4
Jerusalem Kil Haw
1 Pathian in, “Mihing pa, Ezekiel aw, ukkhe la inna, na mai ah koihin, a humah Jerusalem khuapi zuksuai in hi.
2 Ngal ten Jerusalem a kil haw langtiknakin, hum kuatmi, lei tianmi, ngalkap umnak le kulhtian siatsuahnakte a kimkotah bawl khawngin hi.
3 Thikpek la inna, nangmah le khuapi laklawhah pang bangin tungin hi. Khuapi lamah hek inna, khuapi kulh cu tian khawngmi hi tuk a, a tiangtu cu nangmah hi tuk ci. Hi cu Israel miphun tei ca in sialsiahnak hi tuk hi.
4-5 “Mahten na veilamah siksahin zau inna, Israel miphun tei mawhnak cu na humah suan tung hi. A mawhnak haw hangin, ni za thum le sawm kuah sung mahlai ah umin thuak tuk ci. Na ni khat thuakmi cu kum khat a thuak haw tuk ca in, soncat zo ing.
6 Mahceng ten hel inna, taklam siksah zau in, Judah mitei mawhnak hangin ni sawm li sung thuakin; ni khat na thuakmi cu kum khat a thuak haw tuk ca hi tuk hi.
7 “Ngal ten Jerusalem a kil khawngnak cu phano zo in hi. Mah khuapi lam hek inna, na khuttum lakin, a humah thu hilhin hi.
8 Khauhual tuah ken tung a Jerusalem a khua kulh a celh laklawh haw cu na siksah hel thei tukma ci.
9 “Sangvut, barli sangvut, beli, phiang, laicang le cangtol demno ten la inna, kuang sungah na cawhhel nungten cangho bawlin hi. Mah na bawlmi cu na veilam siksah thahin, ni za thum le sawm kuah sung na eih tukmi hi.
10 Ni khatin, an pawng nih bek ei tuk ci, mah pawng nih hei cu a zingleh tian phat hen.
11 Tui vang na deih zahin thei tukma ci; ni khatah khuat nih bek ngah tuk ci.
12 Mihing ekko tuah mei lam tuk ci a, mah meilingah cangho em inna, mi hempoh tei muh theihnak mun pen ei in hi.
13 Topa in, “Hi cu daan i khammi anteRef 4:13 Thiam 11: cu Israel mite ngam dadangah ka khen khek nungten iti bangin ei haw tuk tih langtiknak,” ti hi.
14 Mahnaven, donleh bok ing a, “Mah kha ma hi, Cungnungbel Topa! Thil nawngkai tawngkha awng mang. Ka neu laih pepan a thi cawmmi cik hihen, sahang matmi cik hihen ei awng mang hi. A thiang ngawlmi an ei awng mang tin ti ing.”
15 Mah hangin Pathian in, “Mahtin tale phazet hei, mihing ek hi ngawlin khui ek mang inna, cangho cu emin,” ti hi.
16 Mah hum pen Pathian in, “Mihing pa, Ezekiel aw, Jerusalem khuapi sungah an cu khaktan sak tung. Khua sung a mitei a eih haw tukmi an le a in haw tukmi tui vaihawmin thinkham le thasia in um haw tuk hi.
17 In le eih tuk tui le an nei haw tukma, thasia in, a sualnak haw hangin a taksa haw kiam zuzung tuk,” ti hi.