14
Ikonium Heng Haw
1 Mahti bang bok lelengin Ikonium khua hei ah Paul le Barnabas cu pumkhawm innah hawhin, nase zetin thuhilh haw hi. Judah mi le Gentail mi tampi cu thu umtu ah cang haw hi.
2 Mahnaven a um nuam ngawltu Judah miten Gentail mite cu tokpilin, thu umtute khi dotik haw hi.
3 Nungzuitute cu mahlai ah ngeipi um haw a, ngalhang zetin Topa i thu cu hilh li haw hi. Topa i hehpihnak thu a hilh haw mi cu thuman hi tih langtiknakin, Topa in nalamdang bawl theihnak huham pia hi.
4 Khuasung mite cu khendun khawng haw a, mi khenkhat ten Judah mite panin, khenkhat lam ten nungzuitute pan haw hi.
5 Gentail mi khenkhatte le Judah mi khenkhat ten a hotute haw tuah nungzuitute bawlsiat tuk le suang tuah sep tukin soncat haw hi.
6 Mahmi cu nungzuitu ten a zak haw ten Lycaonia ngamsung a, Listra khua, Derbe khua le a elkim ngamte ah tai haw hi.
7 Mahlai ah Thuthangpha cu phuang haw hi.
Listra le Derbe Khua Nadehnak
8 Listra khua ah pianpih kezawngin, vei khatno hei a ciahthei ngawl pa um hi.
9 Paul i thuhilhnak cu a khungin ngai hi. Paul in, a thuhilhmi cu a up hangin damnak ngah thei tuk hi, tihmi upnak nei hi tih cu Paul in, a theih ten cangcianzetno zo a,
10 nging zetin, “Tho inna, dingin!” tin ti hi. Mahpa cu dawkto in lamciah thei hi.
11 Mahti bangin Paul i bawlmi cu mipi ten amuh haw ten amu Lycaonian awnin, “pathiante mihing bangin cangin eimu lakah hungsuk haw si maw!” tin au leilui haw hi.
12 Barnabas cu a pathian i min Zeus tin sa in, Paul cu a awn litubel a hih bangin a pathian i min Hermes tin sa haw hi.
13 A khuahial hawah a pathian haw Zeus biaknak inn um hi: mahlai a thiampi ten khuicang le paakte cu kongka ah cawi haw hi. Itahim titale amah le mipi ten nungzuitu tei lakah biakpiaknak a neih nuam haw hangin hi.
14 Mahtin a bawl tum haw cu Barnabas le Paul ten a zak haw ten a puan haw botkekin, a au thahin tai ngut haw hi
15 “Hitih bangin itakaw bawl na tum uh? Kohte cu nangmuh bang mihing bok ung hi! A nemcuam ngawlmi thil na bawlnak uh pen lei le van, tuipi le a sung a ummi hempoh a bawltu Pathian nung lakah na kihlehnak tukin Thuthangpha hilh tukin hung ung hi.Ref 14:15 Suah 20:11; Saam 146:6;
16 Ni dang laihin, akua hei hihen amu nuammi lampi zui tukin hon hi.
17 Mahnaven thilpha bawlmi in amah um tih khi langtik leleng hi: van pen nguah zutikin, a huncan ten anci potik hi; tui le an pia in, na lung uh muang zetin bawl hi,” tin ti haw hi.
18 Mahtin a hilh haw nung hei ten dawi biakpiaknak bawl tuk ngawlin nungzuitu ten mipi cu cangca kham thei haw hi.
19 Judah mi khenkhat cu Pisidia ngam Antiok khua pen le Ikonium khua pen hungin mi honpi khi amu lamah tang tukin a bawl theih haw hangin Paul cu suang tuah sep haw a; thi zo tin ngaisungin khuahialah kai tulin zam haw hi.
20 Mahnaven thu umtute a elah a tawhdun khawm haw ten Paul cu tholehin, khua sungah hawhleh hi. A zingten Barnabas tuah Darbe khua ah hawh haw hi.
Siria Ngam Antiok Ah Kikleh
21 Paul le Barnabas ten Thuthangpha cu Darbe khua ah hilh haw a, nungzuitu tampi ngah haw hi. Mahnung ten Listra khua, Ikonium khua le Pisidia ngam Antiok ah kikleh haw hi.
22 Thu umtute thapia thah pepelin, upnak sungah muantak zetin um tukin so pepel haw hi. “Pathian Uknak sungah a tum tukmi ahi uh tale haksatnak tampi a tawh tuk hihim uhmi hi,” tin zilh pepel haw hi.
23 Pawlpi umnak pawpohah pawlpi upa koih pepelin thungetnak le an cannak tuah a up haw mi a Topa haw i lakah apnak bawl pepel haw hi.
24 Pisidia ngamah a lehvawk nung haw ten Pamfilia ngamah heng haw hi.
25 Thuthangpha cu Perga khua ah hilhin, mah nungten Attalia khua ah hawh haw hi.
26 Mahlai pen hawmkuang tuah Antioke 14:26 * Hi Antiok cu Siria ngam Antiok khua hi. khua ah kikleh haw hi. Antiok khua cu atu-in, a celh haw mi a nadeh haw dek tukin Pathian nelah a piakdunnak haw khua khi hi.
27 Antiok khua a hen haw ten pawlpi mite cu hulawmin, Pathian in amuhte a mandan le Gentail mite Pathian thu um tukin lampi a honsaknakte hilh haw hi.
28 Mahlai ah thu umtute tuah ngeipi sung um langkhat haw hi.