17
Muvanlai le Sabit Ngui Tehkipnak
1 Topa in ka lakah,
2 “Mihing pa, Ezekiel aw, Cungnungbel Topa keimah in Israel tei lakah ka hilhmi hi a theih haw tukin,
3 thu tehkipnak hi hilhin: Muvanlai ngengpi pa khat umin, a ha ngengzet hi; a haa cu zal zetin, a phalh ten mawizet hi. Lebanon mual humah lengin sidar thinglek ektuah
4 mah thinglek cu sumbawlnak ngamah a lenpih nungten sumbawltu tei khua sungah koih hi.
5 Mah nungten thingkung neuno pa khat Israel ngam pen la in, ngam phatnak munah phut hi: mahlai ah thingkung khangtiktu tukin tui um leleng hi.
6 Mah thingkung cu khangto in, niamthim a, zal zetin sabit ngui zam bangin suak hi. A kangte cu humlam muvanlai umnak lamah kai pepelin, a zungte cu thukzetah tum pepel hi. A ngui cu a kang le a ceh ten khuh haw hi.
7 “Adang muvanlai ngengzet pa khat um bokin a ha cu pek demdumpi in, a ha mul vang sahzet hi. Sabit ngui in, a dinnak mun a, tui sangin tui tam saw deuh ngah tung tih ngaihsutnak a neih hangin, a zung cu muvanlai lamah hawhtikin, a cehte vangin zuan pepel bok haw hi.
8 Mah sabit ngui cu ngam phazet le tui tamzet umnak munah cinmi hi. Mah hangin ngah tamzet a ngahmi sabit ngui phazet hih tuk bek sam hi.
9 “Mah hangin Cungnungbel Topa keimah in, hitih bangin thu dong ing. Hi sabit ngui cu nungin khang laih ni maw? Amasa muvanlai in, a bul pen bong tukma maw? A ngahte hong khawngin, a kangte ek khawng tukma maw? Thim khawng tukma maw? Hi sabit ngui bot tukin tha ngilzet kulma hi; miphun ngilzet vang kulma hi.
10 Hi zuh hi, phutsami cu hi naven nung ni maw, khangto ngangai a ni maw? Nisuahnak lam huihin amuh ten thim tukma maw? Tu a, khannak munah thim khawng thong tukma maw?” ti hi.
Tehkipnak Ciangtik
11 Topa in ka lakah,
12 “Hi tehkipnak i sullam thei haw maw thei haw ma him tih ngalthote hi dong hemin! Hilhin hi: Jerusalem ah Babilon kumpi hungin Judah kumpi le a khutnuai bawite pui hi.Ref 17:12-15 2Kum 24:15-20; 2Khang 36:10-13;
13 Kumpi innkua sung pen pa khat samin, amah tuah lungkimnak laikhen inna, nadek tung tin, tamsiatnak thutiam bawltik hi. Mah laikhet bangin zui leleng tuk le,
14 hi miphun hi langpang toh pahsuh hen tihnakin mi upate cu ngalmatmi in pui hi.
15 Mahnaven Judah kumpi cu ngaltho a, cipuh tampi le ngalkap tampi ngah nuamin, Izipt ngamah palai hah hi. Lawhting, ngai a ni maw? Bawlsuak thei ngai a ni maw? A thutepnak siatsuahin le bawlsiatnak thuak ngawlin luat thei tukma hi.
16 “Pathian nung ka hihnak min salin Cungnungbel Topa keimah in hilh ing: Kumpi khunnak humah a khungtiktu le Babilon kumpipa tuah a bawlmi siatcam thutepnak a palcat hangin hi kumpipa cu Babilon ah thi hihim tuk hi.
17 Babilon ngalkapte hung haw a, lei vukin, mi tampi that nuamin khuapi kulhtian pualam pen tiangto pepel haw in, a ngil zetmi Izipt kumpite hei in, bawl thei haw tukma hi.
18 A siatcam thutepmi pahbalin, lungkimnak laikhet a bawlmi siatsuah zo. Hiti bang a bawl nungsang cu luat hihim tukma,” ti hi.
19 Cungnungbel Topa in, “Pathian nung ka hihnak min salin hilh ing. Ka min salin le zui tukin siatcamnak tuah a tepsami laikhet a siatsuah hangin bawlsia tung.
20 Savai tei manmi suuk thang siah tung a, mah sungah awktik tung. Ka humah muantak ngawlin a nun hangin Babilon ah hawhpih tung a, mahlai pen bawlsia tung hi.
21 A ngalkap phabelte ngaldonakah thi haw tuk hi. Mah nungten keimah Topa in hilh hi tih cu thei tuk ci,” ti hi.
Pathian i Muansannak Thutiam
22 Cungnungbel Topa in hi bangin ti hi.
“Sidar thinglek cu la tung a,
thing dawnno cu ektuah
mual sangpi humah phut tung.
23 Israel mual sangbel humah
phut tung.
A kangte tawtin, a ci suah haw tuk hi.
Sidar thing pha zetin
suak haw tuk a,
vano tihkim a humah kopin,
a limah colhnak ngah haw tuk hi.
24 Ngamsung thingkung hempoh ten
Topa ka hihlam
thei haw tuk hi.
Thingkung sangzette cu phukin,
a niamte sang hen tin
khangtik ing.
Thinghingte cu thimtik ing a,
thingkote thinghing
cangtik ing.
Keimah, Topa in hilh zo ing.
Bawl tuk tin ka hilhsami cu
bawl loli tung,” ti hi.