DAAN PIAKLEHNAK
(Deuteronomy)
Thulamsial
Daan Piaklehnak laibu sungah Israel mite hun saupi a vahvaih nung haw ten Kanaan ngam a tum haw deuh laih ngawl Moab ngam sungah a um haw laihin Moses in, a miphun tei lakah a hilhmi thute a sasangno in ngan hi.
A thupi deuhin, a sialsiah haw mite cu a nuailam bangin hi.
(1) A masa kum sawm li sung thu le late cu Moses in hilh kikleh hi. A mihing tei lakah ngamkhing ngam ko lakah Pathian i lampuinak cing lelengin, a thu ngai in, muantak hi tukin so hi.
(2) Moses in thukham sawm cu hilh lehin, Thukham a pa khatnak cu thupi deuhin, a sullam hilh hi. Mahceng ten thutepmi ngam a hen haw ten Israel tei nunnak a uk tuk daan a phunkim vang hilhleh hi.
(3) Pathian le Israel mite thutepnak a bawl haw mi cu Moses in, a sullam hilhin, bawl tukin a thutep haw mite a thakin hilhleh hi.
(4) Joshua cu Pathian i minamte puitu tukin Moses dontu in sammi hi. Jordan ngun ngal Moab ngam a hen haw ten Moses cu Pathian i muantak hihnak cu la tuah sa in, Israel hinnamte muicu a piak nungten thi hi.
Hi laibu i tuptahbelmi cu Pathian in it in, a tenmi a hinnamte cu panin, muicu pia hi. Hi thu hi a hinnam ten cing lelengin nunnak le muicu a co haw mi pehzom leleng theihnak tukin a thu ngai in, a ih bok hawnak tukin a tuptahbelmi hi.
Hi laibu sung a, tawhcang bangin a thupimi cangte cu 6:4-6; hi. Hi sungah i thukham ngengbel tihmi, “Topa na Pathian cu na lungmu venghawng, na ngaihsutnak venghawng le na zaangtha venghawng tuah it in hi,” tihmi um hi.
1
Thu Bulpatnak
1 Hithu hi Jordan ngun pen nisuahnak lam ngamkhingah a um haw laihin, Moses in Israel tei lakah a hilhmi thu hi. Israel mite cu Jordan munlawn Suf khua elah um haw; Paran khua cu mahlai pen a langkhat lamah umin, Tofel, Laban, Hazeroth le Dizahab khua cu ngalkhat lamah um haw hi.
2 Sinai Mual pen Kadesh Barnea cu Edom mualhum lampi pen ni sawm le ni khat hawh hi.
3 Israel mite Izipt ngam pen a tul sawng haw, kum sawm li kum, ha sawm le ha khat ha,note 1:3 Ha sawm le ha khat ha tihmi hi Hebru awnin shebat ti haw a, January ha lang le February ha lang sung hi. ni khat ni-in, Topa in hilh tukin thu a piakmi hempoh cu Moses in mipi lakah hilh hi.
4 Heshbon khuasung a, ummi Amor kumpi Sihon, Ashtaroth le Edrei khuapi a, ummi Bashan kumpi Og a neh cengin a hilhmi thu hi.Ref 1:4 Mipum 21:21-35;
5 Jordan pen nisuahnak lam Moab ngam sungah a um haw laihin, Moses in Topa i piakmi daan le thuzilh mite cu hilhciannak nei hi.
6 Moses in, “Sinai Mual a um uh laihin, Topa a Pathian uhin ka lakah hih mualah ngeipi um zo toh uh ci.
7 Vaithawi unna, hawh un; Amor mualhum ngam le a elkim ngam hempoh ah Jordan munlawn, mualhum ngam le munlawn ngam, hanglam ngam le Mediterranean tuipi thuanthum tianin hawh un. Kanaan ngam le Lebanon mual kaltanin Eufrates ngunpi tianin hawh un.
8 Zo un, hih ngamte cu Topa keimah in, na pu le pa uh Abraham, Isaak le Jakob nelah le a casuan tei lak tianin piak tukin ka tepsami hi,” tin keimah ti hi.
