5
Ezekiel In a Sam le a Khamul Met
1 Topa in, “Mihing pa, Ezekiel aw, nam hiamzet la inna, na kha mul le na sam met khawngin hi. Na sam cu cuai khai in, khen thumah suahin hi.
2 Ngal tei Jerusalem a kilh haw ceng ten na sam khen thum a, khenkhat cu khuapi sungah halin hi. Adang khenkhat cu khuapi pualeu kimkot na hawh pepel ten na nam tuah tan pepelin hi. Adang khenkhat cu vanhum huih lakah septo inna, keimah in ka ngalnam tuah hil tung hi.
3 Mahnaven na sam demno la inna, na puan mawkah khihcihin hi.
4 Mah sung pen samzang dawmlaih suah inna, mei sungah halin hi. Mahlai pen Israel miphun venghawng tei humah mei cu zalhkeh khawng tuk,” ti hi.
5 Cungnungbel Topa in, “Jerusalem hi zo hemin! Leihum buppi laizangah Jerusalem cu koihin, ngamdangte cu a elkimah koih ing.
6 Mahnaven Jerusalem in ka thupiakmi dodalin, ngamdangte sangin a phatngawl sawnak le a elkim ngamte sangin thu a ngaih ngawl sawnak haw cu langtik hi. Jerusalem in ka thupiakmi cu elin, ka daante vang zui nuam ma hi.
7 Jerusalem, Cungnungbel Topa, Keimah i otmi hi ngai hemin! Ka daante zui ngawlin, ka thupiakte na ngaih ngawl hangin, na elkim ngamte sangin nangmah pa khatin haksatnak suaktik saw ci. Ngamdang tei nundan cung ci.
8 Mah hangin Keimah, Cungnungbel Topa in hilh ing. Keimah hi na ngal hi ing a, miphun dang hempoh tei muh theihnak mun pen na thu khen tung.
9 Ka huatzawng thil tampi na bawl hangin Jerusalem, nang cu ka bawl awng ngawlmi dantatnak pia tung hi.
10 Mah hangin Jerusalem khuasung a, nu le pa ten a cano tei cik ei in, a ca haw ten a nu le pa tei cik ei haw tuk hi. A nung calamte cu dantat tung a, khua tihkimah khen khek khawng tung.Ref 5:10 Kah 4:10;
11 “Mah hangin Keimah hi, a nungmi Pathian ka hih bangin Cungnungbel Topa i ka otmi cu hi bangin hi: thil sual le a nawngkaite tuah ka Biakinn na nintik uh hangin hehpihnak um ngawlin siatsuah tung.
12 Nangmu lak pen khen thum khenkhat cu khuapi sung pen natnak le an ngawlin thi tuk uh ci. Adang khenkhat cu khuapi pualeu ah ngalnam tuah thi tuk uh ci, a dang khenkhat cu huih lakah khen khek khawngin, a ngalnam tuah hil tung hi.
13 “Ka thincim laklawh ka thinuknak le ka thinsonak cu nase zetin tawk tuk uh ci. Mah hun ten, muantak ngawl na hihnak uh hangin na hum uhah ka thinukin, Topa keimah in, na hum uhah ka ot tulmi hi tih cu thei tuk uh ci.
14 Na elkim uh a um miphunte na lak uhah a hawh haw ten noh cu nautatin pial haw tuk hi.
15 “Na hum uhah thinuk ing, ka thinso in ka dantat ten na elkim uh a, miphun hempoh cu a thinsuzet haw tuk hi. Ningdelhhuai in mu haw tuk a, cekpan bawlnakin mang haw tuk hi.
16 Na ngah mek uhmi ante cu khak tansak tung a, ngilkialin koih tung hi. Nangmuh siatsuahtu tukin a kap haw mi thalcang liamma bangin an ngawlin um, a haksat dan thei tuk ci.
17 Na ca uhte thattu tukin pamnak le sahangte hah tung a, nangmuhte thattu tukin natnak, thisan suahnak le ngaldonak suaktik tung. Keimah Topa in awn zo ing,” ti hi.Ref 5:17 Mang 6:8;