a deh theihnak tukin Eufrates Nitumnak lam pen kumpi a piak haw mi siah sung pen inn saknakin, a bomi hempoh cu manlangin amuh pia paih un.
9 Jerusalem i thiampi ten a nget haw ten a lak hawah nisial pel ha ngawlin a kul haw mite khuicang, tuu ahimata tuunote, Van a Pathian nelah halkang biakpiaknak a bawlnak haw tukin sangvut, ci, sabittui le olif thaute na pia loli un.
10 Van a Pathian nelah santakmi biakpiaknak bawlin, keimah le ka capa tei ca vang thu a ngetsak theihnak tukin a hum a, ka thupiakmite cu bawlsuak hihim un hi.
11 Hi ka thupiakmi a zui ngawltu cu a inn kaan zum hiam unna, a lek na zup celh uhten amah cu sun un.
12 Jerusalem cu Amah a biaknak haw tukin a tengtu Pathian in, ka thupiakmi a eltu le hi Biakinn siatsuah a tumtu kumpi le miphun cu siatsuah hihen. Keimah Darias in thupia ing. Ka thupiakmi cu kimno in zui khawng tuk hi,” ti hi.
Biakinn Pathian Lakah Apnak
13 Eufrates Nitumnak lam ngamuktu bawi Tattenai le Shethar Bozenai le adang upa ten kumpi Darias thupiakmi bangin cikcekin bawl khawng haw hi.
14 Judah mi hotu ten Biakinn cu sa haw a, profet Haggai le profet Zekhariah tei phuansuahmi thu hangin a nadeh haw cu mathung zetin, Israel Pathian le Persia kumpi Sairas, Darias le Artakzaksis tei thupiak bangin ceng haw hi.Ref 6:14 Hag 1:1; Zek 1:1;
15 Darias in kumpi a deh sawng kum luknak Adar ha, ni thum ni-in, Biakinn cu sa ceng haw hi.
16 Israel mite thiampi, Levi mi le Babilon saltannak pen a kikmi hempohin lungdam zetin Biakinn cu Pathian lakah ap haw hi.
17 Mah ni-in, Pathian lak a, biakpiaknak tukin khuicang za khat, tuucang za nih le tuuno za li pia haw hi; mah hum pen Israel hinnam sawm le pa nih tei sualhah biakpiaknak tukin keel sawm le pa nih pia haw hi.
18 Moses laibu sung a, bawl tuk daan ummi bangin Jerusalem Biakinn sung a, nadektu tukin thiampite le Levi mite cu ahon ahonin khenkhuai haw hi.
Kaltan Puai
19 Babilon saltannak pen a kikmi ten ha khatnak ha, ni sawm le ni li ni-in, Kaltan Puai bawl haw hi.Ref 6:19 Suah 12:1-20;
20 Thiampi hempoh le Levi mi hempoh ten thianthohnak bawlin, thiangtho khawng haw hi. Levi miten saltannak pen a kikmi tei ca le thiampite le amu ca in Kaltan Puai biakpiaknak tuk nganhingte ngo haw hi.
21 Biakpiaknak sa cu Israel mi hempoh, Judah ngamsung a um dawih biatu tei biaknak a nunghektute le Topa, Israel Pathian bia tukin a hungmi ten ei haw hi.
22 Ni salih sung, Naman hel ngawl Cangho Puai cu lungdam thatui zetin bawl haw hi. Topa in Assiria kumpinote 6:22 Israel tei ngal a hih mek haw hangin tihmi hi, mah hun laihin ngamuktu kumpi ngangai cu Persia kumpi hi. Assiria ngam cu 612 BC ah a bo zo mi ngam hi. cu Judah mitei humah lungmu pha neitikin, Israel Pathian i Biakinn sakleh nadehnakah tampi a bop hangin a lungdam cuang hi.