Moses In Thukhentute Koih
(Suah 18:13-27)
9 Moses in, “Mah hun laihin nohtei lakah, ‘Nohte bang mipi pui hi ka ca in vanngit hahzet hi. Keimah pa khat bekin tingdun ceng mang.
10 Topa na Pathian uhin nangmuh pungzaitik a, atu-in van a, aksi zah hi zo toh uh ci.
11 Na pu le pa tei Topa in, a tiamsa bangin, a let thawng khatin pungtikin, khangtotik zal tahen!
12 Mahnaven itin kaw keimah pa khat bekin na hauhdunnak uh le na thubuai uhte cu ka puak zawh theih tuk?
13 Mah hangin nangmu hinnam sung tek pen micip, muantak le thil tithei teng unna, nangmu hotu in koih tung hi,’ tin ti ing.
14 Thupha poh hei ti uh ci a, lungkim ten uh ci.
15 Mah hangin nangmu hinnam sung tek pen na ten uhmi muantak cu nangmuh hotu tukin koih ing. A khenkhat cu thawng khat hotu, a khenkhat cu za khat hotu, a khenkhat cu sawm nga hotu, a khenkhat cu pa nga hotu hi haw hi. Na hinnam sung ten pen hotu dadang hei koih ing.
16 “Mah hun laihin amuh tei lakah na mihing tei lak pen thubuai a hengmi cu phano in ngaihsak unna, na mihing tei thu ah hei hihen, nangmu lakah a, um miphun dang tei thu hei hihen, manzetno in sonsak un.
17 Thu na soncat uhten pat peng nei pahsuh un. Iti bang mihing ahi haw hei in, deidatnak nei ngawlin, thu cu a thu bangin son un. A kuamah lau pahsuh un. Itahim titale na thu soncatnak uh cu Pathian nel pen a hungmi hi. Thu pa kha khat cu nangmu ca in soncat tukin a haksa leita ahi tale, keima lakah hunpih unna, keimah in soncat tung, tin hilh ing.
18 Nangmuh hei thil na tih daan tuk uh hempoh kim zetin nangmuh hilh ing,” ti hi.
Kadesh Barnea Ah Vilvengtu
(Mipum 13:1-33)
19 Moses in, “ Topa a Pathian uh i thupiakmi cu bawl ung. Sinai Mual pen tul ung a, hi tizah a zalmi le a lauhuai zetmi phillawn ngam nawkin, Amor mualhum ngam lamah hawh ung. Kadesh Barnea a hen uhten,
20 nohtei lakah Topa a Pathian uhin, a piak tukmi ngam, Amor mualhum ngam cu heng zo uh ci.
21 Zo un, na pu le pa tei Pathian Topa i piakmi cu hi ngam hi, hi. Ama thupiaknak bangin hawh unna, hi ngam cu luah un. Kuamah lau pahsuh un. Na thin nau kha pahsuh un,” tin na ti ing.
22 “Mahnaven ka lakah hung uh ci a, hih ngam vilvengtu tukin le hawhnak tuk lampi zotu tukin, iti bang khuapi ngen um haw hum tih zotu tukin vilvengtu hah masa nung,” tin ti uh ci.
23 “Mahmi cu ngaihsutnak pha hi kha ma maw, tin ti ing a, na hinnam sung tek pen mi pa khat ten, a venghawng haw in mihing sawm le pa nih teng ing a,
24 hawh haw in, mualhum ngam cu Eshkhol munlawn ngam tian zoto haw hi.
25 A zoh haw mi ngam a, thingngah hei thawi in keimah sel haw hi. Topa a Pathian uhin, a piak tukmi ngam cu ngampha ngangai na hi,” tin hilh haw hi.
26 “Mahnaven Topa na Pathian uh i thupiakmi cu el uh ci a, mah ngam tum tuk nuam ma uh ci.Ref 1:26 Daan 9:23; Heb 3:16;
27 Nangmu sung pen pontamin, phuciak uh ci a, Topa in keimuh hua hi; Amor mite hi thah khawng tukin Izipt ngam pen tulpihin, a khut hawah hen tumpih khawng hi.
