3
Ihempohin Hun Nei
1 Ihempohin hun nei haw a,
Leihum na hempoh ca in,
hun khawthu um hi.
2 Suah hun umin, thih hun um hi.
Phut hun umin,
bawhleh hun um hi.
3 Thah hun umin, damtik hun um hi.
Phiat hun umin,
sakleh hun um hi.
4 Kah hun umin, nuih hun um hi.
Khaw-ngaih hun umin,
laam hun um hi
5 Suang vawk hun umin,
khopleh hun um hi.
Kawidun hun umin,
khendun hun um hi.
6 Zei hun umin, paihtik hun um hi.
Cop hun umin,
vawk hun um hi.
7 Botbal hun umin, khui hun um hi.
Mengden um hun umin,
ot tul hun um hi.
8 Itdun hun umin, huatdun hun um hi.
Ngaldun hun umin,
lemdun hun um hi.
9 Nadektu in, hak zetin, a nadehnak pen ngahmi ikaw a neih?
10 Pathian in mihing lakah buaipih tukin nadeh pia tih thei ing.
11 Pathian in iti bang na hei hihen a lemcangmi hun pia tih mu naveng, a letvawkmi hun um tih le, a heng tuk laihmi hun um tih cu mihingin thei naven, Pathian in ikaw a bawl, a bul pen a lek tian ikaw a tuptah tih cu thei zo cuang ma hi.
12 Mihing ca in, a phabel cu a nunsung haw a, lungdam le nunnopin, a um theih khi hi.
13 In le ei in, a nadehnakah lungkimnak a neih hi Pathian i laksawng hi.
14 Pathian i bawlmi hempoh cu kumkhua in kho tuk hi, tih thei ing; bettheih tuk umma, lakkik tuk hei umma hi. Topa in mihing tei kihcaknak theihnak tukin hitih bangin a bawlnak hi.
15 Atu a, ummi hi a umsa mi ngeh haw hi; mailam a, um tuk laih mite hei hi, a umsa mi leng haw hi. Pathian in, a bosa mi cu kiktik lehcet hi.
Leihumah Dikcang Ngawlnak
16 Leihumah thuman umnak tuk munah siatnak um leleng, tih mu ing. Mi man a umnak haw tuk munah mipha ngawl um leleng haw hi.
17 Ka lungmu sungno in, “Pathian in thuman le thuman ngawlmi humah thukhen tuk hi; Na hempoh ca le nadeh hempoh ca in hun koih hi,” tin ti ing.
18 Ka lungmu sungno in, “Mihing hi ngamsa humah a cuangnak uh le a sang sawnak uh umma hi tih langtik tukin Pathian in khingkhai hi.”
19 Itahim titale ngamsa le mihing hum a, thusonnak cu bangten hi. Ngamsa cu thi in, mihing vang thi bok hi. Thihnakah munkhat haw hi. Mihingin, ngamsa humah a cuangcungnak imah umma; a bo thei haihawh nei veve haw hi.
20 A pa nih haw in, a hawhnak haw tuk munkhat hi. A pa nih haw in leivul pen lakmi hi haw a, lei ah kikleh haw tuk hi.
21 Mihing i hawvang cu humlamah kaito a, ngamsa i hawvang cu leinuai ah tum tih akua in kaw a son thei
22 Mah hangin mihing ca in, a nadehmi hum a, lungdamnak neih hi, a phabelmi hi, tih mu ing. Mah sial ngawl a tih theih dang umma hi. A thih ceng ten i cang him tih son theihnak umma hi.