5
Biakinn Sak Panleh Haw
1 Profet pa nih Haggai le Iddo i capa Zekhariah in, Israel Pathian i thu cu Judah le Jerusalem a, um Judah mitei lakah phuang pepel hi.
2 A thuphuan haw mi cu Shealtiel i capa Zerubbabel le Jehozadak i capa Joshua ten a zak haw ten Jerusalem Biakinn sak cu panlehin, mah profet pa nih ten bawm haw hi.Ref 5:2 Hag 1:12; Zek 4:6-9;
3 Mahbek ten Eufrates Nitumnak lam ngamuktu bawi Tattenai le Shethar Bozenai le a khutnuai bawi dangte cu Jerusalem ah hawhin, Biakinn satute cu, “Hi Biakinn sa tukin le a sung a, nate bawl tukin thu piatu akua kaw?” ti haw hi.
4 Mah Biakinn sak a bawmtu tei minte dong khawng haw hi.
5 Pathian in Judah hotute cu zo in cingkhawi leleng hi; Persia bawi ten kumpi Darias lakah laikuatin, a lulhlehnak a ngah haw laihngawl sung cu imah khamnak bawl haw ma hi.
6 Kumpi Darias lak a, thu a theihtik haw cu hi bangin hi.
7 Kumpi Darius i uknak sungah lemdaihnak um tahen!
8 Kumpipa na theih tukin ka ngaihsut uhmi cu: Judah pengah hawh ung a, Judah miten a thawmngengmi Pathian i Biakinn cu saleh haw hi; suang ngengpi tuah sa haw in, a pang cu khaltun pekpi ngeh tungto haw hi. Hahkhatzet le kom zetin sa haw in, a nadeh haw cu thungzet haw hi.
9 “A koi thupiaknakin kaw hi Biakinn hi salehin, a sung nate na bawl uh, tin dong ung.
10 A hotu haw kuate haw him tih na theihnak tukin hi a nadehnak haw hotu tei minte vang dong ung hi.
11 A don lehnak haw cu, “Van le leipi i Pathian i silate hung hi, a ngil zetmi Israel kumpi in Biakinn sa in, a sung a nate vang bawl khawng hi, mah biakinn cu saleh ung hi.
12 Mahnaven ka pu le pa uhten van a, Pathian cu a thinuktik haw hangin mah Pathian in Babilon kumpi Nebuchadnezzar nehtik hi. Biakinn cu siatsuah khawngin, mihingte cu Babilon ah salin pui hi.Ref 5:12 2Kum 25:8-12; 2Khang 36:17-20; Jer 52:12-15;
13 Kumpi Sairas in Babilon kumpi a deh kum khatnakin, hi Biakinn cu saleh tukin thupia hi.Ref 5:13 Ezr 1:2-11;
14 Mah hum pen Nebuchadnezzar in Jerusalem biakinn pen la in, Babilon biakinn ah a koihmi sui le ngun, beel le kuangte cu kumpi Sairas in Judah hinnam uktu tukin a bawlmi Sheshbazzar lakah pia hi.
15 Mah nate cu Jerusalem Biakinn ah hawhpihleh tukin le Biakinn cu tumasuan a umnak mun lengah saleh tukin amah cu kumpi in ti hi.
16 Sheshbazzar cu Judah pengah hengin, Jerusalem Biakinn saleh tukin a taw phah suang vang phum hi, mah pepan tu tianin, Biakinn sak na cu dek ung a, ceng ma laih ung,” ti hi.
17 “Mah hangin kumpipa na lungkim tale Babilon ah kumpi thu le la sialsiahnak laibu pi sungah na zei unna, hi biakinn saleh tukin kumpi Sairas in thu a pia ngangai le piang ngangai ngawl zo un, mahten hi thu cu hu theilehtik zal un maw,” tin ti haw hi.