8
Daniel In Tuu le Keel A Muhnak
1 Belshazzar in kumpi a deh kum thumnakin muhnak vei nih nei ing.
2 Mah ka muhnakah Elam peng kulhtian upmi Susa khuapi sungah umin theidun ing. Ulai Ngunpi mawkah ding ing a,
3 mah ngunpi mawkah tuucang pa khat ki saupi pa nih neimi mu ing; a ki pa khat cu a dang ki sangin sau in dawn deuh hi.
4 Mah tuucangin nitumnak lam, saklam le hanglam a khiklih cu zo ing. Ngamsa dang ten kham thei haw ma hi; a mi nehnakin luat thei cuang haw ma. Ama nuam bangin ihempoh bawlin uangkhozet hi.
5 Iti bang ka tih tuk heng tin ka ngaihsut laihtakin, nitumnak lam pen keelcang pa khat tai li cu mu ing hi; a tai cak leita in, a ke in lei tawngkha man ma hi. A mit le mit laklawhah a langciang zetmi ki pa khat nei hi.
6 Ngun mawk a ding ka muhmi tuucang lamah hawhin tuucang cu a tha neihzahin khi li hi.
7 A thinuk leita in tuucang cu nase zetin, a ki pa nih ekvo in khi li hi. Tuucangin khikleh theihnak tha imah nei ma hi. Lei ah lumin, keelcangin sikpek hi. A pan theitu kuamah um haw ma hi.
8 Mah keelcang cu pualthau dedeuhin, a ngil laih takin a ki cu ek hi. Mah ki pa khat ai-in, a lang ciang zetmi a ki pa li tul hi; a ki pa lite cu saklam, hanglam, nisuah lam le nitumnak lam hek tek haw hi.
9 Ki pa li tei lak pen pa khat ten sung pen ki neuno pa khat tulin a huham ngilnak cu hanglam, nisuah le Ngam Tiam lam zuan hi.
10 Van ngalkap, aksi tei do tak tuk tian ngilin, a do ten a khenkhat cu lei ah vawkin sikpek hi.Ref 8:10 Mang 12:4;
11 Van ngalkap hotu bawi hei dodalin; nisialin, a piak haw mi biakpiaknak cu khaktanin, Biakinn nawngkaitik hi.
12 Mahlai ah nisial biakpiaknak bawl ai-in, mihing ten sualnak bawl haw hi; biaknak dik cu leihumah vawksukin um hi. A bawlmi hempoh ah mah ki cu lawhting hi.
13 Mahten vancungmi pa khatin, a dang vancungmi lakah, “Hi muhnak sungah a langmi hi itik tian kaw a ngei tuk? Hiti bang mullinghah sualnakin itik tian kaw nisial bawlmi biakpiaknak cu a khahtan tuk? Itik tian kaw van ngalkapte le Biakinn cu sihpek a hih tuk?” tin, a dot cu za ciang hi.
14 Vancungmi in, “Hi thu hi taklam le zinglam vei thawng nih le za thumnote 8:14 Taklam le zinglam thawng nih le za thum tihmi hi Ni thawng khat le za khat le sawm nga tihnak hei hi. sung ngei tuk a, mah sungin zinglam le taklam biakpiaknak imah um tukma hi. Mah nungten Biakinn cu masa laih bangin umleh thei tuk hi,” tin ti hi.
Gabriel In Muhnak Hilhciang
15 Mah muhnak i a tihnuammi ka ngaihsut lih laihtakin upmawh khak ngawlpi in mi pa khat ka mai ah ding hi.
16 Ulai Ngunpi hum pen aw pa khatin au in, “Gabriel, a muhmi i tihnuammi cu a lakah hilhciangin,” ti hi.Ref 8:16 Lk 1:19, 26;
17 Gabriel cu hungin ka elah a din ten lau leita in lei ah bok ing.
Ka lakah, “Mihing pa, hi thu hi theih tuk zuamin hi. Na muhmi hi leihum bonak thu tuah pehdunnak nei,” ti hi.
18 Mahti bangin a otlih laihin, lei ah lum ing a, imah thei mang hi. Mahnaven amah in phongto in dingtik hi;
19 “Pathian thinuknakin iti bangin piangtik tuk hum tih lak ing. Na muhmi muhnak cu hun nungdawlbel tuah pehdunnak nei hi.
20 “Ki pa nih a neimi tuucang na muhmi cu Media le Persia uknak ai hi.
21 Keelcang cu Grik uknak ai hi in, a mit laklawhah a langciang zetmi ki cu a kumpi masabel haw hi.
22 Ki pa khat a ek nungten ki pa li a tul lehmi cu ngam a khenkhuai nung haw ten a tul tukmi uknak pa li i hi; hi uknak pa lite hi masa uknak bangin ngil haw tukma hi.
23 “Mah ukdunnak cu bo awn li haw tohin, a sesuak leita haw hangin bawlsiatnak a thuak haw hun a kim li toh ten mi lungmu ngoltol, mi suaksual le mizol thei kumpi pa khat tul tuk hi.
24 Ngil dedeuh tuk naven a ngilnak cu ama tihtheihnak hang kha tukma. Siatsuahnak nase zetin piangtikin, a bawlmi hempoh ah lawhting tuk hi. Mi ngilzet le Pathian i mihing tei humah siatnak tampi hengtik tuk hi.
25 Mi zeltel a hih hangin mizolnak tuah tihtheihnak nei pepel tuk hi. Amah le mah muangdunzet tuk naven a phawhkhak ngawlin mi tampi siatsuah tuk hi. Kumpi lakah kumpi thawmngengbel tianin langpang tuk naven amah cu mihing ngilnak tel ngawlin siatsuahnak tawk tuk hi.
26 Na lakah hilhcian sa zomi zinglam le taklam biakpiaknak thu ah na neihmi cu kim ngangai tuk hi. Mahnaven thukuhin koihin, itahim titale a kimnak tuk hun ngei tuk laih poh tin,” ti hi.
27 Ka lungkhamin, ni tam thim dam mang hi. Mah nungten tho ing a, kumpipa i nadekleh thei ing. Mahnaven ka theihzawh ngawlmi ka muhnakin amthongtik hi.