28 Itakaw mah ngamah a hawh tuk uh? Lau si ung! Vilvengtu in hahmite le mahlai a, ummi cu keimuh sangin ngeng saw haw, a ding haw sangin, ngil saw haw sih, tin hilh zo toh uh ci. Khuapi sung ngehah um haw a, a khuapi haw upnak kulhtian ngen cu van khongto hi, ti uh ci. Tawmi tiatia mihing um haw ti laih uh ci,” tin ti uh ci.
29 “Mahnaven nangmu lakah, Hi bangte cu lau kha pahsuh un.
30 Topa na Pathian uhin nangmuh pui tuk a, Izipt ngam le,Ref 1:30-31 Nung 13:18;
31 phillawn ngam sungah thil a bawl zo bangin, nangmu ai-in, na ngal uhte do tuk hi. A pa in, a capa a pom mek bangin na lamtuan uhah pomin, hilai tian henpih zo si,” ti ing.
32 Hilh li zo naveng noh ten,Ref 1:32 Heb 3:19;
33 na mai uhah, a hawhtu le na ngiahbuk uh tianin, zeisak a, na lampi uh laktu tukin zan hunin mei al tuah hihen, sun hunin meingo tuah na mai uhah a hawh lelengtu Topa cu muang kha sapma uh ci.
Pathian In Israel Mi Dantat
(Mipum 14:20-45)
34 “ Topa in, na phuciak leleng uhmi a theih ten a thinukin,Ref 1:34-35 Heb 3:18;
35 ‘Hi hun a misual noh cu na pu le pa tei lak a, ka tepsa mi ngam pha ah, a kuamah tum tukma uh ci.
36 Jefunneh capa Kaleb bek tum tuk hi. Kaleb in keimah a muan hangin a zohmi ngam cu amah le a casuan lakah pia tung hi,’ tin siatcamin ti hi.
37 Nangmuh tei hangin Topa cu ka humah a thinuk a, ‘Moses nangmah tiangin, Kanaan ngam heng tukma ci.
38 Nangmah bawmtu Nun i capa Joshua cu heng tuk hi. Mah hangin Joshua cu thapia in; Israel mite cu amah in pui tuk a, Kanaan ngam luah haw tuk hi,’ tin keimah ti hi.
39 “ Topa in ka lakah, ‘Asia le pha a khenkhuai thei laih ngawlmi, ngal ten that khawng haw tuk hi, tin na tih uhmi na ca uhte bek tum haw tuk hi. Amuh tei lakah ngam cu pia tung a, amuh ten luah haw tuk hi.
40 Mahnaven nohte cu kik unna, Tuipi San lam pen phillawn lamah hawh un,’ ti uh ci,” ti hi.
Israel Mi Ngal Sung Haw
(Mipum 14:39-45)
41 “Noh ten ka nelah, Topa na Pathian uh i humah sual zo uh ci. Mahnaven atu cu Topa a Pathian uhin, thu a piak bangin a ngal uh cu do tuk ung,” tin ti uh ci. Na venghawng uhin, ngaldo tukin tuangtim ci. Mualhum ngam do cu baihzet tuk hi, tin ngaisung uh ci.
42 Mahnaven Topa in dotik nuam pahsun. Itahim titale amu nelah um tuk ngawl ka hih hangin, a ngal haw ten neh haw tuk hi, tin ngallinnak pia hi.
43 Topa i hilhmi cu nangmuh hilh li naveng, a kuamah in ngai kha nuam ma uh ci. Topa i thu cu el uh ci a, pualthau zetin mualhum ngamah hawh uh ci.
44 mualhum ngam a, ummi Amor mite cu khuai bangin tul haw a, hilh tawtok haw a, Edom mualhum ngam Hormah khua tian that pepel haw hi.
45 Mah hangin na kikleh uhten Topa i nelah kap uh ci. Mahnaven Topa in ngai nuam ngawlin, imah sialkha ma hi.
46 Mah hang hi ven Kadesh ah hi tizah tak ngei lawlawm na um uh!