14
Topa In Milim Biak Deih Viangma
1 Topa i deihnak thei nuamin, Israel hotu khenkhatte cu thusiampih tukin ka lakah hung haw hi.
2 Topa in ka lakah,
3 “Mihing pa, Ezekiel aw, hi Israel hotu ten a lungmu sungah milim koih haw, mahmi cu amu ca, lupbahnakin suak hi. Thu a siampih haw hei in donleh tukin maw a ngaihsut haw?
4 “Amu lakah Cungnungbel Topa, keima otmi hi hilhin: Israel mi akua nabang hei in, sualnak sungah puitum tukin le a lungmu haw milim lakah pia in, thusiampih tukin profet lakah a hungmi cu keima lak pen a milim haw tuah bisidunin ka donlehnak ngah haw tuk hi.
5 Hi milim ten ka mihingte cu ka lak pen puitul haw hi. Mahnaven ka donlehnak hangin a lungmu haw pui kikleh tukin ka muansanmi hi.
6 “Atu-in, Israel tei lakah keimah Cungnungbel Topa in, ‘Sikkik un! Kikleh unna, ningdelhhuai na milim uhte taisan un,’ ka tihmi na hilhin hi.
7 “Israel mi pa khat hihen, Israel tei lak a, um ngamdangmi pa khat hihen, a lungmu sungah milim koihin, ka lak pen taitulin le a lupbahnak tuk milim a koih nungten thusiampih tukin profet lakah a hawh tale Topa keimah in thuhilhleh tung.
8 Mahpa cu ka ngalin koih tung. Midang tei ca in ngallin kulmi a hihlam zohteh tukin bawl tung. Ka miphun lak pen lawl tung a, mahten Topa ka hihlam thei haw tuk hi.
9 “Thuman ngawlpi tuah donleh tukin profet cu zol ngahmi ahi tale Topa keimah in ka zol ngah hang hi. Israel tei sung pen siatsuah tung.
10 Mah profet le thusiampihtu cu a pa nih haw in, bawlsiatnak bangten tawk haw tuk hi.
11 Israel mite ka lak pen a tai ngawlnak tukin le sualnak sungah amuh le muh a nawngkai duntik haw ngawlnak tukin mahti bangin bawl tung hi. Amuh cu ka mihing hi haw tuk a, kei vang a Pathian haw hi bok tung hi,” tin Cungnungbel Topa in hilh zo hi.
Noah, Daniel le Job
12 Topa in ka lakah,
13 “Mihing pa, Ezekiel aw, ngam pa khat cu sualin, ka mai ah muantak ngawl ahi tale, a ngah mekmi ante cu ka khut tuah sawk tung a, siatsuah tung. Paam tungtik tung, mihing hihen, ngante hei hihen, that khawng tung.
14 Miphazet pa thum Noah, Daniel le Job a um haw hei in, a phatnak haw in amu nunnak bek hup thei tuk,” ti hi. Cungnungbel Topa in hilh zo hi.
15 “Ahimata mihing man tukin sahangte hah tung; mahten a ngamsung haw cu launak le thinsuknak tuah dim tuk a, kuamah in mah ngamah hawh ngam haw tukma.
16 Kei cu a nungmi Pathian ing hi, Cungnungbel Topa keimah ka nun bangin mah mipha mihing pa thumte a nung haw hei in, a cano haw cu hup thei haw tukma hi. Amu nunnak bek hup ngah haw in, a ngam haw cu ngamkhingin suak leleng tuk hi.
17 “Ahimata, a ngam hawah ngaldonak hengtik tung a, mihing hihen, nganhingte hihen a siatsuah khawng theitu hiamnam kuat tung hi.
18 Kei cu a nungmi Pathian ing. Cungnungbel Topa Keimah ka nun bangin mah mipha pa thumte a nung bok haw hei in, amu nunnak bek hup thei haw tuk naven a cano tei nunnak cu hup thei haw tukma hi.
19 “Ahimata, a ngamsung hawah natsia umtik tung a, ka thinukin mihing le nganhingte thatin, nunnak tampi ka botik ahi tale,
20 Kei cu a nungmi Pathian ing. Cungnungbel Topa Keimah ka nun bangin, Noah, Daniel le Job ten a nung bok haw hei in, a canote hei hup thei haw tukma hi. A phatnak haw in amu nunnak bek hup thei tuk tin,” ti hi.
21 Cungnungbel Topa in hi bangin ti hi; “Mihing hihen, ngannung hihen that tukin ka mi bawlsiatnak nasebel pa li: ngaldonak, pamnak, sahangte le natsiate cu Jerusalem humah hengtik tung.Ref 14:21 Mang 6:8;
22 Mi pa kha khat suakca in, a cate a hup ngah ahi tale na lakah a hun haw ten na zo in hi. Iti zahin mipha ngawl haw him tih cu mu inna, Jerusalem hum a, dantatnak ka hentikmi hi dik hi tih thei in hi.
23 ihempoh ka bawlmi ah thu le la a manmi a um hangin tih cu thei tuk ci,” ti hi. Cungnungbel Topa in hilh zo hi.