2
1 Ka lungmu sungno in, “Atu-in, nopnak tep bok nang ngei; imah ngaisung ngawlin nopnak bebek bawlbok nang ngei,” tin ti ing.
Mahnaven hi hei cu phukthong ngeh leng hi.
2 Nuih hi silnak hi! Nopnak hei hi ikaw a nemcuam?
3 Mihingin leihum kum demno a nun sungah thilpha ngawl a bawl tukmi ka muhsuah theihnak tukin, cihnak lampi zui ing. Siatlalnak lampi a himi zu i deihnak zui tukin ngaisung awng ing.
4 Thil thupizet bawl ing: Ka ca in, inn sa ing a, sabit huan bawl ing.Ref 2:4-8 1Kum 10:23-27; 2Khang 9:22-27;
5 Pak huan le thingkung cinnak huan nop bawl ing a, thingthei ngah namkim a ngahmi thingkung tamzet phut ing.
6 Thingkung a khang laih lite tui leih tukin, tui ting bawl ing.
7 Ka tual suak sila nei ing a, mah humah salnu le salpa tampi lei bet ing. Ka neihmi khui le tuute cu ka laih ngawlin Jerusalem a ummi sang hei in, tam saw hi.Ref 2:7 1Kum 4:23;
8 Kumpite le ngamkhen tei lak pen sui le ngun khawm liphet ing. Lasatu tukin numei hihen, pano hihen koih ing; pano in nop a tih haw mi zineu hei tampi nei ing.Ref 2:8 1Kum 10:10, 14-22;
9 Jerusalem ah keima laih ngawlin kumpi a dektu hempoh sangin, hau saw ing a, nase saw ing. Ka cihnak vang a bangleng hi.Ref 2:9 1Khang 29:25;
10 Ka mitin, thilpha a muhmi hempoh ngah khawng ing. Ka lungmu in, nopnak a deihmi hempoh co khawng ing. Ka nadehnak pen lungnopnak ka ngahmi cu dehman ka ngahmi laksawng hi.
11 Hi hempoh hi ngaisung ing a, ka dehmi le ka bawlmi hempoh ka ngaihsut kikleh ten, zo hem un, phukthong ngihngeh haw; huih hil li bang phukthong haw, tih cu ciang zetin thei ing. Vanhaang nuai mihing ca in, a nemcuammi umma hi.
12 Cihnak le silnak, mibat ngawlnakte hi khingkhai in, tehkip ing. Kumpi i bawlsa mi tih ngawl a heng lehmi in, bawl theih dang imah nei sapma hi.
13 Mahti bangin ka khingkhai ceng ten, vaknakin thimnak cu a lekvawk bangin cihnakin silnak cu lekvawk hi, tih thei ing.
14 Micip ten a hawhnak haw tuk mun mu thei haw in, misil ten a hawhnak haw tuk mun mu thei haw ma hi. Mahnaven a pa nih haw i humah mi hempoh lakah a hengmi cu heng leng tuk tih mu ing.
15 Keimahno in, “Misil i tawhmi hi tawk bok tuk veng, ka cih hi, i nemcuam peng kaw?” tin ti ing. Hi hei hi phukthong ngihngeh leng haw hi.
16 Misilte a theih haw ngawl toh bang lengin, micipte hei thei haw bok tukma toh. Mailam ten a venghawng uhin, thi khawng tuk laih hung. Misilte bang lengin, micipte vang thi khawng leng haw tuk hi.
17 Mah hangin nunnak hi ka ca in imah ngawl thong hi; itahim titale vanhaang nuai a, na hempoh cu khaw-ngaihnak hengtiktu thong haw hi. Ihempoh hi phukthong ngihngeh haw hi. Huih hil li thongpoh ing.
18 Vanhaang nuai a, ka bawlmi le ka nadehmi hempoh hi ka ca in, imah ngawl thongpoh hi; keimah a thektu i lakah zam khawng tung hi tih thei hamsa zo ing!
19 Mahpa cu micip hi tuk maw misil hi tuk tih hei akua in kaw a thei! Ka cihnak le ka nadehnak pen a suakmi ngah hempoh cu ama ukmi hi khawng haw tuk! Mah hei cu phukthong ngihngeh hi.
20 Leihum a, ka nadehmi le ka bawlmi hempoh ka ngaihsut pepel ten vansangin, um ing. Nase zetin, ka nadeh lih hei siklehzet ing.
21 Itahim titale imah a dek ngawltu lakah cihnak, theihnak le thiamnak tuah nadektu in, a neihmi hempoh zamsan khawng tuk laih na hi pah! Hi hei hi phukthong hi a, thilpha ngawlzet hi.
22 Cim le khamin, a nunsung hempoh ni nuai ah, a dehman a ngahmi ikaw?
23 A nunsung hempoh cu thuaknak le aicannak ngeh hi. Zan hunin, a lungnop cuang ma. Hi hei hi phukthong leng poh hi.Ref 2:23 Job 5:7; 14:1;
24 Mihing ca in, ei le in le, nopnak a ngahmi cu phabel hi. Mah hei cu Pathian kut sung pen a hengmi hi haw tih mu zo ing.Ref 2:24 Thuh 3:13; 5:18; 9:7; Isa 56:12; Lk 12:19; 1Kor 15:32;
25 Itahim titale amah tel ngawlin akua kaw, ei in, a in thei tuk?
26 Mahzuh hi, amah a lungdamtiktu lakah, cihnak, thiamnak le lungdamnak pia hi. Mahnaven misual lakah, Pathian lungdamtiktu lak a, piak kikleh khawng tukin, puak tuk le cop tuk dehvo pia hi. Mah hei cu phukthong ngihngeh; huih hil li bang leng thong hi.Ref 2:26 Job 32:8; Thup 2:6;