27
Rom Ah Zin Tukin Paul Hawh
1 Italy ah tinbaw tuah hawh tuk hung tih a soncat nung haw ten, Paul le thawngta dangte cu “Kumpipa in ngalkap honpi” tihmi Rom ngalkap hotu ngalbawi Julius i khutah ap haw hi.
2 Asia ngam hawmkuang colhnak munah a cawl thah pepel tukmi Adramittium khua pen a hungmi hawmkuang khungin hawh ung hi. Mesidonia ngam a, Thesalon khua mi Aristarkas vang cu keimu lakah tel bok hi.
3 A zingten Sidon ah heng ung. Julius in Paul i humah hehpihnak lungmu nei in, Paul i kinmi nate a ngah theihnak tukin le a ngualcamte tuah tawhdun theihnak tuk hun pia hi.
4 Mahlai pen hawh lehleu in, huih cu keimu lam bebekah a theu hangin huih demnak a langlam Saipras tuikulh mawk tawnin, hawh ung hi.
5 Tuipi cu Silisia le Pamfilia ngam tuah pehdunnak pen tanvawkin, Lycia ngam Mira khua ah heng ung hi.
6 Mahlai ah ngalbawipa in Alexandria pen Italy ah a hawh tukmi hawmkuang cu mu in mah hawmkuangah khungtik hi.
7 Dawm hehetno hawh ung a, ni tampi ngei ung, a dawltawpnak ten haksa zetin Cinidas khua zawnah heng ung hi. Mahlai lam tawnin, hawh tuk cu huihin, a kham hangin lei i lipnak lam huih demnak Crete tuikulh lam pen tawnin, Salmone ngam pen hawh ung hi.
8 Tuipi mawklam nek deuhin hawh ung a, Himnak tinbaw colhnak a tih haw mi munah heng ung. Mahmi cu Lasea khua pen khawla ma hi.
9 Mahlai ah ngeipi cawl ung a, Sualthiannak Nij 27:9 Sualthiannak Ni: tihmi cu September ha bo tuk kuan le October ha thak lam ten bawl mek haw in, mah puai hun ten huih tam theizet hangin hawmkuangte cu a hawh haw ten lauhuai theizet ti hi. a hen zo hangin tinbaw tuah khualzin cu lauhuai zo toh hi. Mah hangin Paul in amu lakah hitih bangin ngaihsutnak pia hi.
10 “U le naute, hilai pen a lampi uh cu a lauhuaimi hi zo toh hi. Na puak uhmi van le tinbaw hi siatsuahnak tawk tukin le mihingte vangin a nunnak uh bo tuk,” ti hi.
11 Mahnaven tinbaw mawngtu pa le a neitu pa i otmi saw khi ngalbawi pa i lungmu sungah tum saw hi. Paul i sonmi cu a thin sungah tum kha ma hi.
12 Tinbaw a colhnak haw cu phalbi hun ten umnak a pha ngawl hangin mitam saw ten a cangthei tale Foniks tian hawh vanglakin, mahlai ah phalbi sung zong um tuk khi nuam haw hi. Finiks cu Khrit tuikulh i tinbaw colhnak mun hi a, hanglam nitumnak lam le saklam nitumnak lam hekin, a ummi hi.
Tuipi Humah Huihpi Theu
13 Hanglam pen huih nemno theu in, a tuptahnak uh bangin hawh thei tuk hung tih ngaisungin tinbaw khihnak thikkawi khi tuisung pen dokin, Krete tuikulh mawk tawn ngutin hawh ung hi.
14 Mahnaven ngeican um ngawlin, “Nisuahnak saklam huihpi,” a tih haw mi cu tuikulh lam pen nase zetin theu hi.
15 Ka tinbaw uh cu seplokin, mah huih cu ka nawkvawk zawh uh ngawl hangin amthongin, um ung. Ka tinbaw uh cu huihin, a nuamnakah hawhpih pepel hi.
16 Kauda tuikulh i hanglam ka hen uhten huih lawmcang deuh hangin hi saw deuh hi. Mahlai ah haksa zetin tinbaw i kenmi hawmkuang cu lemcang deuhin koih ung hi.
17 Tinbaw humah dokin, hawmkuang cu khau tuah khimzet ken haw hi. Libia ngam tuimawk el, tuisung a philnel mualtuan khi pah kha sual kawn hung tih a lau haw hangin tinbaw cu a puanzak niamdeuhah khiasuk haw in huih i a hawhpihnakah hawhpih poh hen tin ti haw hi.
18 Huihpi cu theu lelengin, a zingten tinbaw i puakmi van a khenkhat cu tui sungah vawk haw hi.
19 A zinglawi ten tinbaw i na khenkhat vawk lehleu haw hi.
20 Ni tampi sung, ni le aksi mu thei ma ung; huih cu nase zetin theu leleng hi. A dawltawpnak ten nung tuk hung tih neuno hei muansannak nei lehma toh ung hi.
