7
Daniel In Muhnak Hilhciang
Daniel In Sahang Pa Li Muhnak
1 Belshazzar in Babilon kumpi a deh, kum khatnakah keimah Daniel in mangmanin, muhnak nei ing. Ka mang cu ngan ing a, mah zan a ka muhmi cu,
2 hi bangin hi.
Khua hempoh pen huihtheu in, tuipi thuanthum tuite mut hi.
3 Tuipi thuanthum sung pen sahang ngengzet pa li tulin pa khat le pa khat bangten haw ma hi.Ref 7:3 Mang 13:1; 17:8;
4 Sahang pa khatnak cu kiosa bang hi, mahnaven muvanlai bangin ha nei hi. Ka zoh laihin, a ha cu kulhsuk hi. Sahang cu dangto in mihing bangin dingtik haw hi. Mah nungten mihing lungmu neitik haw hi.Ref 7:4-6 Mang 13:2;
5 A pa nihnak sahang cu vom bang hi a, nunglam ke in ding hi. A ha tuah naknguh pa thum petin, a lakah, “Na eih theih zahin ei li pohin hi,” tin aw pa khatin ti hi.
6 Mahti bangin ka zoh laihin sahang dang pa khat na tul hi. Tavang bang naven a ngumzaang humah ha pa li nei hi, a ha cu vano ha bang hi. Lu vang pa nih nei hi. A mel zoh ten thuneizet tuk bang hi.
7 Mahmi ka zoh lih laihin, a pa linak sahang cu tul hi. Huham neizet, lauhuai le mullinghah ngamsa hi. Thik ha nei in, ngengzet haw hi, mah a thik ha tuah a mat mite cu thai khawngin sik pek bok hi. Sahang dang bang hi ngawlin hi sahangin ki sawm nei hi.Ref 7:7 Mang 12:3; 13:1;
8 A kite ka zoh lih laih takin a ki tei lak pen ki neuno a poto cu mu ing. Mah ki neuno in, a masa ki pa thum cu hong hi. Mah ki neuno in mihing mit le kam bang nei in pualthau zetin awn lawlok hi.Ref 7:8 Mang 13:5-6;
Kumkhua In A Nungmi Muhnak
9 Mahtibang ka zoh lih laihin kumpi khunnakte na koih haw hi. Kumkhua a nungmi cu khunnak pa khat humah khung hi. A puan cu vuk bangin ngo in, a sam cu tuumul bangin thiangtho hi. A khunnak cu mei alh leng humah umin alh dudum hi;Ref 7:9 Mang 20:4; 1:14;
10 meiling cu tui luang bangin mahlai pen tul zuzung hi. A nadektu tukin mihing a thawng a za um haw in, a mai ah mihing a thawng athawngin, ding haw hi. Thukhennak cu panin, laibute keu haw hi.Ref 7:10 Mang 5:11; 20:12;
11 Ka zoh laih takin, ki neuno cu tuangkhawng li in le pualthau zetin, a otlih cu za ing. Ka muh laih loli in sahang pa linak cu thatin, a luang cu mei sungah vawk haw in bota hi.
12 Adang sahangte cu a huham neihmi hempoh laksak haw hi, mahnaven a nunnak haw cu hun comno sung khawih hi.
13 Zanlam ka muhmi ah mihing bang pa khat mu ing. Meingo hum pen hungin kumkhua a nungmi lakah hawhin, a lakah heng hi.Ref 7:13 Mt 24:30; 26:64; Mk 13:26; 14:62; Lk 21:27; Mang 1:7,13; 14:14;
14 miphun, hinnam le awn hempoh tuah a awnmi ten ama nadeh theihnak tukin a lakah thuneihnak, minthannak, upatnak le kumpi huham hempoh cu piakin um hi. A thuneihnak cu kumkhua kho in, a uknak cu bo awng tukma hi.Ref 7:14 Mang 11:15;
A Muhmi Hilhciannak
15 Langnak ka muhmi in ka thinsutikin ka lungmu buaitik hi.
16 Mahlai a dingmi pa khat lakah hawh ing, a sullam hilhciang tukin dong ing. A sullam cu hi bangin hilh hi.
17 “Hi sahang ngengpi pa li cu leihumah a tul tukmi uknak pa lite hi.
18 Cungnungbel Pathian i mihing ten kumpi huham ngah haw tuk a, kumkhua pen kumkhua tian co tahaw tuk,” ti hi.Ref 7:18 Mang 22:5;
19 Sahang pa linak cu sahang dang tuah a bangve ngawlmi, a lauhuai sahang, a ke tin daal le a ha thik tuah a matmi hempoh botkekin, sikpek litu i thu theinuam ing.
20 A lu hum a, ki sawm a neihnak, dawllam ten ki pa khat a poto lehnak le mah a poleh hangin ki pa thum a hot lehnak thute thei nuam ing. Mit le kam vang nei a, pualthau zetin awn lawlok hi. Adang sangin lauhuaibel hi.
21 Mahtibang ka zoh lih laihin, mah ki in, Pathian i mihingte do in neh hi.Ref 7:21 Mang 13:7;
22 kumkhua a nungmi hungin Cungnungbel Pathian i mihingte panin thukhennak bawl hi. Pathian mihing ten kumpi thuneihnak a co hun haw heng zo hi.Ref 7:22 Mang 20:4;
23 Ka lakah hilhciangin, “Sahang pa linak cu leihumah a tul tukmi uknak pa linak hi tuk a, uknak dang tuah bangten tukma hi. Leihum buppi neh khawngin siatsuah khawng tuk a, sikpek nek tuk hi.
24 Ki sawm cu mah uknak a uktu tuk kumpi sawmte hi. Kumpi dang pa khat tul tuk hi; amah cu kumpi dang tuah bangten ngawlin kumpi pa thumte cu vawk tuk hi.Ref 7:24 Mang 17:12;
25 Cungnungbel Pathian sonsia tuk a, Pathian mihingte bawlsia tuk hi. A biaknak daante le puaite thek tum tuk hi; Pathian mihingte cu kum thum le a lang sung a khutnuai ah koih tuk hi.Ref 7:25 Mang 12:14; 13:5-6;
26 Mahnung ten vancung thukhennak um tuk a, huham le a thuneihnak hempoh cu laksak khawng hi tuk hi; siatsuahnak tawk tuk a, pailal tatuk hi.
27 Leihum uknak hempoh tei huham le thawm ngengnak cu Cungnungbel Pathian mihing tei lakah piak hi tuk hi. A co haw mi kumpi huham cu boleh awng tukma toh hi, leihummi uktu hempoh ten a nadeh sakin, upat haw tuk,” ti hi.Ref 7:27 Mang 20:4; 22:5;
28 Hihi cu tangthu tawpnak hi. Lau leita in, dalsialsual khawng ing a, mah thu cu ka lungmu sungah koih leleng ing.