28
Malta Tuikulh Heng Haw
1 Himdamno in tuimawk ka hen uhten mah tuikulh cu Malta tuikulh tih thei ung hi.
2 Mahlai a um mihingte cu keimu humah phazet haw hi. Nguahzu in, a dap leita hangin keimu ca in meipi tuah sakin, phazetin zo haw hi.
3 Paul in thingkang cawmkhawmin mei sungah lawn hi. A sa leita hangin mei sung pen ngul tulin Paul i khut pen cikin khai liakluak hi.
4 Paul i khutah ngul khai liakluak amuh haw ten, mahlai tuikulh a umtu ten, “Hi pa hi laithat ol hi, tuipi sung pen luat naven a pathian in nungtik tukma,” tin ti haw hi.
5 Mahnaven Paul in, a ngul cu mei sungah thingvawkin imah kinmawh ma hi.
6 Ituk ten kaw lum ua-uanin, a thih tuk tih khi zo leng haw hi. Ngeizet zo leng haw naven iti mah a um ngawllam amuh haw ten a lungmu haw khellehin, “Amah hi pathian hi tuk!” tin tili haw hi.
7 Mahlai pen a nai thimnakah lo ngam zal thim umin, a neitu cu mah tuikulh a, bawi upa Publias hi. Publias in phano zo in, ni thum sung cu a mikhualin suak ung.
8 Publias i pa cu khawsik nattun le vonsawk taifot nat na in zaunakah zau leleng hi. A zaunak khansungah Paul cu tumin, a humah a khutnga in thu a nget ten dam hi.
9 Mah thu a zak haw ten mah tuikulh a, dam ngawl hempoh cu hung haw in, dam khawng bok haw hi.
10 Laksawng tampi pia haw in, tinbaw tuah ka hawh uhten lampi lak pen ka kul tuk uhmi vang tinbaw humah koihsak haw hi.
Malta Pen Rom Ah
11 Ha thum nungten Alexandria pen a hungmi, “Pathian Pa nih”note 28:11 Pathian pa nih tih cu Kasta le Pollak hawmkuang min sam nuamnak hi. a tih haw mi tinbaw khung ung. Mah tinbaw cu phalbi sungin mah tuikulhah a ummi hi.
12 Sirakus khuapi ah hengin ni thum sung caam ung.
13 Mahlai pen tul lehleu in Razium a tih haw mi khua ah heng ung hi. A zingten hanglam huih cu theu in, a ni nih nungten Poteuli ah heng ung hi.
14 Mahlai ah thu umtu um haw in, amu lakah ni pi khat sung caam tukin ngen haw hi. Mahlai pen Rom khua ah heng ung.
15 Rom khua a ummi thu umtu ten ka thawmvang uh a zak haw ten Appius Bazal a tih haw mi khua le ngiahbuk pa thum a tih haw mi khua tian hungin muak haw hi. Paul in amuh ten Pathian nelah lungdam sanin, a thatho ngangai hi.
Rom Khua Ah
16 Rom khua ka hen uhten Paul cu amah bek umtikin, ngalkap pa khat bek cingtik haw hi.
17 Ni thum nungten mahlai a ummi Judah hotute tawkdun khawm tukin Paul in sawm hi. A hun haw ten Paul in amuh tei lakah, “Ka phunpih Israel mite, a miphun uh le a pupa tei lak pen a ngahmi a nundan uh i humah siatsuahnak bawl ma naveng Jerusalem ah thawng a khiak haw i humah Rom tei khutah pia haw hi.
18 Thu a dot ceng haw ten thihnak tham sualnak ka bawl ngawlmi amuh haw ten Rom ten hah nuam haw hi.
19 Mahnaven Judah miten a el haw hangin ka phunpih tei humah mawhsiat tuk dang nei sapma naveng Rom kumpi lakah thu a khen sawlawn ngawl cu cangleh ma toh hi.Ref 28:19 Nung 25:11;
20 Mah hangin nangmuh ka tawh nuamnak le thu ka hilhnuamnak hi. A ngangai in hitih bangin taicin khih ka hihnak cu Israel tei muansan lelengmi pa i hangin hi,” ti hi.
21 Amuh ten Paul i lakah, “Na thu le la ah Judah ngam pen laikuat ka ngah uh imah umma hi. Na thu le la a sia le pha a hilhtu tukin mahlai lam pen a hengtu a mihing uh pa khatno hei um haw ma hi.
22 Mahnaven na ngaihsutnak cu thei nuamzet ung. Itahim titale na pawlpi thu uh hi mun hempoh ah miten sonsia haw tih cu thei ung,” tin ti haw hi.
23 Mah hangin Paul tuah a ni khiahdunin, Paul i umnakah mipite hung haw hi. Zing pen taklam tian, Pathian Uknak thu cu hilhciang a, Moses Daan laibu sung pen profet tei laingat mite la in, Jesuh i thu khi a lungmu sung hawah a tum tukin hilh hi.
24 A hilhmi thu in mi khenkhat cu a lungmu haw ciangtik bang naven a khenkhat lam ten um haw ma hi.
25 Paul in thu pa khat hilhin, mah thu hangin a lungmu haw cundun thei ngawlin khen khekdun khawng haw hi. A hilhmi cu: “Hawvang Thiangtho in, profet Isaiah mangin, na pu le pa tei lakah thu a hilhmi cu manzet hi.
26 Mahmi cu:
‘Hi mihing tei lakah hawh inna,
hilhin hi.
Ngai li tuk navecin
za tukma uh ci;
Zoli tuk nave uhcin
mu tukma uh ci.Ref 28:26-27 Isa 6:9-10;
27 Itahim titale a lungmu haw
bingin, a beng haw bulin,
a mit haw caw hi.
Mah ahi ngawl ahin
a mit haw tuah mu in,
a beng haw in za tuk a,
a lungmu haw in theitum
haw tuk hi.
Mahten Keima lam hekkik
haw tuk a, damtik tung,’
tin Pathian in ti hi.”
28 Mahten Paul in, a dawlbelin, “Pathian i nunpatnak Thuthangpha cu Gentail mitei lakah hentik hi zo, tih hi na theih uh kul hi. Amuh ten mah thuthang cu ngai haw tuk hi,” tin ti hi.
29 Paul in mahtin a hilh celh ten Judah mite cu tul khekin amuh le muh cu nase zetin mah thu ah dondun li haw hi.Ref 28:26-27 Isa 6:9-10;
30 Paul cu a inn sapnakah kum nih sung um hi. Amah tawk nuamin, a hungmi hempoh khi phazetno in tawk hi.
31 Ngalphazet le zalen zetin Pathian Uknak thu phuangin, Topa Jesuh Khrih thu vang zilh hi.