18
Sualnak A Bawltu Thi Tuk
1 Topa in ka lakah,
2 “Israel ngam a, mipi ten,
‘A nu le pa ten
sabit thuk ei haw a,
a ca tei ha di hi,’ tin,
a tih lih haw cu ikaw?Ref 18:2 Jer 31:29;
3 “A nungmi Pathian, ka hihnak min salin, Cungnungbel Topa Keimah in hilh ing. Israel ngam sungah hi thupaucapnak cu sal toh pahsuh un.
4 Mi hempoh i nunnak cu keima ta hi; nu le pa i nunnak, ca tei nunnak hei hihen kata hi khawng haw hi. Sualnak a bawltu cu thi tuk hi.
5 “Tehkipnakin, mi phazet, midikcang le mi ngeikhei pa khat um hi.
6 Israel tei biakmi milim bia bokma, pathian dang biaknak a, tui le ante vang ei ma. Midang tei zi zol ngawlin, numei thi heng laihmi tuah vang sual ma hi.
7 Kuamah hei zol ngawlin, mitei na hei ngu ma. Sum cawitu i thutepnak nate vang phano in pia kikleh hi. Ngilkialte vakin, puansilh nei ngawlte puansilh tuk pia hi.
8 A pung tuk deihin, mite sumputik ma hi. Thilpha ngawl bawl tuk cu nuam hihim ma; thu eldunnak pen dikcangno in thusoncat hi.
9 Mahtibang mihing ten ka thupiakmi le ka daan cu komno in zui hi. Midikcang hi a, nung tuk hi,” tin, Cungnungbel Topa in ti hi.Ref 18:9 Thiam 18:5;
10 “Tehkipnakin, hi pa in capa pa khat, thu hilh theih ngawl capa, a nei bang ahin, mah a capa in, a pa i bawl awng ngawlmi;
11 nguca, mithat, pathian dang biaknak tui le an ei in, mi zi vang zol hi.
12 Mi ca-ngah zawnsak, mitei na ngu in, sumputu i thutepnak nate vang pialeh ma hi. Lawki mitei biakpiaknakah hawhin, ningdelhhuai milimte bia hi.
13 Sum khang tha ngaih in, mite putik hi. Mahpa cu nung ni maw? Nung tukma hi. Hiti bang ningdelhhuai nate a bawl hangin thi tuk hi. A thih cu ama khelhnak hang hi tuk hi.
14 “Tehkipnakin, hi pa in capa pa khat nei bok hi. A pa i bawlmi thilpha ngawl tampi mu bok naven zui ma hi.
15 Israel tei biakmi milim cu bia ma hi; pathian dang biaknak tui le ante vang ei kha ma. Mitei zi vang zol ma hi;
16 kuamah zawnsak ngawlin, kuamah i na hei ngu ma hi. Sumputu i thutepnak nate vang phano in pia kikleh hi. Ngilkialte an pia in, puansilh nei ngawlte puansilh tuk pia hi.
17 Thil sual bawl tuk cu nuam hihim ma, a khang tuk nemcuam ngai in, sum mite putik thong ma hi. Hi pa in, ka daan zui in, ka thupiakmi bawl hi. A pa i sualnak hangin thi tuk, ma nung loli tuk hi.
18 Mahnaven a pa in mizolin le nguca in, mi hempoh humah thilpha ngawl bawl hi. Mah hangin thi hi, ama bawlmi sualnak hangin thi hi.
19 “Mahnaven thudong uh ci, ‘Itakaw a pa i sualnak hangin a capa thuak bok ngawlin a um tuk?’ Na ti uh tale donlehnak cu: a capa in, a dikmi le a phami a bawl hangin, tih hi tuk hi. Ka daante zui in, ngalling zetin, a um hangin amah cu nung hihim tuk hi.
20 Midang hi ngawlin a sualtu bek thi tuk hi. A pa i sualnak hangin a capa in thuak tukma; mah bang lelengin, a capa i sualnak hangin a pa in, thuak bok tukma hi. Mipha cu a phatnak hangin laksawng ngah tuk a, mipha ngawl cu a phatngawlnak hangin thuak tuk hi.Ref 18:20 Daan 24:16;
21 “Mipha ngawl pa khatin, thil sual a bawlmi cawlin le ka daante zui in, thildik le thilpha a bawl tale thi tukma, nung hihim tuk hi.
22 A sualnak hempoh cu ngaihdam hi tuk a, nung tuk hi, itahim titale a dikmi bawl hi.
23 Mipha ngawl pa khat a thih ten ka lungdam tuk hi tin maw na ngaihsut uh?” Mah kha ma; sikkikin, a nuntuk deih saw ing tin, Cungnungbel Topa in ti hi.
24 “Midik pa khatin, na pha bawl colhsanin, thil sual le ningdelhhuai na a bawlleh tale nung leleng a ni maw? Nung tukma hi! Na pha a bawlsami hei phawkngil khawng tuk hi. Muantak ngawl a hihnak le a sualnak hangin thi tuk hi.
25 Mahnaven noh ten, ‘Cungnungbel Topa i bawlmi hi dikma,’ ti uh ci. Ngai hih un, Israel mite! Ka bawlmite hi dikma ti uh cim? A dikngawlmi cu nangmu bawlmi saw hi si.
26 Midikcang pa khat cu na pha a bawlmi colhsanin, thilpha ngawl bawllehin thi hi; thil sual a bawl hangin thi hi.
27 Mipha ngawl pa khatin, thilpha ngawl a bawlmi zamsanin, a dikmi le a phami bawl hi; mahti bangin a nunnak cu hup hi.
28 A thil bawlmi iti bang hi tih cu thei in, sualleh ngawltohin, a um hangin thi hihim tukma hi; nung leleng saw tuk hi.
29 noh Israel miten, ‘ Topa i thil bawlmi hi dikma hi? ti uh ci. Ka thil bawl daan hi dikma hi ti ngangai uh cim?’ Nangmu thil bawldan saw pahcuh a dik ngawl saw mi!
30 Keimah, Cungnungbel Topa in, hilh ing. Israel mite, na thil bawl uhmi zo in, bulpak tekin, na thu uh khen tung. Thilpha ngawl na bawlnak uh pen kikleh un: na sualnak uhin, noh siatsuah ma hen.
31 Thilpha ngawl na bawl leleng uhte hi zamsan toh unna, lungmu thak le ngaihsutnak thak nei toh un hi. Israel mite, itakaw thih cu na nuam uh?
32 Kuamah na thih tuk uh cu deih mang hi. “Na sualnak uh sikkik unna, nung un,” tin Cungnungbel Topa in ti hi.