13
Pano Profet Sualte Siatnak
1 Topa in ka lakah,
2 “Mihing pa, Ezekiel aw, bawlcawm thusuak hilhtu Israel tei profet haw cu liat inna, Topa i awnkam ngai tukin na hilhin,” ti hi.
3 Cungnungbel Topa in, “Hi profet misil tei humah thukhennak heng zo. Amu ngaihsut dan zuitu le muhnak a bawlcawmtute haw hi.
4 Israel mite, na profet uhte hi a sia khawng zomi khuapi sung a um, nemcuamnak um ngawlmi cingne bang haw hi.
5 Pangcimte cing haw ma, a tiang vang tiangleh sap haw ma hi; mah hangin Topa i ni, ngaldonak a hen ten, Israel cu hup theih hileh tukma toh hi.
6 A muhnak haw cu zolthu ngeh; mailam thu a sonhamte vang zolthu ngeh hi. Keima thuhilh bangin sondun cawm haw hi. Mahnaven ka hahmi kha haw ma. Mah hei in, amuh ten a hilh haw mi cu kim tukin muansan la laih haw hi.
7 A lak hawah hi bangin hilh ing: Na muhnak uhte cu zolthu ngeh hi, mailam ca na hilh ham uhte vang zolthu ngeh hi. Pathian otmi vei ti uh ci. Mahnaven na lak uhah hilh awng mang tin ti hi!”
8 Mah hangin Cungnungbel Topa in, “Na otmi uhte hi phukthong, na muhnak uhte vang zolthu ngeh hi. Nohte cu ka ngal uh ci.
9 Noh muhnak man ngawl a mutu le mailam thuman ngawlin a hilhtu profet cu bawlsia tung. Thusoncat tukin ka mite a khopkhawm haw ten noh cu tel kha tukma uh ci. Na ngam uhah kik awng tukma uh ci. Cungnungbel Topa ka hihlam cu thei tuk uh ci.
10 “Profet ten ihempoh pha khawng hi tin, ka mihingte pui sual khawng haw hi. Ihempoh hi pha khawng ma hi! Ka mihing ten kulhtian cu suang tuah kho viang tuk ngawlin a tian nung haw ten profet hung haw in, a pualam pen si ngo noih thuah thong haw hi.
11 Profet na hilhin: a kulhtian haw mi cu cim tuk hi. Nguah tamzet zutik tung a; nial bokbawn tiatia in, a hum hawah caktik tung a, huihpi nasezet theutik tung.
12 Pang cu cim tuk hi, si ngo tuah na noih uhmi cu ikaw a nemcuam tin mi hempoh ten dong haw tuk,” tin ti hi.
13 Cungnungbel Topa i awn cu hi bangin hi: “Ka thinukin, a kulhtian haw siatsuah tukin huihpi theutik tung, nguah tamzet zutik tung a, nial nase zetin caktik tung.Ref 13:13 Jer 6:14; 8:11;
14 Si ngo tuah a noih haw mi pang cu phelet tung hi; phelet khawng tung a, bulphuhnak suangte langtik khawng tung. Pang cu cimin, nangmuh that khawng tuk hi. Mi hempoh ten Topa ka hihlam thei haw tuk hi.
15 “Kulhtianin hihen, si ngo a noihtute hei hihen, ka thinuknak cu nase zetin thuak haw tuk hi. Kulhtiante le si ngo a noihtute vang bo zo haw tih cu hilh tung hi.
16 Ihempoh a pha ngawl laih takin ihempoh pha khawng leng hi tin, Jerusalem cungcang a pha in, a sontu profet cu bo zo haw, tin Cungnungbel Topa in hilh zo hi.
Numei Profet Sualte Siatnak
17 Topa in, “Mihing pa, Ezekiel aw, mailam thu a hilh hamtu nangmu lak a numeite hi zo hem un! A phat ngawlnak haw cu son inna,
18 Cungnungbel Topa i otmi hi amu lakah hilhin hi.
“Maw numeite, lalthongta uh cei. Midang tei nunnak hum a, huham na neih theihnak tukin mi tampi tei a khutah a bulh haw tukin le a lu humah a khih haw tukmi ca in puan pa dildel taksak uh ci. Ka mihing tei humah nunnak le thihnak thunei nuamin, nangmu nemcuamnak tukin mang uh ci.
19 Cangho zawl them khat co nuamin le cangho ah them khat co nuamin ka mihing tei mai ah keimah sonsia uh ci. A thi tuk ngawlte thatin, a nung tak ngawlte nungtik uh ci. Ka mihing tei lakah zolthu son uh ci a, sangzet hawta laih,” ti hi.
20 Cungnungbel Topa in, hi bangin hilh hi; “Nunnak le thihnak hum a thuneitu hihtumnakin, na man uhmi i neihnak, na khutkhih uhte cu hua ing. Na khut uh pen mah khutkhih cu tanvawk khawng tung a, na uk uhmi mihingte cu luattik khawng tung hi.
21 Na lukhu uhte cu at khawng tung a, na uknak uh huham sung pen ka mihingte cu kumkhua ca in suaktik tung. Topa ka hihlam thei haw tuk hi.
22 “Siatsuah ka nuam uh ngawlmi miphate cu na zolthuson uhmi in, a tha nautik uh ci. Mipha ngawl ten thilpha ngawl a zamsan theihnak haw tuk le a nunnak a hup theihnak haw tukin lampi khahsak uh ci.
23 “Atu-in, muhnak man ngawl na muh uhmi le mailam thu a man ngawlin na hilhmi uh cu bo zo hi. Ka mihingte na thuneihnak uh huham sung pen hup ing. Topa ka hihlam thei tuk uh ci,” ti hi.