8
Thingngah Bawm Khat Muhnak
1 Cungnungbel Topa i nel pen muhnak dang pa khat nei ing, Mah muhnakah thingngah bawm khat mu ing.
2 Topa in, “Amos ikaw na muh tin dong?”
“Thingngah bawm khat mu ing tin donleh ing.”
Topa in, “Ka mihing Israel tei a bo ni heng zo hi. Amuh bawlsia tuk ka ngaihsutmi cu khelleh tukma toh ing.
3 Mah ni ten kumpipa i innsung a, lasaknakte cu kahnak aw in cang tuk hi. Mun hempoh ah mi luang um tuk hi. Dai khipkhep tuk,” ti hi.
Israel Bawngsiatnak
4 Ngai hih uh, noh mi tingsamte a cilpektu le ngamsung a, nuncim haksate siatsuah a tumtu!
5 Na lungmu uhin, “Ka an uhte zuak nuam zo ka hih uh hangin, ni pi nitum hak leita, ngak thei lehma toh ung. Ituk ten hum Sabbath ni bo in, thil ka zuak theihleh tuk uh? Ka na man uhte cu a val ngenin le cuai khainak uhte cu na leitute zolnakin bawl tuk ung.
6 A sebel sangvut nangawn mantam zetin zuak tuk ung, leibat nei in kedam dap khat man hei a pia thei ngawl mizawngte zei nung inna, sal a khawih tukin lei tuk ung ti uh ci.”
7 Topa Israel i Pathian in thutiamin, “Sualnak a bawl haw mi cu phawkngil tuk mang.
8 Mah hangin lei buppi hing tuk a, hi ngamsung mihing hempoh nuncimnak thuak haw tuk hi. Hi ngam buppi cu hing khawng tuk a, Nail ngun tuipi bangin a kiam hun le a kai hun um tuk hi.
9 Mah ni ten sunlaihtakin, ni caktik tung a, sun khuavak laih takin khuathimtik tung hi. Cungnungbel Topa keimah in, hilh ing.
10 Na puai uhte cu mithi vuinakin cangtik tuk a, na lungdam la uhte cu khua ngaih kahnakin cangtik tung hi. Na sam uh cu metkolh khawng tung a, thangkhau puan silhtik khawng tung hi. Capa neihcalam a thih ten a nu le pa tei a kah haw bangin kaptik tung hi. Mah ni cu a tawp tianin, a kha zetmi ni hi tuk hi.”
11 “Hih ngam sungah paam ka tuntik ni heng paih tuk hi. Mihingte cu a ngil haw kial tuk naven an duhin, ngilkialnak hi ngawlin le dangdum tuk naven tui duh dangdumnak vang hi kha tukma hi. Topa i awnkam theihnuamnak ngilkial le dangdum hi tuk hi. Cungnungbel Topa keimah in hilh zo ing.
12 Mihingte cu saklam pen hanglamah, ni suahnak lam pen nitumnak lamah vakvai haw tuk hi. Khua hempoh ah Pathian i awnkam cu zei haw tuk naven mu haw tukma toh hi.
13 Mah ni ten khanglai le tangval pilzette hei dangdumin lum haw tuk hi.
14 Samaria milim tei min tuah siatcamtute, Dan min lotute, Beersheba min lotute cu bah haw tuk a, tho kikleh haw tukma toh hi.”