21 Tinbaw humah mihingte cu an ei ngawlin ni tampi a um nung haw ten a mai hawah Paul cu dingto in, “U le naute aw, ka thuhilhmi ngai in, Khrit tuikulh pen hawh ngawlin a um uhta ahin, hi tih bangin sunnak le buainakte um tukma hung hi.
22 Mahnaven atu hei in thinsu pahsuh un tin hilh ing. Tinbaw cu sung tuk nave hungin eimuh cu lalthong tukma hung hi.
23 Itahim titale zantakin keimah neitu le ka biakmi Pathian i vancungmi ka lakah hungin,
24 ‘Paul, lau pahsun hi, Rom kumpipa i mai ah na din kul hi! Pathian na humah a phat hangin nangmah tuah a hawhtute cu pa khatno hei thi ngawlin a nunnak haw khawih khawng tuk hi,’ tin ti hi.
25 Mah hangin unaupihte, lau pahsuh un! Itahim titale Pathian muang ing, a hilhsa bangkekin, hi tuk poh hi.
26 Mahnaven tuikulh pa kha khatah huihin nuainek tuk,” ti hi.
27 Mediterranean tuipi ah huihpi in nuainek sawng zan sawm le zan linak zo hi. Zanlaih hawngin tinbaw cingtu ten leilam naideuhbel tuk toh hung tin um mawh deuh haw hi.
28 Mah hangin khau tuah thik tumpi cu khihin, a khiaksuk haw ten tui cu pi za khat le pi sawm nihin thuk hi. A ngei ngawlin khiasuk lehleu haw in pi sawm kuah thuk laih hi.
29 Tinbaw in, suang ngengpi sawh kha kawn tih a lau haw hangin a nunglam pen a khihnak haw thikkawn pa li khiasukin, khuavak tian thungen thahin ngak haw hi.
30 Mahten tinbaw cingtute cu tai tukin ngaisung haw hi; tinbaw khi tui ah khia in, a mailam pen a khihnak thik kawn khenkhat a khiasuk tuk bangin um hem haw hi.
31 Mahnaven ngalbawipa le ngalkap tei lakah Paul in, “Tinbaw cingtute a sungah a um haw ma tale na nunnak tuk uh muansannak imah umma,” ti hi.
32 Mah hangin tinbaw a lentu khau cu ngalkap ten satcatin tinbaw cu tuitaitik hawta hi.
33 Khuavak kuan ten, Paul in an eitik hi. “Ni sawm le ni li sung thinsu in um zo uh ci, mah sungin imah ei ma uh ci.
34 Hehpih kuun ing hi; an dembek ei un hi. Na nunnak tukin kul hi. Na lu hum uh a, samzang pa khatno hei paithong tukma,” ti hi.
35 Mahtin a tih ceng ten Paul in, cangho demno cu la in, a venghawng haw mai pen Pathian nelah thungenin, cangho cu bothemin ei hi.
36 Midang vang a lungmu haw khoh deuhin an cu demno tek ei haw hi.
37 Tinbaw sungah a ummi ka venghawng uhin za nih le sawm salih le pa luk ung hi.
38 Tawkfang a eih celh haw ten sangvut hempoh cu tui sungah vawk khawngin tinbaw khi zangdeuhin bawl haw hi.
39 Khua a vak ten hawmkuang cingtu ten tuimawk a muhmi haw khi ilai hum tih thei haw ma hi. Mahnaven tuimawk pa khat i tuikel mawk pa khat mu haw in, a cangthei tale mahlai ah a tinbaw haw cu cawltik tukin ngaisung haw hi.
40 Mah hangin a tinbaw khihnak khau cu satcatin thikkawn cu tuipi sungah khiasuk haw hi. Mahten tinbaw hotnak khau tuah a khih haw mi cu dukin a mailambelah a puanzak khi zakin huihin mailamah mutin tuimawk lamah hawh ung hi.
41 Mahnaven tinbaw cu philnel vun sawh kha in tang hi. A mailam cu phil sungah sawhtumin, dawhtulleh thei ma hi; a nunglam cu tui hualpi in sualin, kehlet khawng hi.
42 Ngalkap ten thawngta khi tuivatin tuimawk a hen haw ten tai kuh khawng haw tuk tih lau in, thah khawng tum haw hi.
43 Mahnaven ngalbawipa in Paul cu a hup nuam hangin kham hi. Mahten tuivat thei ten tinbaw pen dawk unna tuimawkah vat un tin thupia hi.
44 A tangmi ten thingpek maw, hawmkuang keh thing tawngmawk pomin, zui haw hi. Mahten ka venghawng uhin tuimawkah himdamno in heng khawng ung hi.